मत्ती 26 - नाहाली

यीशुह मारणेन चाल

¹ जेवी यीशु जी आखी वातू केय देणु ते आपणा चेलाह केणे लागू,

² “तुमूह मालूम हि कि दुय दिहापासाडी फसहन तिवार आविह, हि एने माणहान सोरो क्रुस पोर चढाव ने केरता धेरा जाय.”

³ तेवी मुख्य याजक एने डाय डाया महायाजकान गिर जमाना, महायाजकान नाव कायफा एता,

⁴ एने तास आपसामाय यीशुह गुपचुप देरावीन मारीन टाकणेन होम्च्यू रेचील.

⁵ पुण ते केताला, “पर्व बुखेत नाहां; कां इही एणेन मां कि माणहामाय गडबड एय जाहो.”

यीशु पोर मोगाला इत्रना टाकणु

⁶ ताहेरया यीशु बैथानी शिमोन कुष्ठरोगीन च्या घेराम एतो,

⁷ तेवी एक बायकू संगम खेराह बासनाम बहुमुल्य तेल लीन यीशु हेऱ्यो आवी, एने ताहेरया ते रोटू केरीन केरता बोहनी तेवी तान मुंडीपोर तिने रोचवी देनी.

⁸ पुण चेलाह हे देखीन जुलील गीया केहू लागिल, “ज्यो सुगंध तेलान का नाश केरील गीया?

⁹ आवो तेलुहू जादा किमती पाकील गारीबांह रुपये आपुह शकताला.”

¹⁰ हे समजून यीशु ताह कियील, “तुमूह आवो बायकू काहा त्रास आपणु? काय आवो केरता कि तिने मारकेरीन हाजो किरील हि?

¹¹ गरीब तर तुवाहेर्यो कायम रेतेह, पुण मी तुवाहेर्यो कायम रेहू नाहं.

¹² ताहेरया तिने मारो शरीरपोर हे सुगंधि तेल टाकील हे, जानकेरता टाकील कि मारो जुना टाईमपोर तियारी तिने केरील.

¹³ मी तुमूह खेरीच किथे, आखा जगाम जाहारी कां हा पोरचार आपणे माय आवी, ताहारी आवो बोहीही कामान वर्णन पुण इआवीह केरणेम आवी.”

यहूदा इस्करियोतीन धोको देणु

¹⁴ तेवी बारा मायरीन एक ज्यान नाव यहूदा इस्कर्योत, एता मुख्य याजका आहाने गीयो.

¹⁵ एने तान कियील “जर मी यीशुह तुमरो आथे देराव आपण्यू तर माहु काय आपण्यू?” एने तास ताह चांदीन तीस सिक्के तोलीत आपील.

¹⁶ तेवी पासून तो ताह देरावीन आपणे केरता योग्यवेळ होदणे लागिल.

चेला हेरी फसहने आखरी भोज

¹⁷ ओवतो चेला बेखमीर रोटान तीवारान पेल्ला एक दिह केरावी, यीशु आहने आवीन फुसनेनकेरता लागिल, “तुवाह कां बेखमीर रूटू खाणे तिवार फसह केरता तियारी केरावी इही लागीह?”

¹⁸ तान कियील, “नगरांत ता माणहान आहनी जाइन ताह केवो, गुरु किथी हि मारी टाइम आहनी हि. माहु मारो चेला हेऱ्यो फसह तिवार मोगावणे हि.”

¹⁹ तेवी यीशुन आज्ञेनुसार, चेला नी फसह तियारी केरील.

²⁰ ताहेरया हांजपोर एनी, तेवी ते बारा चेला यीशु हे-यो खाणेन बोहू.

²¹ ताहेरया ते जेवण केरतीन एता, तेवी तान कियील, “मी खेरीच किथे कि, तुमरे मायरीन एक माहु देरावीन आपण्यू हि.”

²² ज्यापोर ते जादा दुखां एयीन, एक एक जन ताह फुचने लागिल, “हे प्रभु, मी तर नाहं ना?”

²³ तान कियील, “तो ज्यान मारहे-या वाटकामाय आथ टाकील हि, तोच माहु देरावीन आपण्यू हि.

