मरकुस 10 - नाहाली

तलाकान विषय माय हिक

¹ तो तारीन उठीन यार्दिन नदीन पुरले उखेर यहूदा प्रांतात आवो, वगर्दी तान आहने पोशी एय गीयी, एने तो आपणो पोशो ताहा हिकाडणे लागो कायम गेत.

² तेवी कांही फरीसी तान पारखणे तान आहने आवो एने ताह फुसणे लागिल का, “काय माणहान केरीन आपणो बायकू सोडीन योग्य हि?”

³ तो ताह कियील, “मुसान तुमूह काय हुकुम आपील हि?”

⁴ ता कियील, “मुसा माणहाह हुकुम आपील हि का तो सुटपत्र लेखन बायकू सोड्नेन.”

⁵ पुण यीशु ने ताह कियील, “तो ज्यां आज्ञा तुमरो मोनान कोठोरता वजेसेकेयील एतो.”

⁶ पुण केलीन सुरुवातव रेन बोगवान ताह बायकू एने माणहे बोणावली हि.

⁷ तामुळे माणुह आपणो आहाक आबाक सोडीन आपण्यू बायकू हेरी रेय.

⁸ एने ता दुय जाणे एक शरीर बोणीन रेती, तान्केरता ता दुय जाणा नाह पुण ऐवी एक शरीर हेते,

⁹ तावजेसे ज्याह बोगवान जुडवहि ताह कूण माणुह आलेग केरुहू नाहं.

¹⁰ एने चेला घेराम आवीन आवीजा विषयी ताह उंजू फुसणेन लागा.

¹¹ तास ताह कियील “जो कूण आपणी बायकू सोडीन दिहरा बायकू हेर्यो वाराड केरीह तर तो तान पेलली बायकून विरुद्ध व्यभिचार केरणे.

¹² एने बायकू भी आपणो एदम्याह सुटपत्र आपील दिहरा माणहा हेरी वाराड किरीह, व्यभिचार केरीह.”

सोराह आशीर्वाद

¹³ ओवता माणेहे सोराह तान आहने लावा लागा, कि तो तापोर आथ मेली, पुण चेला ताहा जुल्या.

¹⁴ यीशु ने ताह देखन, तेवी क्रोधाने ताह कियील, सोराह बोगवानान आवणे दिवू, काहाकाय स्वर्गान राज्य ओहलाचने हि.

¹⁵ “मी तुमूह खेरिनच किथु जो कूण बोगवानान राज्याम आत्या सोरान होस ग्रहण केरी नाहं तर तो तामाय केधीच प्रवेश नाय केर साकी.”

¹⁶ तेवी तो सोराह आपणा खोलामाय विसीन आहने केर्यो. एने तो आपणो आथ तां पोर मेलीन ताह आशीर्वाद आपील.

मालदार जुवान एने अनंत जीवन

¹⁷ एने जेवी तो प्रिनासामाय जाते एय तो तेवी एक माणुह दोवडतेन तान आहने आवीन पाया पोडीन फुसणे लागिल, हे हाजा गुरुजी, तू हाजो हि एने अनंत जीवनान अधिकारी ला केरता मी काय केरणे?

¹⁸ यीशु ताह कियील तू माहु हाजो काहा किथी? कुणी हाजो नाह, फक्त एक म्हणजे बोगवान.

¹⁹ तुवाह आज्ञा ते मालुमुच हि, हत्या केरहू मां, व्यभिचार केरणू नाह, चोरी केरहू मा खोटी गवाही आपहू मां, निंदा केरणू नाह, आपणा आई आबाकान मान मेलू.

²⁰ तो ताह कियील, गुरुजी, मी जेल्मो लियील हि तेविरीन ज्यू आज्ञा पाळते आवील हि.

²¹ यीशु ता उखेर नेजेर टाकीन तापोर प्रेम किरील, एने ताह केयो, “तुवामाय एक वातीन कोमी हि; जां; जो कांही तारो हि, ताह वेचीन गेरब्याह वाट दी, एने तुवाह स्वर्गामाय धेन जुडी, एने आवीन मार पासाण आव.”

²² ज्यो वचन होमलावा तान मूय उतोर्णो एने तो दुखाम एईन तारीन निकलीन गीयो काहाकाय तो जुलुम श्रीमंत एतो.

²³ यीशु ने चारुबव बाजूमाय देखव आपणो चेला कियील, धनवानान केरता बोगवानान राज्यन केरता प्रवेश केरणेन कोलाक केठव हि.

²⁴ चेला तान शब्दाव जेसे जादा आश्चर्य एय गीयो पुण यीशु ने उवतू तो कियील, “हे सोरा, बोगवानान राज्यम प्रवेश मिळवीन केव एने केठन हि.

²⁵ बोगवानान राज्यम एखादो बोगवान प्रवेश केरणेन केरता उंटळाह हुईन नाकाम निकलीन जाणू सोपो हि.”

²⁶ तो उंजू जादा बोग्लाईन फुसणे लागिल उवतू तो कूण उद्धार एहू शकते?

²⁷ यीशु ताऊखीर देखीन कियील, “माणहा फायरीन तर ज्यो नाहं एने शकत, पुण बोगवानानाह तर आखा काही एने शक्य हि.”

²⁸ पतरस ताह केहू लागिल, देखू, आमु आखा सोडीन तारो पासाण लागिल हि.

²⁹ यीशु कियेल, मी तुवाह खेरीच किथु, का ओहलो कूण नाह जो मारो एने मार सुवार्तान केरीन घेर, बाहाक बोणिक आहाक आबुक सोरा एने खेताह सुडील हि.

