मरकुस 13 - नाहाली

मन्दिरान नाशने भविष्यवाणी

¹ जेवी तो मन्दिरा मायरीन बाहेर निकलीन एतो, तेवी तान चेला मायरीन एक जन ताह कियील, “हे गुरु, देखू केव, एने मोठो दिगुड एने कोहलो मोठो मंदिर हि”

² एने यीशु ने ताह कियील, “तुमूह आज्यो मोठला मंदिराह देखताला: एक दिगुड पुण सुटणार नाहं जो पोडवजाहू नाहं.”

आखरी दिहान चिन्ह

³ जेवी तो मन्दिरान ओगांण जैतुनान डोंगरापोर बोहील एतो तेवी पतरस याकूब यूहन्ना एने आंद्रिया ने एखालामाय ताह फुसील,

⁴ “आमूह केवो का ज्याह वातू केव एने एय? हि ताहेरया ज्याह आखा वातू पुरो एय रेंय तर ज्यान नीशाणव काय रेहू”

⁵ एने यीशु ताह केहू लागिल, होमंबालावा रीन वू, कूण तुमूह ठेगहू नाहा.

⁶ कोलाक मारो नावान ते किथी आवूह “मी तोच हि” एने ते कोल्लाकाह थेगणार.

⁷ जेवी तुमूह लेळाय विषय होमलहु, केवहव बातम्या होमबोलणार तर, बिऊ मा: ज्याह वातून एने आवश्यक हि, तेभी पुण ता समयव अंत एय.

⁸ काहाकाय जाती पुर जाती, एने राज्या पुर राज्य चेढाय केरी. एने हर एक जागी भूकंप एय, एने काल पोडती. जो ते पिडान सुरुवात एय जायेल हि.

⁹ “पुण तुमूह होमंबालीन रीवू; काहाकाय माणुह तुमूह सभा मायवोर लावा जाहू, आराधनालय माय चापका मारणार, तुमूह मारी य वजेसे अधिकाऱ्यांन एने राजान ओगांण गवाही आपणे केरता, उबरीन येल रेहू.

¹⁰ पुण ऐवी आवश्यक हि का पेल आख्यू जात्यूमाय सुवार्ता पोरचार केरनेमाय आवी.

¹¹ जेवी ता तुमूह लेणे जाइन होप दियील तेवी पेलरीन चिंता केरुहू मा का आमु काय केहू पुण जो कायता समय पोर केवाय जाय तोच केज्यू काहाकाय बोलणार तुमूह नाहं पुण पवित्र आत्मा हि.

¹² बाहाक बायाकुच एने आबुक सोराच मारणे केरता देरीन आपण्यू एने सोरा आपणो आहाक आबाकने विरोधामाय उबरीन येल रेयव ताह मारीन टाकणे.

¹³ एने मारो नावाव जेसे आखा तुमरो द्वेष केरुहू पुण जो शेवेट ताहवोर देरीन रेंय ताणुच उद्धार एय.”

मोठला दुखान समय

¹⁴ पुण जेवी तुमूह “उजाडणार अशुद्ध वस्तूह जाहरी नाय जुवी ताहरी, नाय जुवी तां उबरीईल देखहु वाचणार सोम्जी लेय तेवी जो यहूदियामाय एय तां बोयडा उखेर नाह जाणे जुवी”

¹⁵ एने जो घेरान छत्तापुर हि, तो तास रेणें जुवी बुंदे उतरणु नाहा कांही लेणेन घेराम सुद्द जाय नाय.

¹⁶ एने जो खेताम रेंय तो, आपणा फाडका लेणेन पासाण मा हिर केहू.

¹⁷ पुण तान हाय! हाय! ओहलो जो ता दिहामाय पेटावालव रेहू एने जो सोराह दुध पिवाडनार.

¹⁸ प्रार्थना केरू का जो हियालामाय एहू नाहा.

