मत्ती 9 - नाहाली

लखवो लागिल माणहाह हुदारणेन

¹ तो नावीम बोहीन पुरलेउखीर गीयो, एने आपणो नगराम आवा.

² एने देखू, काही माणहे लकवान पिडील माणहाह खाटलापुर लोटाडीन लीन आवा. यीशु तान विश्वास देखीन लकवान पिडील माणहाह कियील, “मारो सोरा, हिमंत केर, तारो पापान क्षमा एनीह.”

³ एने देखू, काही शास्त्री आपणा मोनाम केया, “ज्यो ते बोगवानान निंदा केरीह.”

⁴ यीशु तान मोना माय वाला विचार सोमजीन ताह कियो, “तुमूह आपणा-आपणा मोना माय काहा वाईट विचार केरतेह?

⁵ सोपो काय हि? ज्यो केणु का, तार पापान क्षमा एय गियीह, का उठ एने चाल फिर.

⁶ पुण ज्यान वजेसे तुमूह जांण कि माणहान सोराह पृथ्वीपोर पापान क्षमा आपणेन अधिकार हि.” तेवी तो लखवा वालाहा कियो, “उठ, आपणो खाटलो वीस एने घेर जा.”

⁷ तो उठीन आपणो घेर निकलीन गीयो.

⁸ ताहरो जा माणहे एता ज्यो देखीन ता बिय गीया एने माणहे बोगवानान महिमा केरणे लाग गीया. जो माणहाह ओहलो अधिकार आप्यो.

मत्तीह हादणेन

⁹ जेवी यीशु तारीन ओगाण गीयो मत्ती नावान एक माणुह वसुलीई नाकापूर बोहील देखीन तान ताहा कियो, “मार पासाण आव” तो उठीन तान पासाण चालणे लाग गीयो.

¹⁰ जेवी तो घेराम खाणेन बोह्यो, तेवी देखू, मोक्ताच केर लेणारा एने पापी आवीन यीशु एने तान चेला हेऱ्यो रूटू खाणे लाग.

¹¹ एने ज्यो देखीन फरीसी यीशुन चेलाह केया, “तुमरो स्वामी केर लेणारे एने पापी माणहाहे-यो काहा खाणे”

¹² यीशु ज्यो होमलीन ताहा कियो का, “हाजा माणहाह वेद्यान गिरीज नाहं पुण दुखारया माणहाह हि

¹³ जानकेरता तुममु जाइन ज्यान अर्थ हिक लिवो का, मी बलीदान नाह पुण दया होदथू. काहाकाय मी धर्मीह नाह पुण पापीह हादणे आयील हि.”

उपासाण प्रश्न

¹⁴ तेवी यूहन्नान चेला तान आहने आवीन केणे लागा, “काय कारण हि कि आमु एने फरीसी उपास केरणूम, पुण तारो चेला उपास केरते नाहं”

¹⁵ यीशु ताह कियील, “काय वाराडया हेरी जेवीवोर दुल्हो त हि, ताउखवोर ता शोक केर सेकतेह काय? पुण ता दिह आवती जेवी दुल्हा तासे आलेग एय जाय, एने तेवी ता उपास केरती

¹⁶ जुना फाडकान कूण भी नोवालो फाडकाह टुकडा लागाळीत नाहं, कारण तो टुकडा ता फाडका फाड टाकी एने तो पेल्लारीन जादा फाट जाती.

¹⁷ कूण भी जुना बुधल्याम नोवालो अंगूररस भोरणे नाहं, कारण तो जुनाल्यो बुधले फुट जाय, पुण नोवाल्यो अंगूररस नोवाला बदल्या माय बोरनु, ज्यासे ता दुयू भी वोचीन रेतेह.”

मोरील सोरी एने दुखारी बायकू

¹⁸ तेवी तो जी वातू केतालूचने देखू, यहूदी धर्म सभान एक अधिकारी ताहरी आवा एने ताह नमन केरीन केयो, “मारी सोरी एवीच मोरील हि, पुण चाल एने तीन मुंडीपुर आथ मेल, तेवी ती जीवताली एय जाय.”

