मरकुस 9 - नाहाली

¹ तो ताह कियील, “मी तुमु खेरो किथु का तो न्या उब्रिन हेते, तायमाईल कुणईहव हेते का जाह ताहवोर बोगवानान राज्यम सामर्थ्य हेरी आवो हि, ज्यो देख नाह लेते, तो ताहवोर र मोरने होवाद, केदव मेदव नाह चाखणार.”

यीशुन वेह बोदलणो

² सहा दिह उवतू तो यीशु ने पतरस एने याकूब एने यूहन्ना न्या हेरी जाईल, एने एकांतात कायताहा एक बोयडापोर लेईन जाइता तान ओगांण तान रूप बोदलावा गीया,

³ एने तान फाडकान चमकेन लागिल कि इत ताहवोर उजालो आवा, कि पृथ्वीपोर एखादु थोबव पुण इही उज्वल नाहं केरनेशकत.

⁴ तो ताह मुसा हेरी एलिया हेरी देखानो; ता यीशु हेऱ्या वाटू करता ला.

⁵ उवतू तो केरता पतरसने यीशुला कियील, “हे गुरुजी, आमरा न्या रेणे हाजो हि: तान केरता आमु तान मंडप बणाव वहू; एक तारो केरता, एक मुसा केरता एने एक एलिया केरता.”

⁶ कारण कि तो नाहं होमजाडणे एतो कि काय उत्तर आपुह, जानकेरता कि तो बियव गीया एता.

⁷ तेवी एक वादलापोर ताह घेरले, एने ता वाद्लामरीन हा शब्द निकलील, “हा मारो प्रिय सोरो हि, तान होबंलो.”

⁸ तेवी तास एक चारू बाजूमाय दुष्टव केरील, एने यीशुह सोडीन आपणो हेरी एने कूण हुच देखायील नाहं.

⁹ डोंगराव रून उतरतालान तान ताह आज्ञा केरील कि जो ताहवोर माणहान सोरो मरणा मायरीन जव एने ताला एय जो तावोरतु मूह जो कांही देखायील रेंय तो कूण हुच केणेन नाहं.

¹⁰ तास आवी खुबेर एर मिलव ल; एने तुमु आपसामाय वाद विवाद केरणे लागिल, “मोरेलताहा मायरीन जव एने ताला उठाडणेन काय आर्ध हि?”

¹¹ एने ताह फुसील, “शास्त्री का केणु कि एलियान पेल्ला आवणो गर्जेन हि?”

¹² तान ताह उत्तर आपील, “एलिया खेरिनच पेल्ला आवीन आखा कांही हुदारिन पुण माणहान सोरोन विषय माय हे का लिखील हि तो जादा दुख विसी, एने मारील जाय?

¹³ पुण मी तुमूह किथु, कि एलिया तर आवा हि, एने जोहलो तान विषयव लिखील हि, ताह जो जुवी कायतान हेरी किरील.”

दुष्ट आत्मा से छुटकारो

¹⁴ एने जेवी तो चेला हेर्यो आव पोचव ल, तेवी तो देखायील का तान चारू वोर मोटलव भव ड लागिल ज्यां एने शास्त्री ताहेऱ्या वाद विवाद केरताला,

¹⁵ ताह देखताज आखा जुलुम आश्चर्य केरणे लागिल, एने तान वूखर धोव डव आवीन ताह नमस्कार केरील.

¹⁶ तान ताह फुसील, “तुमूह ज्याहेर्यो काय वाद विवाद केरतीन हि?”

¹⁷ गेर्दव मायरीन एकजाण उत्तर आपील, “हे गुरु, मी आपणो सोराह, याम मुको आत्मा रीन गील हि, तारो उगे लावील एता.

¹⁸ जाहरिन का तान ताह देरतव, न्याच आसटव आपणे: एने तो मुयांमाय फेस लावथू एने दात देलणे लागणे एने हुकव जाथूमव तारो चेला कियील कि तो ताह काड टाकतव ह, पुण तो काडूह शकले नाहं.”

¹⁹ हे कोलाक तान ताह उत्तर आपिन कियील, “हे अविश्वासी एने माणहे, कि केध्दव ताहवोर तारो हेरी रेंय? ताह माहुफाय लाव वो.”

²⁰ तेवी ते ताह ताफाय लेईन आवो: एने तान ताह देखायील, तर ता दुष्ट आत्मा माय लागीच ताह पिल्लीन टाकील ल; एने तो जोमनि पोर पोडव ल, एने मुया मायरीन फेस गेलतालोन निकलीन गीयो.

²¹ तान तान आबाकने फुसील, “ज्यान हि आलतालो केध्दव तारीन हि?” तान कियील, “आत्या पनाफायरिन न.

²² तान ज्याह नष्ट केरणेन केरता ज्याह पेलूस आगठामाय तर केध्दव पाण्यामाय पुडील; पुण केध्दव कांही केरनेशकेल, तर आमऱ्येरेपूर दया केरीन उपकार केर.”

²³ यीशु ने ताहा कियील; केध्दव तू केरनेशकतोस? हि काय वात हि! एने विश्वास केरणेन केरता आखा कांही एहू शकत.

²⁴ सोरान आबाहाकने चालूच एने विनंती केरीन कियील, “हे प्रभु मी एने विश्वास अविश्वासान उपाय केर.”

²⁵ ताहेरया यीशु ने देखायील कि माणहे धोव डव आवीन गेर्दव केरतीन हि, तर तान अशुद्ध आत्माह हे केयेल बियाडव “हे मुका बेहेरू आत्मा मी तुवाह आज्ञा आपथु, तान मायरीन निकलीन जाव तामाय केधीच प्रवेश केरनेमां.”