³⁰ एने ऐवी ज्या समय पोर सौ गुणा नाय जुडील, घेराह एने बाहाक एने बोणिक एने आयह्युक एने बाल-बोच्चां एने खेतामाय सतावां हेर्यू एने पेरलोकामाय अनंत जीवन.

³¹ पुण कोलाक जाण जां पेल्ला हेते, ता सेवेतल्या एती जोशेट हि तो पेल्ला एती ता.

यीशुन आपणी मोत ने विषय माय तिसरी वारीन भविष्यवाणी

³² एने ता यरूशलेमाम जातेन वाटेमाय वाला एता एने यीशु तान ओगांण ओगांण जात एतो एने तो चक्कित एता एने जो पासाण आविह एता तो बिईल एता एने उंजू तो ता बाराणा आलेग लावा गीयो, एने जो कांही तान बरोबर एय एता तो ताह किथी एतो.

³³ देखू, आपु यरूशलेमत जाइन रेणा हि एने माणहान सोराह तर मुख्य याजक एने शास्त्री आथाम देराव एने आपील जाहू एने तो ताहाच मरण दण्डास योग्य ठेरिन एने अन्य जाती आथे होपव आपण्यू.

³⁴ तो तान थट्टा केरुहू, तापोर थुपणार, ताह चापका मारणार एने मारीन टाकणे एने तो तान दिहामाय तो पोशो जव एने तालू उठीन.

सेवान महानता

³⁵ तेवी जब्दीन दुय सोरा याकूब एने यूहन्ना तान आहने आवीन केहू लागिल, हे गुरु, आमूह लागीह जो कांही आमु तारहेर्यो मागुहू तो तू आमरिन केरता केर.

³⁶ एने तान ताहाच कियील तुमूह काय लागीह मी तुमरीम केरता केरणे?

³⁷ तां ताहाच कियील, तारो वैभवमा आमरिन माय्ररिन एक जेव डव उगे एने दिहरो डाखरिन उगव बोहवल.

³⁸ पुण यीशु ने ताह कियील, तुमूह मालूम नाहं का तुमूह काय मांगतेन हि जो प्याला मी पिनार हि काय तो तुमूह पव हु शकता? काय जो बाप्तिस्मा मी लेणार हि तो तुमूह लेहु शकणार काय?

³⁹ एने तास ताहाच कियील, “आमु केरनेशकणे.” एने यीशु ने ताह कियील, तो प्याला मी पिनार हि तुमूह पव हु केरसेक्तालू एने तो बाप्तिस्मा जो मी लेहु हि तुमूह लेहु केरसेक्तालू.

⁴⁰ पुण आपणो जेव डव केवहव डाखरिन उगव बोहाडणे मारा काम नाहं पुण तादिहरिन जातव अधिकार एने केरता हि जानकेरता तियार किरील हि.

⁴¹ ज्यो होम्लावा दहा चेला याकूब एने यूहन्नापूर का चवायन गीया.

⁴² केरीन यीशु ने ताह आहने हादाडळव कियील, तुमूह मालूम हि का जो अन्य जातीन अधिकारी एने सोमजवजाथू तो तापोर प्रभुत्व केरणू एने तामाय जो मोठा हि तो तां पोर राज्य केरणू.

⁴³ पुण तुम्रेमाय इही नाहं जो कूण तुम्रेमाय मोठू एहू इच्छितो तान तुम्रेमाय दास एणेजुव एने.

⁴⁴ एने जो तुम्रेमाय अधिकार एने बोणणेन मांगथू तान सोबान दास बोणणेन जुव एने.

⁴⁵ काहाकाय माणहान सोरू पुण आपणी सेवा केरीन केरता नाहं पुण सेवा केरणे एने कोल्लाकतेबव वेचातो लेणे केरता आपणो जीव एने आपणेन आवा हि.

आंधला बरतिमाईह हुदारणेन

⁴⁶ ता यरीहो माय पोचेल एने ताहेरया तो आपणो चेला एने एक मोठला गर्दव हेऱ्या यरिन हामायरीन बाहेर जात एता तर बरतिमाई नावान एक आंधलू भिखारीन जो तिमयान सोरो एतो वाटव मेरापूर बोहवएतो.

⁴⁷ ताहेरया तान होमलील का हा नासरी यीशु हि तेवी तो आयडीन लागिल, हे यीशु राजा दाविदान सोरो, मारपुर दया केर.

⁴⁸ कोलाकान जुल्या आपील कियील का तो ठावको रेणेन जुव एने, पुण तो उंजू जोरेस आयळणेन लागिल दाविदान सोरो, मारपुर दया केर.

⁴⁹ तेवी यीशु ने थोबन कियील, ताह हादाळो एने माणहान ताह जो किथी हादाडील, धीर देर, एने उठ तो तुवाह हादतेन हि.

⁵⁰ एने तो आपणो झगा एक बाजूमाय टाकील आपील एने कुदिन उठिल एने यीशु हेऱ्यो आवा.

⁵¹ यीशु ने उत्तर आपील कियील, तुवाह काय लागीह का मी तार केरता केरणे? एने आंधलान ताह कियील, मारो गुरु, माहु देखताला हि.

⁵² यीशु ने ताह केईल, निकलीन जा तारो एने विश्वासान तुवाह हाजो किरील हि तो चालूच देखणेन लागो एने तान पासाण वाटे लाग गीयो.