प्रकाशितवाक्य 1 - नाहाली

¹ यीशु मसीहान प्रकाशितवाक्य, जो बोगवान ज्यानकेरता आपील का आपणा दासाह त्यू वातू, ज्यू जेल्दी एने गिरीज हि, देखाडील; एने तो तान स्वर्गदूतांह मोकलीन तान द्वारे आपणो दास यूहन्ना ज्याह कियील,

² जो बोगवानान वचन एने यीशु मसीहान गवाही, म्हणजे जो काय तो देखील इतू तान बारामाय गवाही आपील.

³ धन्य हेते जा जी भविष्यवक्तान वचनामाय वाचणु, एने ता जो ज्यो होमेलनू एने तामाय लिखील वातुहू मानणु; काहाकाय का तो टाइम आहनी हि.

सात कलिसियाहा अभिवादन

⁴ यूहन्ना फायरीन आशिया माय वाल्यू सात कलीसियान नावे: ताफायरीन हि जो हि एने जो एतो एने जो आवणे वालू हि; एने त्यू सात आत्मा उगेरीन ज्यू तान सिहांसनान ओगांण हेत्यू,

⁵ एने यीशु मसीहा उगेरीन जो विश्वास योग्य गवाही एने मुरील मायरीन जीवतालू उठमायरीन पेल्लो एने पृथ्वीन राजांचा अधिकारी हि, तुमूह कृपा एने शान्ति जुडतो रीथीह आमऱ्येपुररीन प्रेम मेली, एने ताह आपणा रक्तान द्वारे आमूह पापापुरीन सोडावील हि,

⁶ एने आमु एक राज्य उंजू आपणो आबोक बोगवानान केरता याजक बोनाडीन आपील; तोहोलोच महिमा एने पराक्रम पिडीन पिडी रेय. आमेन.

⁷ देखू, तो वाद्लाहेर्यो आवूह हि, एने प्रत्येक डोलो ताह देखीह, एने तान केरता ताह भोसकाले ते पुण ताह देखणे, एने जोमनिन आखा कुळ तान कारणाने छाती ठोकती. होव. आमेन.

⁸ प्रभु बोगवान, जो हि एने जो इतू एने जो आवण्यो हि, जो सर्वशक्तीमान हि, ज्यो केणें का, “मी अल्फा एने ओमेगा हि.”

यूहन्नाह मसीह ने दर्शन

⁹ मी यूहन्ना, जो तुमरो बाहाक एने यीशुन क्लेश एने राज्य एने धीरामाय मी तुमरे हेर्यो भेलाईल हि, बोगवानान वचन एने यीशुन गवाहीन कारणा से पात्म नावान बेटा पुर इतू.

¹⁰ मी प्रभुन दिह आत्मा माय आव जाईल, एने आपणे पासाण तुरहीन मोठलो शब्द ज्यो केतालो होमलील,

¹¹ “जो काही तू देखी ताह पुस्तकामाय लेखीन सात कलीसियान आथे मोकली दी, अर्थात इफिसुस, एने स्मुर्णा, पुर्गमान, एने थूआथीरा, एने सार्दीस, एने फिलादेल्फिया, एने लौदीकिया ला”

¹² जेहीकाय मी ताह, म्हणजे जो मारहे-या बोलीह एतो, देखणे केरता आपणा मूय फिरावणू; एने पासाण देखहुं मी होनान सात दिव देखील,

¹³ एने जिस दिव माय माणहान सोरो सदृश्य एक माणुह देखील, जो फायामायरीन फाडका पेरीन, एने छातीपूर होना पट्टू बांधील एतो.

¹⁴ तान मुंडे एने लेट्यां दोवल्या लोकरी सारखी उज्वल एती, एने तान डोला आगठाणहोस आहनेन हारका एती.

¹⁵ तान पाय हाजो पितलीन हारका एता जो नाह का भट्टी माय तेवी ता कियील गीया एता, एने तान शब्द जादा पाण्यान शब्द हारका एता.

¹⁶ तो आपणो जेवड्यो आथाम सात तारा लीईल एता, एने तान मुयापूररीन तेज दुधारी तलवार निकलीन एती. तान मूय इही प्रज्वलित एता, तोहोलोज सूर्य केठीन दोपामाय टाइम चोमोकणे.

¹⁷ जेहीकाय मी ताह देखील तर तान पायापोर मुरील सारखो पोडीन जाईल मारो मुयापूर जेवल्यो मेलीन कियील, “बिऊ मां; मी पेल्लो एने शेवटल्यो जीवन हि”

¹⁸ एने जीवतालू भी मी हि, मी मोर जाईल इतू, एने ऐवी देख मी पिडीन पिडी जीवतालू हि; एने मृत्यू एने अधोलोकान किल्यु माहुफाय हेत्यू.

¹⁹ ज्यानकेरता ज्या वातू तू देखील हेते एने ज्या वातू एता हि एने ज्या वातू तान पासाण एय हि, ता आखान केरीन लेखीन ले.

²⁰ अर्थात सात ताऱ्यांआ भेद ज्याह तू मारो जेवड्यो आथामाय देखील एता, एने ता सात होनो समयी चा भेद: तर सात तारा सात कलीसियान दूत हि, एने ते सात समयी सात मोडीलीन केरीन हि.