मरकुस 1 - नाहाली

यूहन्ना बाप्तिस्मा आपणारान पोरचार

¹ बोगवानान सोरो यीशु मसीहान सुवार्ता पोरचार सेवान सुरवात.

² जीही यशाया भविष्यवक्ता पुस्ताकाम लिखील हि का, “देखू मी आपणा दूताह तार ओगांण मोकेलथू, तो तार केरीन वाट तियार केरी.”

³ “जेंगलामाय एक आयेडणारान शब्द होम्लाणे बाज रेनाह का” प्रभुन वाट तियार केरू, “एने तान सेडक्यू हिद्यू केरू.”

⁴ यूहन्ना आवीन, तो जेंगलामाय यार्देन नदीन जागे बाप्तिस्मा आपतालु, एने पापान क्षमान केरता एने मोन फिरावणेन बाप्तिस्मान पोरचार केरतालु.

⁵ तेवी आखा यहूदा देशाम एने यरूशलेमाय रेणार आखा निक्लीन ताफाय गीया, आप-आपणा पापाह मानीन यार्देन नदीमाय ताफायरीन बाप्तिस्मा लेणे लागा.

⁶ यूहन्नाना उंटळान रोस्कान फाडका पेरतालु एने तान कोमरांह चांबडान कोमेरपोट्टो बांधील इतू, एने तान खाणो टीडया एने जेंगली मोवाल खाया केरतालु.

⁷ एने ज्यो पोरचार केरतालो, मार पासाणरीन आवण्यो हि तो; माहुरीन भी शक्तीशाली हि, मार लायकी ओलिक नाह सोती का मी डोंगो पोडीन तान पायान खाहडान बोंद सोडू.

⁸ मी ते तुमरो बाप्तिस्मा पाण्या केरीन केरील हि, पुण तो ते तुमरो बाप्तिस्मा पवित्र आत्मा केरीन केरी.

यीशुन बाप्तिस्मा एने परिक्षा

⁹ ता दिहामाय यीशु गलील ने नासरेथ रीन आवीन यूहन्ना फायरीन यार्देन नेंदीमाय तान बाप्तिस्मा एनो.

¹⁰ एने तो पाण्या मायरीन निक्लीन उपेर आवतालू, तेवी चालूच आकाश उगेडतालो एने आत्माह कबुतरान रूपामाय आपणे उपेर उतरतालो देखायेल.

¹¹ तेवी आकाशवाणी एनी का, “तू मारो प्रिय सोरो हि, तार बारामाय मी आनंद हि.”

¹² तेवी पवित्र आत्मा ताह चालूच जेंगलामाय ली गीयू.

¹³ एने जेंगलामाय चालीह दिह वोर शैतान तान परिक्षा लेदो; एने तो जेंगली जेनावरा हेर्यो एतो एने स्वर्गदूत तान सेवा केर्ते रिनो.

यीशुन सेवान सुरुवात

¹⁴ यूहन्नाहा अटक ला बादमाय यीशु गलील माय आवीन बोगवानन राज्यान पोरचार केणे लागिल.

¹⁵ तो कियेल, काल्लान पूर्णता एनीह एने बोगवानन राज्य आहने आव जाईल हि मोन फिरावू पोस्तावू केरू एने सुवार्ता पोर विश्वास केरू ओवतो.

बोयटाह हाद्णु

¹⁶ यीशु गलील ने समुद्रान मेरे रीन जातालु तेवी शिमोन एने तान बाहाक आंद्रिया ज्यां समुद्रा माय जालो टाकताला देखायेल, काहाकाय ता मासा मारणारा बोयटा एता.

¹⁷ यीशु ताह कियील, मार पासाण आवु, मी तुमूह माणहा देरणारा बोणावूह.

¹⁸ ओवतो ता जालाह सोडीन तान पासाण चालणे लागिल.

¹⁹ तारीन जारिक ओंगान जाइन बादमाय ताह जब्दीन सोरा याकूब एने तान बाहाक यूहन्ना ज्या नावीमाय जाल हुदारताला देखाना.

²⁰ एने तो चालूच ताह आयडीन हादील, ओवतो तो चालूच तान आबाकाह जब्दीह एने ताह नौकरा हेऱ्यो नावीम सोडीन तान पासाण चालणे लागा.

द्रुष्टआत्मा लागिल माणहाह हुदारणेन

²¹ अवतो ता कफर्णहुम नगराम गीया, एने चालूच तान शब्बाथ दिह आराधनालय माय जाइन शिक्षण आपेल.

²² एने शिक्षणा पोर्रीन माणहे बोंगलाय गीया, काहाकाय तो ताह शास्त्री माणहान होस नाहं पुण अधिकार होस हिकाड तालो.