²⁴ माणहान सोराह तर जोहलो तान बारामाय लेखील हि, तोहोलो एयुच हि; पुण तान हाय ओहलो ज्यान उगेरीन माणहान सोरो देरावीन आपणे माय आवी: ता माणहा केरता हाजो एता जर तान जोनुमोज लीईल नसतू.”

²⁵ तेवी ताह देरावीन आपणार म्हणजे यहूदाने कियील, हे गुरु, “काय मी हि तो?” तान कियील, “तू स्वताच केय देनो.”

प्रभु भोज

²⁶ ताहेरया ते जेवण केरतीन एता यीशु रूटू लीईल एने आशीर्वाद मागिल रूटू मुडीन चेला आपतेन कियील, ली एने खा हे मारा शरीर हि.

²⁷ ओवतो तान प्याला लियेल आभार मानना एने ताह आपतेन कियील तुमूह आखा या मायरीन पिवू.

²⁸ कारण हे मारो वाचान रक्त हि जे माणहा केरता पाप्यान क्षमा केरीन टाकील जाहू हि.

²⁹ पुण मी तुमूह किथे कि अंगूरांन रूह एविरीन ता दिहावोर पिनार नाहं ताहउर मी आपणो आबाकने राज्यातम नोवालो अंगूरांन रूह पिनार नाहं.

³⁰ ओवतो ते गीत गावित जैतुनान डोंगरापोर चेडिन गीया.

पतरसान यीशुह नकारणेन भविष्यवाणी

³¹ तेवी यीशु ताह कियील, “आज राती आखा तुमूह मारबाराम ठोकर खाहू, ओहलो शास्त्रलेख हि कि मी मेंढवालो मारणार एने मेंढरे वेराय माय एय जाती.

³² पुण मी जीवतालू एह तेवी मी तुमरे पेल गलील माय जाह.

³³ पतरस कियील जर आखा जेरी तार बारामाय ठोकर खाय ते खाय पुण मी केधीच ठोकर नाय खाव.”

³⁴ यीशु ताह कियील मी खेरीच किथु का आजुच राती कुकडाह वाहणेन पोयले तू माहु तीन वारीन नाकारही.

³⁵ पतरस ताह कियील जर माहु तार हे-यो मोरने पोडी तेभी मी तुवाह नाकार नाय बोगवानान एने, आखा चेला भी जिच वात कियील.

गतसमनी भोगीच्यान प्रार्थना

³⁶ तेवी यीशु ताहेऱ्यो गतसमनी नावान जागीपोर आवा एने आपणो चेला कियील, जेवीवोर मी जीहीजाणेन प्रार्थना करने तुमूह न्याहीरीच बोहो.

³⁷ तान आपणेहेर्यो पतरस एने जब्दीन दुयू सोरा लीईल एने दुखाम एने कष्टी एहू लागिल.

³⁸ ओवतो तान ताहाच केदा मारा मोन दुखी हि मी मोरण्यू, ओलख दुखी एनो हि न्याहीरीज उबरीवू एने मारहे-या जागे रीवू.

³⁹ ओवतो तो थोडो ओगाण गीयो पाया पोडीन प्रार्थना केरूह लागिल “हे मारो आबुक, जर शेक्यो रेंय तर हा प्याला माफायरीन निकलीन जाहू आप तेभी पुण मारी नाहं तारी ईच्छा पुरो एहू आप.”

⁴⁰ तेवी तो चेलान आहने आवा एने ताह हूवताला देखीन पतरसाह कियील काय तुमूह मारहे-या थोडूटायम पुण जीवहु शकले नाहं?

⁴¹ जागे रीवू एने प्रार्थना केरतीन रीवू कि तुमूह परिक्षाम पोडहुं नाहा आत्मा तर तियार हि पुण शरीर दुर्बल हि.

⁴² ओवतो तान दिहीरीवेले जाइन ओहलो प्रार्थना केरील, “हे मारो आबुक, जर हा प्याला पिलाशिवाय टोलोंत जात निह एय तर तारी ईच्छा एहू आप.”

⁴³ तान उन्जू ओवतो आवीन हूवताला देखील कारण तान डोला हुवितो बारो एय गीयो एता.