¹⁹ तेवी यीशु उठीन तान पासाण चेला हेरी गीयो

²⁰ एने देखू, एक बायकू जी बारा वोरह्यांन फाडकु रक्तस्राव आवणेन बिमारी एती, ती तान पासाण आवीन तान फाडकाह आथ लागाडी.

²¹ कारण ती आपणा मोनाम केताली हे, “जर मी तान फाडकाह आथ लागाडूह तेभी मी हाजी एय जाह.”

²² तेवी यीशु पासाण फिरीन देख्यो एने तीह कियो, “सोरी, इमुत देर तारो विश्वास तुवाह हाजो किरील हि, एने ती बायकू ताच टायीमापोर हाजी एनी.”

²³ जेवी यीशु ता सरदार घेर पोचुनु तेवी तान पावली वाजाडणारे एने गर्दीह रेडताला देख्यो.

²⁴ तो ताह कियो, “सेटा एय जावू कारण सोरी मोरनी नाहं ते ती हुविह” ज्यो केणे से तापोर आहने लागा.

²⁵ पुण जेवी माणहान टोलु बाहेर निकलनो, एने यीशु घेराम गीयो ती सोरिन आथ धेऱ्यो एने ती जीव उठनी.

²⁶ एने जी वातून चर्चा ता ता आखा प्रदेशाम पोसरी गीयी.

दुय आंधलान वार्ता

²⁷ जेवी यीशु तारीन ओगाण गीयो तेवी तान पासाण दुय आंधलाह इही केरीन आयेडतेन आवा का, “हे दाविदान सोरा, आमऱ्रेपोर दया केर.”

²⁸ एने जेवी तो घेराम गीयो तेवी ता आंधला ताफाय आवा, यीशु ताह कियो, काय तुमूह विश्वास हि का मी ज्यो केर सेकथू “ताकेया, होव प्रभु.”

²⁹ तेवी तो तान डोलाह आथ लागाडीन किथी का, तुमरो विश्वासामान गेतुच तुमु हेऱ्यो एय.

³⁰ एने तान डोला उगडी गीया, तेवी यीशु ताह चेतावणी आपील का, ज्यो कुणीहुच केहू मा.

³¹ पुण ता जाइन ता आखा भागाम ज्ञान चर्चा केर देना.

एक मुकाह हाजो केरणू

³² जेवी ता बाहेर जाताला, तेवी माणहे एक मुका माणहाह जो दुष्ट आत्मा माय पिडीत एतो, यीशु हेऱ्यो लावा.

³³ एने जेवी दुष्ट आत्मा काड टाकील, तेवी मुको बोलणे लागो. ज्यासे माणहे जा जोमा इयील एता आश्चर्य केरीन केया, “इस्राएल माय इही केधीच नाहं एनो.”

³⁴ फरीसी केणे लागा का, “ज्यो दुष्ट आत्मान अधिपतीसन मोदेतसे दुष्ट आत्माह बाहेर काडीह.”

मोन्जऱ्या थोडस हेते

³⁵ यीशु आखा नगरांमाय एने गावा गावामाय जाइन तान आराधनालय माय हिकाडतेन एने राज्यान पोरचार केरतीन, एने आखा बातीन रोग एने आखा पभातीन दुख हाजोह केऱ्यो

³⁶ तेवी ताहा माणहान गर्दी देखीन माणहापूर किव आवी, काहाकाय ता मेंढरांनहोस एता जान कुणुचं भी गोवाल नाह एय, जा उदास एने बोट्कील एता

³⁷ तेवी तो आपणा चेलाह कियो, “पाकील खेत ते जुलुम हेते, पुण काटणार थोडा हेते,

³⁸ तावजेसे खेतान मालक्या से विनंती केरू कि, खेत काटणेन केरीन मोन्जूर मोकली.”