फिलेपियो 1 - नाहाली

¹ यीशु मसीहान दास पौलुस एने तीमुथियुस उखेर रीन आखा पवित्र माणहान नावे, जा मसीह यीशु माय स्थिर फिलीप्पियो रेणारा, अध्यक्ष एने दासान मिलिन,

² आमारो आबुक बोगवान एने आपणा प्रभु यीशु मसीहा फायरीन तुमूह कृपा शान्ति जुडती रेय.

पौलुसान प्रार्थना एने धन्यवाद

³ मी जुलबुखे तुमु तुमूह एर केरिणे, करने तेवी तेवी बोगवानान धन्यवाद आपतेन एतो;

⁴ एने जुलबुखे तुमु सोबान करता प्रार्थना करने, कायम आनंद से करने.

⁵ काहाकाय पेल्ला दिहारीन आजवोर सुवार्ता पोरचारामय तुमु मारा सहभागी रेणा हेते.

⁶ माहु ज्याह वातुपोर पुरो विश्वास हि का ज्या बोगवानान तुमरे माय इही जे हाजो कामान सुरुवात केरील हि, ते ता दिहावोर राखीन मेलठोन ताहेरया यीशु मसीहान आवीन ते पुरो केरूह.

⁷ तुमूह आखा मारकेरीन ओहलो विचार हाजो हि, काहाकाय तुमु आखा मारो मोनाम हि, एने केवळ तान टायीमा नाहं का मी बोन्दिखाणामाय एतो पुण तह्लामाय पुण ज्यावेळेस मी सुवार्ता रक्षा केरतीन असतो तुमूह आखा यामे विशेष अधिकारी रुपान मारो कृपाकेरिन भेलाईल एय गीयो हेते.

⁸ बोगवान मारो गवाहीदार हि का मी तुमरे केरता प्रेम मसीह यीशु व्याकुल रेथे असतो.

⁹ मी ज्याच प्रार्थना केरतीन असतो का तुमरो प्रेमान नजरोम एने ज्ञानासे तुमूह वोळतेच जाणे,

¹⁰ हे गुण मेलावीन हाजू-खाराब ज्यामाय अंतर केरीन कायम जे हाजो हि, ते लीईल ज्यानहोस तुमूह पवित्र बोणावनार, ताहेरया यीशु मसीहान आवणे हि;

¹¹ एने ता धार्मिकतान फोला केरीन जो यीशु मसीहान द्वारे एने, भरपूर एते जाऊ जा से बोगवानान महिमा, एने स्तुती एती रेंय.

पौलुसान बोन्दि से सुसमाचारान उन्नती

¹² हे बायहो, मारी ईच्छा हि का तुमूह ज्यो जाण लिवू का मारपुर वितील हि, तासे सुवार्तान वाड एयील हि.

¹³ परिणामी संसारान आखा सुरक्षा दल तोहोलोच दिहरी आखा माणहे यान मालूम एय गीयो का माहु मसीहान अनुयायी हि केरीन बोन्दि बोणावणेन हि;

¹⁴ एने बोगवान माय जोला बाहाक हि, तामायरीन अधिकतर माणहाह माहु बोन्दि जाणे से, धीराने वचन निर्भयतामाय किथी एने.

¹⁵ हे खेरो का तामायरीन काही ठेवोकेरीन वैर्भावाम सुवार्ता किथी हि पुण काही माणहे सद्भावनेने मसीहान सुवार्ता कि ते रेणू.

¹⁶ हे माणहे प्रेमाकेरिन इही केरणू कारण ताह मालूम हि का बोगवानान सुवार्ता वोचाडणे, केरीज माहु न्या मिलना हि.

¹⁷ पुण काही माणहे सत्याने नाहं पुण स्वार्थी स्वभावोवाही, मसीहान पोरचार केरतीन रेणू, कारण ते विचार केरणू का ज्यासे ते बोन्दिखाणामाय ते मारकेरीन मेहनत निर्माण केरूह शकणार.

¹⁸ पुण काय एनो? फरक एता नाहं महत्वान हे हि, का एक ठेगानहोस जर दिहीरा ठेगानहोस तो खेरो संदेश ओहलो, केव्ही वाईट ओहलो तो मसीहान हि एने तान माहु आनंद जुडतो रेय.

जीवतालू रेणू मसीह हि

¹⁹ काहाकाय माहु मालूम तुमरी विनंती प्रार्थना द्वारे, एने यीशु मसीहान आत्मान दाणान द्वारे, तान प्रतिफोल मारो उद्धार हि.

²⁰ मारी हेल्लीच ईच्छा एने आशा हि काय मी कानलीच वातू माय लाजवाव नाय, जीही मारी प्रबल साहसान कारण से मसीहान बढाई मारा शरीरान नाराज एय, नाहं पुण पुरो निर्भयताने मारो आखठापुररीन मसीहान महिमा कायम एता, रेनणेआवे तोहोलोच आवणारा दिहामाय भी एता, रेनणेआवे याम मी जीवहु केव्ही ओगाणरीन.

²¹ काहाकाय मारो जीवनान अर्थ मसीहात जीविल, एने मरील ज्यो लाभ हि.

²² जर मारो ज्याह शरीराम जीवतालू रेहू तर ज्यान अर्थ ज्यू एय का मी आपणो कामान केरता आनंद केरूह पुण माहु होमजाडणे नाहं का मी काय निवडीले.

²³ ज्याह दुयामाय मी पेचात हि यारीन सुळीन जाइन; मसीहा हेरी रेणारे माहु उत्कंठा हि कारण देहा माय रेणे केरीन, हे जुलुम हाजो हि,

²⁴ पुण ज्याह शरीराम रेणे तुमरीकेरता होवटो आवश्यक हि.

²⁵ एने काहाकाय हे मी निश्चित ओलखणे का अध्यात्मिक उन्नत्ती एने विश्वासान निर्माणे एईल आनंदमाय तुवाहेर्यो रेथे;

²⁶ जानकेरता का तुमरेहे-यो पोशा आवता परिणामी स्वरूप माहु यीशु माय स्थिर मारहे-या गर्व केरणेन केरता, एने होवटो आधार आवी.

²⁷ पुण प्रत्येक प्रकारे इही केरू का तुमरो वागणू मसीह सुवार्ताच्या तानकेरीन अनुकूल रिजी ज्यासे जर मी हेर्यो आवीन तुमूह देखहुं, केव्ही जर मी तुमरी हेर्यो सेटो रेयीन, तुमरेबाराम ज्याच होमलूह का तुमूह एक आत्मा माय दृढताने स्थिर एहू, एने सुवर्तान मोदेतसे निर्माणे एईल विश्वासान एक एईल संघर्ष केरीन हि,

²⁸ तोहोलोच उंजू हे पुण होमलूह इच्छितो का तुमूह आपणो विरोधवाला बियीईन नाहं, तुमरो ज्यू विश्वास नाशयेणेन प्रेमान हि एने जोस प्रेमान हि, का तुमरो उद्धार एने बोगवानारीन ओहलाच किरील जाणे.

²⁹ काहाकाय मसीहापायरीन तुमूह ज्यो अनुग्रह केवळ विश्वास केरणेन केरता पुण तान केरता सहन केरणेन केरता विशेष अधिकार आपील हि;

³⁰ तुमूह मालूम हि का तुमूह तामायुज संघर्ष केरणेम, एकटाह हि तामाय मी संघर्ष केरीन हि, जोहलो का तुमूह होमेलनू आजवोर मी किरील हि.