मरकुस 14 - नाहाली

यीशुन विरुद्ध चाल

¹ दुय दिह ज्यां उवतू तो एने फसह एने अखमीरी रोटान तिवार आवुहु होता मुख्य याजक एने शास्त्री आज्यो गोष्टव होदणेमाय एता का यीशुह केहि एने देराव एने मारणेन;

² पुण मुख्य याजक एने शास्त्री केताला, “पूर्व ने दिह नाहं, ओहलो नाहं होव वो कि माणहान माय गडबड एय.”

यीशु पोर एक बायकू द्वारा मोगालो ईत्र टाकणो

³ जेवी तो बैथानी गाव एने न्या शिमोन कुष्ठरोगान घेराम खाणेन बोह्ना एता, तेवी एक बायकू अलाबास्त्रन कुपत जटामांसन जुलुम मौल्यवान सुगंधव एने शुद्ध तेल लेईन आवी; एने कुपव फोडन तान मुंडपोर टाकील.

⁴ पुण कूण कूण आपणो मोनाम चडफडून कियेल, “ज्यो सुगंध तेलान का नाश केरील गीया?

⁵ काहाकाय हे सुगंध तेल तीन होव दीनार पेक्षा होवटो रुप्यामाई पाकील गारीबांह रुपये आपुह शकताला.” एने ते तापोर कुरकुर केरणे लागिल.

⁶ यीशु कियील, “तीह सोडीन द्या; तीह का त्रास आपतेन हि? ती तर मारकेरीन हाजो केरील हि.

⁷ गौरगेरिब तुमरो हेरी कायम रेतेह, एने तुमूह जर लागणे रेंय तर तान हेरी हजो केरणे केरसेक्तालू; पुण मी तुमरो हेरी दाडवन नाहं रेहू.

⁸ जे कांही तान केरणे शकलव, तान केरील; तिने मारो उत्तरकार्या केरता पेल्ला तारीन मारो शरीर सुगंधव ईत्र लागाडील.

⁹ मी तुमूह खेरीच केथु, किथे, आखा जगाम जाहारी कां हा सुवार्ता पोरचार आपणे माय आवी, ताहारी आवो बोहीही कामान वर्णन पुण इआवीह केरणेम आवी.”

यहूदा द्वारा धोको देणो

¹⁰ यहूदा इस्कर्योत एने विश्वास घात केरनाम एक इतू मुख्य याजका आहने गीयो कि तो तान आथ देराव दिईल.

¹¹ ता ज्यो होमलीन आंनदित एना, ताह पोयशा आपणेन वायदो केऱ्या, एने ज्यो टायम होदणे लागो का ताह किहिक देराव देय.

आखरी भोज

¹² अखमीरी रोटान तीवारान पेल्ला दिह, ज्यामाय ते एने ल्हांळाह होस बलीदान केरताला, तान चेला ताह फुसील, “तू काय जानह कि आमु जाइन तारो केरता एने फसहान तियारिन केरणे?”

¹³ तान आपणा चेला मायरीन दुईजानाह हे केयेल मोकलील ल, “यरूशलेम नगरात जा, एने एक माणुह पाण्यान बांधड एने विसीन तुमूह जुडव, तान पासाण चालू.

¹⁴ एने तो ज्या घेरामाय जाहू, ता घेराम घेर धन्याहा केव वो, गुरु किथे कि मारी उतरनेल ज्यामाय मी आपणो चेला हेरी एने फसह खाण्यू कियील हि?

¹⁵ तो तुमूह एक होबाडव एने तियार केरील मोटलव का जाईल माडव देखाडव आपण्यू, ताहारिन आमरा केरता तियारिन केरू.”

¹⁶ तेवी ता दुय चेला निकलीन नगरात आवो, एने जोहलो तो ताह कियेल एता, ता प्रमाणे देखाईल; एने फसह तियार केरील.

¹⁷ उवतू तो हांजपोर एनी, तर तो बाराजाणान हेरी आवा.

¹⁸ ताहेरया ते बोहन भोजन केरतीन एता, तर यीशु कियील, “मी तुमूह खेरिन खेरिनच किथे कि तुमरो मायरीन एक, तो मारो हेरी भोजन केरतीन एतो, माहु देरीन आपण्यू.”

¹⁹ चेला निराश एय गीयो एने ते एक-एक केरीन ताह केहू लागिल, “काय तो मी हि”

²⁰ तास ताह कियील, “तो बारांजाण मायरीन एक हि, जो मारो हेरी तेल एने माय आथ टाकणे.”

²¹ काहाकाय माणहान सोरो तर, जव ज्यां तान विषयव लिखील हि, जाथू; पुण ता माणहापूर हाय ज्यान मुळे माणहान सोरो देराव ना.

चेला हेरी प्रभु भोज

²² ताहेरया ते खातालूच एता, तास रूटू लव जाईल, एने आशीर्वाद फाचन मुळनु, एने ताह आपील, एने कियील, “लव हे मारा शरीर हि.”