¹⁹ काहाकाय ता दिहामाय ओहलो दुख आवी का, ज्यो बोगवान पृथ्वी बोणाविल तेविरीन ऐवी वोर नाह एनो, एने नाह केवी एय.

²⁰ जर बोगवानन ता दिहान थोडो किरील नसतू तर काल्लोज माणुह वोचवनसतू पुण ता ठेरावीलतामाय ताह तान निवाडील हि तान केरता हे दिह थोडो किरील हि.

²¹ तेवी जर कूण तुमूह केनार, देखू, मसीह न्या हि केवहव देखू तो ताहरी हि तर एने विश्वास केरणे मा.

²² काहाकाय जुठा मसीह एने जुठा भविष्यवक्ता उठीन उबरीन येल रेहू एने जर शक्य एय गीयो तर जे ठेरावील हि ताह पुण ठेगहू केरसेक्तालू एने ताह आश्चर्य काम एने चिन्हे देखाडणार. काय निवाडीलाह भी भोटकाड देय.

²³ पुण होमंबालावा रेणेन, देखू मी पेलूच तुमूह केयेल आपील हि.

यीशुन पोशो आवणो

²⁴ पुण ता दिहामाय ता दुखांमायबव, सूर्य काळ एय जाहू एने चांद आपणो उजालो आपण्यू नाहं.

²⁵ एने आकाशा मायरीन तारा तूटठव रेहू एने आकाशान शक्ती आलविल जाहू.

²⁶ तेवी माणुह माणहान सोराह मोठला सामर्थ्य एने महिमा माय आकाशामाय आव तालून देखणार.

²⁷ ता टाईमपोर तो आपणा स्वर्गदूतांह मोकलीन, पृथ्वीन टूकेरीन आकाशान ता टोकापूर वोर चारू बाजुरीन आपणा निवाडील माणहाहा एक्ठा केरी.

अंजीरान झाडान वार्ता

²⁸ अंजीरान झाडापोरीन ज्यो वार्ता हिकू ताहेरया तान डाल कोमलाएईन तेह एने तामाय पानटा फूटनेण लागणू तेवी तुमूह सेमजव लेनो का होमलव आहने आवा हि.

²⁹ ज्यानहोस तुमूह पुण ज्याह वातू एतालोन देखूह तर होमजाडव लेणेन का तो दिह आहने आवा हि नापून बांणेच तो आवा हि.

³⁰ मी तुमूह खेरिनच किथे का, जेवी पुर ज्याह आखा वातू पुरो एता नाहं ताहउर ज्यां पिढव नष्ट एय नाहं.

³¹ आकाश एने पृथ्वी एने नाहव शव एईन जाहू पुण मारा वचन रद्द एय नाहं.

जागता रेवो

³² “तो दिह ता समयान विषयामाय कुणीह नाह मालूम, नाह ते स्वर्गदूता नाह ते सोराह” पुण फक्त पिताह मालूम हि.

³³ होमंबालावा एईन जा, जागता रीवू वू एने प्रार्थना केरू काहाकाय तुमूह मालूम नाहं का तो ठरावील टाइम केव एने आवूह.

³⁴ हे आज्यो माणहान होस हि जो आपणा घेर सोडीन प्रिनासाम गीयो आपणो दासाह अधिकार आपील तान आखा आप आपणा काम कियील एने दरिनाजान रक्षकाह पुण जागे रेनेस कियील.

³⁵ ज्यानकेरता जागता रेवू, कारण तुमूह मालूम नाहं तुमरो घेर मालिक जर आवूह हि हांजपोर, रातव, कुकडो आव र्नाराण टाइम केवहव हेकाले.

³⁶ केध्दव इही वमां का उचकाहूस तो आवीन जाहू एने तुमूह हूवताला देखणार.

³⁷ एने जे मी तुमूह किथे तोज आखाहुच किथे, “जागे रेवू.”