मत्ती 6 - नाहाली

दान

¹ “सावधान रीवू! तुमु आपणा धार्मिकतान काम माणहाह देखाडनेकेरता केरूह मा, नाह ते आपणो स्वर्गामाय वाला आबाक फायरीन तुमु कायीच नेय जुडी”

² “केरीन जेवी तू दान केरणे, तेवी आपणे ओगांण वाजो वाजाडी मा, जीही कोपटी माणहे आराधनालय माय एने गल्ली माय केरणू, काहाकाय माणहे तान बोडाई केरणे जुवी, मी तुमूह खेरीज केथु, का ताह तान फोल ताहारूच जुड गीयो.

³ पुण जेवी तू दान केरही, तेवी तारो जेवड्या आथा केरीन केरही ते तारा दाखर्या आथाह भी होमजणे मां मा दीही

⁴ ज्याकेरता तारो दान लिकाडील रेहू एने तारो आबुक जो गुप्तमाय दिखेह तो तुवाह फोल आपी.”

प्रार्थना

⁵ “एने जेवी तुमु प्रार्थना केरणू, तेवी कोपटीन होस देखावू मा केरू, काहाकाय माणहे देखाडणे केरीन प्रार्थना आराधनालय माय एने सेडक्यून चार रस्ता पोर उबरीन प केरणे हाजो लागणे. मी तुमूह हाचीच केथु, ताह तान फोल जुड जाईल हि.

⁶ पुण तू प्रार्थना केरही, तेवी आपणी बंद खोलीम जा, एने बायणो बंद केरीन आपणो आबाकहेर्यो जो गुप्तमाय हि, प्रार्थना केर. एने तारो आबुक जो गुप्तपणे दिखेह तुवाह तान मोबदलु आपी.

⁷ एने तू प्रार्थना केरही तेवी अविश्वासीन गेत काय भी बोल हि मां, काहाकाय ता इही विचार केरणू कि तान जादा बोलणे से तान प्रार्थना एय जाय.”

⁸ जानकेरता तानहोस बोनुमा, काहाकाय तुमरो आबुक तुमरे मागणेन पेलूच तुमरी गरजा जाणीह.

⁹ “एने तुमु इह्केरीन प्रार्थना केरू, हे आमरा आबाक, तू जो स्वर्गाम हि, तारो नाव पवित्र मानाय जाय.”

¹⁰ “तारो राज्य आवी, तारी ईच्छा जीही स्वर्गाम पुरी एती, तोहीचल पृथ्वीपोर पुरी एय.”

¹¹ आमरा दिह बोरान रूटू आज आमूह आप.

¹² एने जोहलो आमु आमरा दुश्मनाह क्षमा केरतेह, तोहोलोच तू भी आमरा पापान क्षमा केर.

¹³ एने आमूह परिक्षाम लावही मां, ते बुराई से वोचाड, कारण राज्य, पराक्रम एने महिमा तारीच हि, आमेन.

¹⁴ “काहाकाय जेवी आपु माणहान पापान क्षमा केरहू, तेवी तो तुमरो स्वर्गामाय वालो आबुक भी तुमूह क्षमा केरी.

¹⁵ पुण जेवी तुमु माणहान पापान क्षमा केरहू, नेय ते तुमरो स्वर्गीय आबुक भी तुमरा पापान क्षमा नाय केरी.”

उपवास

¹⁶ “जेवी तुमु उपास केरहू, ते कोपटीन होस उदासने गेत नाय जुवी, काहाकाय ता आपणो मूय उतार रेणू, काहाकाय ताह माणहे उपास केरीह केरीन ओल्खी. मी तुमूह खेरीच केथु, का ताह तान फोल जुड जाईल हि.

¹⁷ पुण तू उपास केरही तेवी आपणा मुंडाह तेल लागाड एने मूय धोव,

¹⁸ तान केरता तू माणहाह उपास देखाडी मां, पुण आपणो आबुक जो गुप्तमाय हि, तुवाह दिखेन तुवाह फोल आपी.”

स्वर्गावालो धेन

¹⁹ “आपणे केरता पृथ्वीपोर धेन हेन्गालू मा जाहारी किडा एने जेंग नाश केरणे, एने जाहारी चोर चोरी केरणू

²⁰ पुण आपणे केरता स्वर्गाम धेन टुलू केरू, जाहारी किडा, एने जंग नाश नाय, केरी एने चोर चोरी केरते नाहं.”

²¹ काहाकाय जाहारी तारो धेन हि ताच तारो मोन लागिन रेंय.

शरीरान उजालो

²² “शरीरान दिवू डोलो हि, केरीन जर तारो डोलो साफ हि, तर तारो आखा डील उजाला माय हि.

²³ पुण जर तारो डोलो खराब रेंय, तर तारो आखा डील भी आंधारामाय रेय, तान केरता जो उजालो तारेमाय हि तो आंधारो एय जाय ते तो आंधारो कोलोक मोठो रेय”

बोगवान एने धेन

²⁴ “काल्लोच माणुह भी दुय मालीकान चाकरी केर सकीत नाह. कारण तो एकापुर प्रेम केरी एने दिहरापुर रोग मेली, एने एका हेरी मिलिन रेय एने दिहरा दिहराह नाकारी. तुमु भी बोगवान एने धेन ज्या दुयुन सेवा नाह केर शकते.

²⁵ तान केरता मी तुमूह किथु, आपणा जीवान केरीन भी चिन्ता केरूह मा का, काय खाहू एने काय पिहु, एने आपणा डीलाकेरिन काय पांघरहु, काय जीव खाणा एने फाडका से होवटो महत्वान हि का?

²⁶ आकाशामाय वाला चिडाह देखू! ता पेरणु नाहं एने काटणु भी नाहं एने खोलामाय जमा भी नाहं केरणू तेभी तुमरो स्वर्गामाय वालो आबुक ताह खाणेन आपणे. काय तुमरी किमुत ताहरीन जादा हि कि नाहं?

²⁷ तुमरे माय कूण ओहलो हि का, जो चिंता केरीन जीवाय वोडाव एने गेटाळ लेय”

²⁸ फाडकान केरीन तुमु चिंता काहा केरणू? सोसनान फुलाह देखू तो केहिक वोदणु, मेहनत केरते नाहं, काटणी केरणू.

²⁹ मी तुमूह किथु का सुलेमान राजू भी, आपणा आखा वैभवाम एक होस भी फाडका पेरील नाह एतो.

³⁰ तान केरता बोगवान मोयदानान खेडाह, जो आज हि हेकाले भाड टाकील जाय भट्टीम टाकाय, जाणे ताह जर बोगवान ओहला फाडका पिरिह ते, हे अल्पविश्वासी, तो तुमूह तो काहा नाहं पेरावणार?

³¹ केरीन काय खाहू, काय पिहु, एने काय पांघरहु केरीन चिंता केरूह मा.

³² काहाकाय अविश्वासी माणहा जी वोस्तून होदमाय रेत्यूह, पुण तुमरो स्वर्गामाय वालो आबाकाहा मालूम हि का तुमूह ज्यू आखी वस्तून जोविह.

³³ केरीन तुमु पोयले बोगवानान राज्य एने धार्मिकता होदमा रीवू. का जी ज्यू आखी वस्तु भी तुमूह जुडी. जाती

³⁴ तामुळे हेकालेन चिंता केरूह मा काहाकाय हाकालेन चिंता हाकाले; आजेन दिह्यान केरता आजेन दुखच जुलुम हि.