फिलेमोन 1 - नाहाली

अभिवादन

¹ पौलुसा फायरीन जो मसीह बंदीमाय हि, एने बाहाक तीमुथियुस यान उगे आमरा प्रिय मोदत किरील फिलेमोन,

² एने बोणिक आफ्फीया, एने आमरा हेगते सिपायडू आर्खीप्प एने फिलेमोनाच्या गिर कलीसियान नाव:

³ आमारो आबोक बोगवानान एने प्रभु यीशु मसीहा फायरीन कृपा एने शान्ति तुम्हू जुडती रेय.

फिलेमोनान प्रेम एने विश्वास

⁴ मी दाडीन दिह बोगवानानाह धन्यवाद केरते रेणे, एने आपणा प्रार्थनामाय भी तुवाह एर केरते रेणे,

⁵ कारण मी तारो ता प्रेमावजेसे एने विश्वासान विषयी होमलने, जो आखा पवित्र माणहान हेरी एने प्रभु यीशुपुर हि.

⁶ मी प्रार्थना करने का विश्वासामाय मी तारो सहभागिता एय, तुमूह आखा हाजा ओलखीलतेवी, मसीहान सफल एने जुवी.

⁷ काहाकाय हे बाहाक, तारो प्रेमवजेसे माहु जुलुम आनंद एनो एने मारा सांत्वन एय गीयो, तापुररीन पवित्र जोओ जीवाह विश्रांती जुडी हि.

उनेसिमुसान केरता निवेदन

⁸ यानकेरीता यास्तव माहु मसीहात मोठा उचो हि कि ज्या वातू हाजो हि, तान आज्ञा माहु आप.

⁹ तेभी पुण माहु डावाला पौलुसाह जो आत्मा मसीह यीशुकेरीन बंदी हि, हे उंजू पुण होमजाडीन पोडील कि प्रेमाला विनंती केरूह.

¹⁰ मी आपणो सोरा उनेसिमुस केरता, जो मारो फायरीन मारो बंदीमाय जेल्मो लियेल हि, तुवाह विनंती करने.

¹¹ तो तर पेल्ला तारो काही कामा नाह एतो, पुण ऐवी तुवाह एने माहु हि मोठला कामुज हि.

¹² ताहुच म्हणजे जो तारो हृदयाआ टुकडा हि, आत्यो तारो उगे पोशा किरील हि.

¹³ ताह मी आपणो आहने मेलणेन एता कि ते तारो उगे आवो बादइलो जे सुवार्ता मुळे, मारी सेवा केरुहू.

¹⁴ पुण मी तारी इच्छावोगर कायीच केराईल नाहं सोमजीतेवी, कि तारी हे उकार दाबाडनार नाहं पुण आनंद से एय.

¹⁵ कारण काय मालूम तो तारो उगे काही दिहावोर आवो कियील मुळे अलग एनो कि कायम तारो आहने रेहू.

¹⁶ पुण ऐवी तारीन दासाआ सारखो नाहं तर दासा हेर्यो पुण होवटो, म्हणजे बाहाक सारकोस रिजी, जे तर मारो तो विशेष प्रिय हि पुण ऐवी शरीराम एने प्रभु माय पुण, तारो पुण विशेष प्रिय ओहलो.

¹⁷ सेवट: जर तू माहु आपणो भागीदार होमजनेस, तर ताह आवो प्रकारे ग्रहण केर जीही माहु.

¹⁸ जर तान तुवाह काही नुकसान किरील हि, केवी त्याही काही आपणे रेंय, तर मारो नावापुर लेखीन ले.

¹⁹ मी पौलुस आपणो आताकेरिन लेखथूह कि मी फेडीत आपण्यू; एने ज्याह केणेन काही गिरीज नाहं कि मारो कर्ज जो तारपोर हि ते तूच हि.

²⁰ हे बाहाक, हे आनंद माहु प्रभु माय तारो फायरीन जुडी. मसीही माय मारो जीवाह निलो हेलो केरीन आप.

²¹ मी तारो आज्ञाकारी लेणेन भरसा केरीन तुवाह लेखथूह, एने हे होमजथी कि जे काही मी किथे, तू ज्ञान पेक्षा काही होवटो केरुहू.

²² एने हे पुण कि मारो केरता दाबिल केरता जागो तियार मेलील. माहु आशा हि कि तारो प्रार्थनावाही तुवाह आपील जाहू.

आखरी अभिवादन

²³ इपफ्रास, तो मसीह यीशु हेरी बंदीम हि,

²⁴ एने मरकुस एने अरिस्तर्खुस देमास एने लूका जे मारा मोदतकेरने हि, न्या मारो नमस्कार.

²⁵ आपणा प्रभु यीशु मसीहान कृपा तुमरे आत्मापुर रेंय. आमेन.