मत्ती 4 - नाहाली

यीशुन परिक्षा

¹ तेवी बोगवानान आत्मा यीशु जेंगलामाय लीन गीयो काहाकाय शैतान द्वारे तान परिक्षा एय

² तो चाळीस दिह, एने चाळीस रात, वोर उपास किऱ्यो, तेवी ताह बुख लागी.

³ तेवी पारखणार तान आहने आवीन किदो, “जर तू बोगवानान सोरो एय, ते हुकुम केर, का ज्यो दिगुड रूटू बोनण जाय.”

⁴ तेवी यीशु उत्तर आपील कि, लिखील हि, “माणुह फक्त रोटावकेरिन नाह, तर बोगवानान मुखामायरीन निकालणारा हर एक वचना से, जीवतालो रेय.”

⁵ तेवी शैतान ताह पवित्र नगरामाय ली गीयो एने मंदिरान उपेरल्या टोकापूर उभराख्यो,

⁶ तेवी तो ताह कियो का, “केधी तू बोगवानान सोरो एय, ते बुंदे कुद जां, काहाकाय ओहलो लिखील हि का, तो आपणा स्वर्गदूताह हुकुम केरी, एने तारो पाय देगडा से ठेस, लाणेन पेल ता तुवाह आथापुर जेल लेती.”

⁷ यीशु ताह कियो, इही भी लिखील हि का, “तू आपणो प्रभु बोगवानान परिक्षा मा केरही.”

⁸ ओवतो शैतान ताह उचा जुलुम बोयडीपोर लीन गीयो एने जगान आखा राज्य एने वैभव देखाढ्यो,

⁹ एने तो कियो, “जेवी तू पाया पोडीन माहु नमन केरही ते, ज्यो आखो तुवाह आप देह.”

¹⁰ तेवी यीशु ताह कियो, “हे शैतान सेटू एय जा, काहाकाय ओहलो लिखील हि का, तू आपणा बोगवानाह नमन केर, एने ताचने भोक्ती केर.”

¹¹ ओवतो शैतान ताह सोडीन निकलीन गीयो, स्वर्गदूत आवीन तान सेवा केरणे लाग गीया.

यीशुन सेवकाईन सुरुवात

¹² जेवी यीशु होमल्यो का, यूहन्नाहा बोन्दि बोणाव लियील हेते, ते तो गलील माय आवा गीयो.

¹³ एने तो नासरेथ सोडीन कफर्णहुम नगरमा जो समुद्रकिनारापूर जबुलून एने नप्तालीनने भाग हि ता जाइन रेणे बाजगीय,

¹⁴ काहाकाय जो यशाया भविष्यवक्ता द्वारे कियील एतो, तो पुरो एने जुवी,

¹⁵ “जबुलून एने नप्तालीन भाग, जो समुद्राम वाटीपुररीन यार्देन नदीन पुरलेउखीर, दिहरी जातीन माणहान गलील.

¹⁶ जा माणहा आंधाराम बोहरीयील एता, तापोर मोठू उजालो देखती, जां मोरणेन देशाम एने सावलामाय बोहील एता, तां पोर एक मोठू उजालो चोमकी.”

¹⁷ ता टायमापोररीन यीशु सुवार्ता पोरचार केरणे एने ज्यो केणेन सुरुवात केऱ्यो का, “मोन फिरावू, काहाकाय स्वर्गान राज्य आहने आव जाईल हि.”

पेलूच चेलाह हादाणेन

¹⁸ यीशु गलील ने, समुद्रान मेरे रीन चालतालून दुय बायाक शिमोन जाह पतरस भी केताला, तो एने तान बाहाक आंद्रिया समुद्रा माय जालो टाकतालान देखाना, ता मासा मारणारा बोयटा एता.

¹⁹ एने तो तो ताह कियो, “मार पासाण आवु, मी तुमूह माणहा देरणारा बोणावूह.”

²⁰ उवता ताहारुस तो जालो सोडीन तान पासाण चालणे बाज गीया.

²¹ तारीन ओंगान जाइन, उंजू दुय बायाक जब्दीन सोरा याकूब एने तान बाहाक यूहन्ना न्याह देख्यो. ता तान आबुक जब्दी ज्या हे-या नावीमाय जालो हुदारताला देखाना. तेवी तो ताह हादयो.

²² तो ताहारूच तान नाव एने तान आबाकाह तान सोडीन पासाण चालणे लागा.

यीशुन दुखाऱ्याह हाजो केरणेन

²³ यीशु आखा गलील माय फिरीन तान आराधनालय माय हिकाडतेन, एने राज्यान पोरचार केरतीन, एने माणहान आखा बातीन रोग एने तान कमीपणा हाजो केरतीन फिरीने लाग्यो.

²⁴ एने तान चर्चा आखा सिरीया माय पसरीनी, एने माणहा आखा दुखा-या माणहाह, जा बातीबाती बिमारी से एने दुखान पिडाम एता, एने जामाय दुष्टात्मा एतो, एने जो लकवान पीडामाय एने मिर्गी वाला एता, आखाह लीन आवा एने तो ताह हाजो किऱ्यो.

²⁵ एने गलील दिकापुलिस, यरूशलेम, यहूदिया एने यार्देनेन तीउगेवाला मोठलु टोलु तान पासाण लाग गीया.