²³ ओवतो तो प्याला लेईन ईशोपकारस्मरण किरील, एने ताह आपील; एने ता आखान तामायरीन पियव.

²⁴ एने तो ताह कियील, “हा वाचान रक्त हि, तो आखान केरता ओंतिले जाथू.

²⁵ मी तुमूह खेरिन खेरिनच किथे कि अंगूर रूह ता दिहावोर पोशा केध्दह नाहं पिनार, जेवी पुर बोगवानान राज्यातम मी नोवालो पिहु.”

²⁶ उवतू ता स्तोत्र गाव एने बाहेर जैतुनान डोंगरापोर गीया.

पतरसान नाकारणेन भविष्यवाणी

²⁷ तेवी यीशु ताह कियील, “तुमूह आखा ठोकर खाहू, काहाकाय लिखील हि: मी होबालनेन मारील, एने मेंढरे दाणा दाणा घोणार.

²⁸ पुण मी जवतालू एह तेवी मी तुमरे पेल गलील लामाय जाह.”

²⁹ पतरस ताह कियील, जर आखा ठोकर खाय ते खाय “पुण मी ठोकर नाय खाव.”

³⁰ यीशु ताह कियील, “मी तुवाह खेरिज किथु का आजुच रातव कुकडाह दुय वारीन आवेडणे पोयले, तू माहु तान वारीन नाकारहव.”

³¹ पुण तो उजू जोरेस बोलनू, “जर माहु तारे हेर्यो मोरने भी पोडव तेवी भी, तेभी मी तारो नाकार केधीच नाहं केरू.” इही आखा भी कियील.

गतसमनी माय यीशुन प्रार्थना

³² उवताता ते गतसमनी नावान जागापोर आवो, एने तो आपणा चेलाह कियील, “न्या बोह रीन वू, ता वूर मी प्रार्थना केरथू.

³³ एने तो पतरस एने याकूब एने यूहन्ना न्या आपणो हेरी लेईन गीयो, एने जादा भोगलाईन अस्वस्थ एहू लागिल”

³⁴ एने ताह कियील, “मारो मोन जुलुम दुखव हि, याउर कि मी मोरणेपोर हि: तुमूह न्या उबरीन वू, एने जागता रीवू वू.”

³⁵ उवतू ता तो थोडोक ओगांण गीयो एने जोमनि पोर पोडव प्रार्थना केरणे लागिल कि जर एता रेंय तर हि टाइम मारेहरिन काळव आप,

³⁶ एने कियील, “हे अब्बा, हे आबुक, तुवाह आखा कांही एहू शकते; आज्यो प्यालाला माफायरीन काड टाक: तेभी पुण माहु लागीह ताहोलो नाहं, पुण जे तुवाह लागीह ताहोलो होव वो.”

³⁷ उवतू ता तो आवा एने ताह हूवताला देख पतरसाला कियील, “हे शिमोन, तू हुविह हि? काय तू घटकाभरहव जागनो नाहं?

³⁸ जागा रेवू एने प्रार्थना केरतीन रीन वू का तुमूह परिक्षाम पोडनू नाय केरीन आत्मा तियार हि, पुण डील अश्यक्त हि.”

³⁹ एने तो पोशा चालन्यू गीयो एने ता शब्दाम प्रार्थना केरील.

⁴⁰ पोशा आवीन ताह हुवातालून देखील, काहाकाय तान डोला निंदिमाय एती; एने मालूम एता कि ताह काय उत्तर आपणे.

⁴¹ उवतू तो तिसऱ्या टायव मा आवीन तास कियील, “ऐव एने हुविह रीन वू एने थाकमुळने लव, पुरोज एय गीयो घडका आवी हि; देखू माणहान सोरो पापव माणहान आथे देरीन आपाय जाय.

⁴² उठू, चालू! एने देखू, माहु देरीन आपणार आहने आवील ज्यां”

गतसमनी माय यीशुह धोको से देरावणो

⁴³ तो हे केतूच एतो, कि यहूदा जो बाराजाणान मारीन एक एतो, आपणो हेरी मुख्य याजक एने शास्त्री एने डाय डाया न्या फायरीन एक मोटलव गेर्दव लेईन जेल्दव आवीन पोचना, ते तलवारे एने डेंगा विसवएता.

⁴⁴ ताह देरीन आपणारा ताह हे खुन केयेल आपील एता कि ज्याह मी चुंबन लेहु तोच तो हि, ताह देरीन होमालावा लेईन जा.

⁴⁵ तो आवा एने जेल्दव तान आहने आवीन कियील, हे गुरु! एने ताह जुलुम चुंबने लव जाईल.

⁴⁶ तेवी तास तान आथ टाकील ताह देरीन लव जाईल.

⁴⁷ तामायरीन जो आहने उबरीन येल एतो, एक जाणान तलवार सांडाळव महायाजक दासापुर चालाडव ल, एने तान कान काट दियेल.

⁴⁸ यीशु ताह कियील, “काय तुमूह लुटारू होमजाडव माहु देरणे केरता तलवार एने डेंगा लेईन निकेलनाह?

