फिलेपियो 4 - नाहाली

¹ हे मारो प्रिय बायहो, तुमु मारो प्रेम आहा, मारो जीव तुमरे माय लागिल हि, जो मारो आनंद एने मुकूट हि, हे प्रिय बायहो, प्रभु माय इहीच बोणावीन रीवू

व्यवहारान वातू

² मी युओदिया एने संतुखे ज्याह दुईजानाह प्रोत्साहित करने, कि तुमूह प्रभु माय एकहारखे विचार बोनाडीन रीवू.

³ मारो प्रिय सहकर्मी, तुवाह पुण मी आग्रह केथु कि ज्याह बायकूह मदत कराहे, टायमामाय तोहोलोच मारा दिहरा क्लेमेस सहकार्य सहित सुवार्ता पोरचार माय मारहे-या एकटाह हेते, तान नावे जीवनान पुस्तकामाय लेखील गीया हेते.

⁴ प्रभु माय दाडीन आनंद केरतीन रीवू; उजू केह आनंद केरू.

⁵ तुमरी सहनशील आत्माच ज्ञान आखा माणहामाय रेणेपोडी. प्रभु आहानीच हि.

⁶ काल्लोबी वातुपोर चिंता केरूह मा; पुण प्रत्येक परिस्थितीमाय धन्यवाद आपील, प्रार्थना एने विनवणी केरीन आपणी मांगणी बोगवान सुमोर केवो.

⁷ तेवी बोगवाना फायरीन मिलविनार शान्ति, जी समजहु पुरलेउखीर हेते, तुमरा हृदय एने तुमरी बुद्धीला मसीह यीशु माय सुरक्षित मेलील.

⁸ हे बायहो, ता वातुपोर लक्ष्य दयाजे सत्य हि, जे मोठा हि, जे योग्य हि, जे पवित्र हि, जे उचित हि, जे श्रिनणीय हि, एने जी जी वातू प्रिय हि, केव्ही काही पुण दिहरा गुण वा काही वाहवा.

⁹ जे तुमूह माफायरीन हिकना हेते, जुळा विते हेते, होमलील हेते केव्ही जे काही केरणू माहु तुमूह देखील, हेते ता वातूनकेरता अभ्यास केरतीन रीवू शान्तिन उगेहे तीजागेन जो बोगवान तुवाहेर्यो हि.

दाणान केरता धन्यवाद

¹⁰ तुमूह मारो निश्चित हाजा केरीन विचार केरीन एता पुण ते देखाणेनकेरिन तुमूह टाइम जुडना नाहं पुण ऐवी सेवट तुमरे माय मार बद्दल पोशा चिंता जागे एनी हि; ज्यासे मी प्रभु माय मी जादा आनंद एनो हि.

¹¹ काही आवश्यक हि केरीन किथी मी नाहं; काहाकाय मी ज्या पुण परिस्थितीम रेणू हि; मी तामायुज संतोष रेणेन सिकाहू लीईल हि.

¹² दैन्यव्यवस्थात रेणे माहु सोमोजनो हि; एने हे पुण मालूम हि कि संपन्नतेत केवी रेणा जुवी कोहली पुण टाइम आवी रेंय एने ओहलो पुण परिस्थिती, जर पेट भूरील रेंय केव्ही बुखल्यू रेंय, जर आहने जुलुम काही आईल केव्ही जर आहने कायीच निह एय मी ज्याह आखान हुकेह रेणेन भेद शिकायो हि.

¹³ जो माहु शेक्ती आपपिह तामाय मी आखा काही केर सकथू.

¹⁴ काही पुण ओहलो तुमूह मारो मेहनतीमाय आथ आपील हाजे भेलाईल हि.

¹⁵ हे फिलीप्पियो, तुमूह तर ठाऊकच हि सुवार्ता पोरचाराच्या पेल्लाठीच, दिहामाय जेवी मी मासेदोनिया सुळील एता, तेवी लेनदेन माय तुमरी कलीसिया सोडीन दिहीरा कलीसियानी मारकेरीन आथ ओगाण किरील नाह एतो.

¹⁶ मी ताहेरया थीस्सलुनी माय एतो, तेवी मारी आवश्यकता पुरो केरणेन केरता तुमूह तच तच माहु मदत मोकलील एता.

¹⁷ इही नाहं कि दानाहा अपेक्षा करने पुण मी तर हे अपेक्षा करने कि तुमरो जमेची खाटलो वोधायेल ओहलो ईच्छा करने.

¹⁸ तुमूह इपफ्रुदितूस च्या आथा केरीन दान मधुर गेंध भेट माय माहफाय मोकलील हि ते एक इही स्वीकार केरणेन कि योग्य बलीदान हि जोहलो बोगवान प्रसन्न एतो ता दानांनी मारो गरजेदेख जुलुम एय गीयो हि माहु पुरो तर्हेने आपील हि ती वस्तु मधुर गेंध रुपान भेटाने हि इही कि ज्या भेटाने, बोगवान आनंद एतो.

¹⁹ एने मार बोगवान आपणा ता धनान होस महिमा सहित मसीह यीशु माय हि, तुमरी हर एक कोमी पुरी केरी

²⁰ आमरा आबुक बोगवानान पिडीन पिडी महिमा एते रेणे जुवी. आमेन.

आखरी नमस्कार

²¹ मसीह यीशुन पवित्र माणहा नमस्कार, मारहे-या जे बाहाक हेते ते तुमूह नमस्कार केरतीन हि.

²² तुमूह आखा माणहा एने विशेष केरीन जा कैसरने परिवारान हेते, तुमूह नमस्कार केतेह.

²³ आपणा प्रभु यीशु मसीहान कृपा तुमरे आत्मा हेऱ्यो रेंय.