²⁶ तेवी तो आयडीन एने ताह जादा पिल्लीन निकलीन गीयो; एने मारीन लानहोस सारखो एनो, आवी ताहावोर कि जादा माणहे केणेंन कि तो मोर गीयो.

²⁷ पुण यीशु ने तान आथ देराव एने ताह उठाडील ल, एने तो उबरीनरेयव गीयो.

²⁸ 28 ताहेरया तो घेराम आवा, तर तान चेला एकांतात ताह फुसील, “आमु ताह का काड शकून नाहं?”

²⁹ तो ताह कियील, “हि जात बिना प्रार्थनायाने कायताहा उंजू उपास नाहं निकलीन जात.”

यीशुन आपणी मोत ने विषय माय पोशो केणो

³⁰ उवतू ता ते तारीन निकलीन गीया, एने गलील लामायारिन चालना एतो तास ईच्छा नाहांऐतव कोणव ज्यां मालूम एय,

³¹ काहा तो आपणो चेला संदेश आपथु एने ताह किथी एतो, “माणहान सोरो, माणहान आथा केरीन देराव एनेगीयो, एने तो ताह मारीन टाकील ल; एने तो मोरणारान तान दिहा बादमाय उटाळवगीयो.”

³² पुण जव वात तान लंक्षाम नाह आवी, एने तो ताह फुसणे केरता बियव जाईल एता.

आखा से मोठो कूण?

³³ ओवता ता ते कफर्णहुम माय आवील; एने घेराम आवीन ताह फुसव ल, “वाटेमायबव तुमूह कायताहा वातुपोर वाद विवाद केरता एता?”

³⁴ तू ठावको रेणा, काहाकाय वाटव तास आपसामाय हे वाद विवाद केरता एता कि आमरा पेक्षा मोठू कूण हि.

³⁵ तेवी तान बोहव बारांजाणाह हादवएने ताह कियील, “केध्दव कूण मोठू वदिखेह, तो आखान आत्यो एने आखान दास बोणव.”

³⁶ एने तो एक सोराह लेईन तान माय उबरीनकेरीन आपील एने ताह खोलाम लेईन ताह कियील,

³⁷ “जो कूण मारो नावानओला सेरामायरीन कूण भव एक सोराह ग्रहण कोरथू, तो मान्हा ग्रहण कोरथू; एने जो कूण मान्हा ग्रहण करने तो मान्हा नाहं, पुण मान्हा मोकेलनाराह ग्रहण कोरथू.”

जो विरोधाम नाह तो पक्षमाय

³⁸ तेवी यूहन्ना ताह कियील, “हे गुरु, आमु एक माणहाह तारो नावामाय दुष्ट आत्माह काडतालु देखायील एने आमु ताह मना केरणे लागा काहाकाय तो आमरे पासाण नाह आवतालू.”

³⁹ यीशु कियील ताह नाह इही केहू मा काहाकाय जो मारा नावान सामर्थ्यान काम केरीन चालूच मारी निंदा केर सेकव ओहलो कूण नाह.

⁴⁰ यीशु कियील, “ताह मना केरू मा; काहाकाय ओहलो कुनुस नाहं जो मार नावामाय सामर्थ्यान काम केरणे, एने लगेस मारो खारब नाह केर सकेत.

⁴¹ जो कूण तुमूह एक वाटकु पाणी ज्यान केरीन पिवाडी का तुमु यीशु मसीहान हेते ते मी तुमूह मी हाचीस केथु का ताह आपणो फोल काल्ली भी कारण से मा गोमाडू.”

यीशुन परिक्षाम विषय माय चेतावणी

⁴² जो कूण आवी आत्या मायरीन मारपुर एने विश्वास केरणू, कोणुभव जेठ पासाण तर तान केरता ज्याच भल हि कि एक मोठला चेकिन पूड तान गेलाम लटकाळव जाऊ एने ताह समुद्रा माय टाकील जाणे.

⁴³ जर तारो आथ तुवाह ठोकर खावाडी ते ताह काटीन पांग्लो एय एने जीवन एने नामाय प्रवेश तार केरता हाजो हि ज्यां का दुय आथ एय एने नरकान आकठाम टाकाय जाय जव केधीच च ओलाय नाहं.

⁴⁴ जाह तान किडू नाह मोरने एने आकठो नाह बुजणे.

⁴⁵ केध्दव तारो पाय तुवाह जेठ पोचाडव तर ताह काड टाकलगडा एय जीवन एने नामाय प्रवेश केर तारो केरता न्यापेशा भल हि कि दुय पाय असून नरकात टाकीलजातव माय.

⁴⁶ जाह तान किडू नाह मोरने एने आकठो नाह बुजणे.

⁴⁷ जर तारो डोलो तुवाह ठोकर खावाडी ते ताह काड टाक देव आंधलो एय एने बोगवानान राज्य माय प्रनेश केरणेन तुवाह ज्योच हाजो न्यापेशा भल हि का दुय डोला असून तू नरकामाय टाकाय जाती.

⁴⁸ जाहारिन तान किडू मारीन त नाहं एने आग्ठो ओलाय नाय.

⁴⁹ काहाकाय हर एक जाणान परिक्षा आग्ठा केरीन एय.

⁵⁰ मीठ हाजो हि, पुण जेर मीठान होवाद बिगडी जाय ते तो, तान कायता केरीन मीठान चोव लावता आवी आपनेमाय मीठ मेलू, एने आपसामाय मिलिन बेलाइन रेवू.