⁴⁹ मी ते प्रत्येक दिह मंदिरामाय तुमरे हेरी रेयन शिक्षण आपतालु, उवतू तो तेवी तुमूह माहु नाहं देरीन ल: पुण ज्यो ज्यान केरील ता एय गीयो का पवित्र शास्त्रन शब्द पुरो एय.”

⁵⁰ ज्यापरीन आखा चेला ताह सोडीन नाहव गीया.

⁵¹ एक जुवान आपणो उघड्या डव लापूर फाडका पाघरीन तान पासाण चालतो एता; एने मांणहे ताह धव रीन.

⁵² पुण तो फाडका टाकील उगाडलोच दोवळ पोळल.

यीशु महासभान सामने

⁵³ बादमाय तास यीशुह महायाजकाफाय लेईन गीया; एने आखा मुख्य याजक एने शास्त्री एने डाय डाया एखठाच जोमना.

⁵⁴ पतरस सेटेवाला सेटो तान पासाण पासाण महायाजकान आंगणामाय वोर गीया, एने कामदारा हेर्यो बोहव आगठो आहने हेकातेन बोहवल.

⁵⁵ मुख्य याजक एने आखा न्यायसभा यीशुह मारीन टाकणे केरता तान एने मोकताज ठेगणे केरता गवाहीव दारान होदामाय एता, पुण ताह नाहं जुडना.

⁵⁶ पाच काहा का जादा जन तान विरूधाम हि खोटव सांक्ष आपतेन एता, पुण तान सांक्ष एक सारखव नाह एती.

⁵⁷ तेवी कांही माणहान उठीन तान विरूधाम हि खोटव सांक्ष आपील एती,

⁵⁸ “आमु ताह हे केतालून होमलील हि, मी आज्यो आथान तियार केरील मंदिराह पाडन, एने तीन दिह उवतू तो दिहरा बोणावनार, जो आथा बोणव नाहं.”

⁵⁹ ज्यापुररीन पुण तान सांक्ष एकाफायरिन पुण निकलील नाहं.

⁶⁰ तेवी महायाजकान मध्यभागव उबरीन येल रेयव यीशुह फुसील, “तू उत्तर नाह आपीत काय नाहा ज्या माणहे तार विरुद्धामाय काय गवाही आपतेह.”

⁶¹ पुण ते उद्डूच रेणू, एने काहीच उत्तर नाहं आपील महायाजकान ताह पोशा फुसील, “काय तू ता परमधन्य सोरो मसीह हि?”

⁶² यीशु कियील, “मी हि: एने तुमूह माणहान सोरो सर्व सामर्थ्यने जेव डव उगे बोह्ना, एने आकाशात मेघां सहा हेरी आव तालून देखणार.”

⁶³ तेवी महायाजक आपणा फाडका फाडव कियील, “ऐव एने आमूह गवाही सांक्षिदारान उंजू काय गिरज ज्यां?

⁶⁴ तुमूह जव निंदा होम्ल्या तुमूह काय लागीह?” ता आखा कियील का ज्यो मरण दण्डास योग्य हि.

⁶⁵ तेवी कूण ते तापोर थुपताला, एने कूण ते तान मूय दाबव एने ताह दुमा केरीन देताला, एने ताह केणे लागिल का “भविष्यवाणी किर” एने शिपायी ताह देरीन थापडा केरीन देईल.

पतरसान यीशुह नाकारणू एने रेडनु

⁶⁶ जेवी पतरस बुंदे खोलव माय एतो, तर महायाजकान दासव मायरीन एक ताहारिन आवी,

⁶⁷ एने पतरसाला ओगांण शेक लेतालून देखव ताफाय एक होस देखील एने केवाय लागिल, “तू पुण तर ता नासरी यीशुहाती एतो.”

⁶⁸ तान नाकारीन ल, एने कियील, “मी नाहं ओळखतेह एने नाहं होमजाडणे कि तू काय किथी हि” उवतू तो तो बाहेर बोगवानान डव पुर गीयो; एने कुकडो वाहनो.

⁶⁹ तान दासव ताह देखव केयेल ज्यो आहने उबरीन जाईल केयेल का ज्यो तामाय वालो एक ज्यां, एने पोशो केणे लागिल का, “ज्यो तामरिन एक हि.”

⁷⁰ पुण तो पोशा नकार केरील थोडच वेळानबादमाय तास जा आहने उबरीन येल एता पोशा पतरसाह केणे लागिल, “खेरिन खेरिनच तू तामरिन एक हि; काहाकाय तू गलीलभी हि.”

⁷¹ तेवी तो नाहा केरीन शपथ खाणे लागिल, का “मी ता माणहाह, जान तुमूह चर्चा करतेह, नाहं ओलखव.”

⁷² चालूच दिहरो टाइम कुकडो वाहनो पतरसाह तान वात जव यीशु ताह कियील एती तान इर आविह आवी, “कुकडा दुय वारीन आयेडने पेल तू माहु तीनन वारीन मारो नकार केरही” तो आखव वातून विचार केरीन रेडने लागिल.