²³ ताच टाईमापोर तान आराधनालय माय अशुद्ध आत्मा लागिल एक माणुह एतो.

²⁴ तो आयडीन कियील, हे यीशु नासरी, आमूह तारे से काय काम? काय तू आमारो नाश केरणेन आवूह काय? मी तुवाह ओलेखथू तू कूण हि जां? तू बोगवानन पवित्र तो तूच ज्यां.

²⁵ यीशु ताह धो जुलीन कियील, ठावकु री एने ज्यामायरीन निकेल.

²⁶ तेवी अशुद्ध आत्मा ताह पिल्लीन मोठला आवाजामाय आयडीन एने तामायरीन निक्ली गीयो.

²⁷ तेवी ता ओला बोंगलाय गीया का ता एकमेकांह फुसणे लागिल, ज्यो हि तेभी काय? काय ज्यां अधिकार युक्त नोवालो हिकाडीह! ज्यो अशुद्ध आत्मा भी ज्यान आज्ञा मानतेह एने तो तान होमेलनू.

²⁸ जी तान किर्ती चालूच गलीलान चारू उगेन आखा भागाम पोसरील.

जुलुम दुखऱ्या हुदारणेन

²⁹ आराधनालय मायरीन निक्लीन तो चालूच याकूब एने यूहन्ना न्या हेऱ्यो शिमोन एने आंद्रिया न्यान घेर गीयो.

³⁰ शिमोनान हाहवूक हेर्यामाय दुखारी पुडील एती, तान बारामाय चालूच ताह कियील.

³¹ तेवी तीन आहने जाइन तीन आथाह देरीन तीह उठाडील एने ती तापा मायरीन हाजी एयीन, तान सेवा केरणे लागिल.

³² सूर्य बुडणे तेवी हांजपोर माणहा आखा दुखार्याह एने दुष्ट आत्मा लागीलाह ताफाय लावील.

³³ एने आखो नगर ने माणहा बायणाहेऱ्यो आवो.

³⁴ तेवी तामाय आलेग आलेग रोगान दुखार्याह मोकताह माणहाह तो हाजो किरील एने मोकता दुष्ट आत्मा काडील; ता दुष्ट आत्मा ताह ओलखिन केरीन तो ताह बोलहने नाहं देणु.

यीशुन एखालामाय प्रार्थना केरणो

³⁵ उवतू तो हेकाले मोठला वेगोस उठीन बाहेर गीयो जेंगलामाय जाइन ताहरी प्रार्थना केरील.

³⁶ तेवी शिमोन एने तान हेरी ताह होदणे केरीन गीया.

³⁷ एने तो सापडनेपोर तो ताह कियेल, आखा माणहे तुवाह होदणे केरीन हि.

³⁸ तेवी यीशु ताह कियील, माहु आसपासणे गावामाय उपदेश केरता आव केरीन आपु दिहरे उगे जाहू काहाकाय ज्यांच उदेशासे मी निक्लील हि.

³⁹ उवतू तो तो आखोच गलील माय तान आराधनालय माय जाइन उपदेश केरीन एने दुष्ट आत्मा काडते रेणू.

कोड लागिल माणहाह हुदारणो

⁴⁰ तेवी एक कुष्ठरोगी ताफाय आवु, एने तान ओगांण मांडा, टेकिन ताह विनंती केरणे लागिल, एने ताह कियील, “जर तारी ईच्छा एय ते आमूह शुद्ध केरणेन तू समर्थ हि.”

⁴¹ तेवी यीशुह तान दया आवी एने तान आथ ओगांण, केरीन ताह आथ लागाडील एने ताह कियील, “मारी ईच्छा हि, शुद्ध एय जा.”

⁴² तेवी चालूच तो कुष्ठरोगी शुद्ध एय गीयू.

⁴³ यीशु ताह कुणीह मा किही केरीन चेतावणी केयीन चालूच मोकलील दियील.

⁴⁴ एने कियील देख, कुणीह मा किही ज्या विषयामाय, ते जाइन स्वताह याजकाह देखाड एने ताह प्रमाण प्रिय जुवी केरीन तू आपणो शुद्ध केरता मुसान ठेरावील अर्पण केर तान केरता का तू शुद्ध ला गवाही आखाह सोमेजणे जुवी.

⁴⁵ पुण तो बाहेर जांणेबादमाय तो घोषणा केरी केरीन ती खुबेर ओली प्रसिद्ध केरील का यीशुह आखान ओगांण शहराम जाता आवातालो नाहा; केरीन तो बाहेर जेंगलामाय रेणू तेभी माणहे चारू उखेर रीन ताफाय आवताला.