⁴⁴ तो ताह उंजू सोडीन निकलीन गीयो एने तीच वात केयीन तिसरिवार प्रार्थना केरणे लागिल.

⁴⁵ उंजू ओवतो तो चेलान आहने आवीन ताह कियील का तुमूह एवीज आराकेरिन हुवीन रेणा हि? देखू टाइम आवीन गीयी हि माणहान सोरो पापी माणहान आथे देराय.

⁴⁶ उठू, चालू एने देखू माहु देरीन आपणार आहनी आवील हि.

यीशुह बोन्दि बोणावणो

⁴⁷ ताहेरया तो हे किथी एतो, तर देखू यहूदा बारातून एक एतो आवीन गीयो एने ताहेऱ्यो तलवार एने डेंगा लेद्लो एक मोठू टोळां एतो ज्याह मुख्य याजक एने डाय डाया मोकलील एता.

⁴⁸ देरावीन आप्नारावाही ताह हि निशानी आपील एती, ज्यान मी चुंबन केरुहू तोच रे ताह देर लेज्यो.

⁴⁹ तो चालूच यीशु हेऱ्यो आवीन बोल्णु हे गुरुजी नमस्कार एने तान चुंबन केर्यो.

⁵⁰ यीशु ताह कियील दोस्ती ज्या कामान केरता तू आवा हि ताह केर, तेवी तान यीशु आहनी आवीन ताह देराव दियेल.

⁵¹ तेवी यीशुन हेरीमाय वालो एकजाण आथ ओगांण केरीन तलवार खेचीन महायाजकान दासापुर चालाडीन तान कान काट दियेल.

⁵² तेवी यीशु ताह कियील आपणी तलवार म्यानमाय मेल कारण जो तलवार चालाडने तो आखा तलवारी केरिनच नाश एती.

⁵³ केव्ही काय तुमूह विचार केरणू काय कि मी आपणो आबाक विनंती केरूह शकत नाहं एने तो स्वर्गदूत चालूच बारा सैन्याचा दलोमरीन सैन्यदल मारो अधिकाराम केरीन आपण्यू.

⁵⁴ पुण तेवी पवित्र शास्त्र कोहलो पुरो एय कि ओहलो ला जरुरी हि?

⁵⁵ तेवी यीशु गर्दीह कियील काय तुमूह तलवार एने डेंगा लीन माहु देरणे आवाह जीहीकाय मी डाकू हि? मी दाडीन मंदिरामाय बोहीन हिकाडतालु, एने तेवी तुमूह माहु नाह देरील?

⁵⁶ पुण ज्यो आखो जानकेरता एय गीयो का भविष्यवक्ता वचन पुरो एने जुवी तेवी आखा चेला ताह सोडीन नाह गीया.

केफान सामने यीशु

⁵⁷ एने यीशुह देरीन एतो ताह कायफा महायाजकान ओगांण लीन गीया, ताहरी शास्त्री एने डाय डाया एखठाच जोमना.

⁵⁸ पतरस भी थोडो सेटेरिन तान पासाण पासाण महायाजकान खोलीम पोचनो, एने ताहरी माय काय एती ते देखणेन पहारेकऱ्या हेर्यो बोह गीयो.

⁵⁹ मुख्य याजक एने आखा न्यायसभा यीशुन विरूद्धाम खोटी गवाही प्रयत्न केरते रेणा ज्यान मुळे तो ताह मारीन टाकणे.

⁶⁰ एने मोकताज ठेगणे गवाही दारान होदामाय एता तेभी तो ताह जुडना नाहं तेभी सेवट दुयू आवीन केयेल का,

⁶¹ एने केयील हि, मी बोगवानान मंदिराह पाडीन ताह तीन दिहामाय पोशा बोणावूह शकुह.

⁶² तेवी महायाजकउबरीन ताह कियील, “का तू उत्तर नाह आपीत काय नाहा” ज्या माणहे तार विरुद्धामाय काय गवाही आपतेह.

⁶³ पुण यीशु ठावको रेणू जापोर महायाजक ताह कियील, मी जीवतालू बोगवानान शपथ आपथु, “जर तू बोगवानान सोरू मसीह हि तर आमूह केयीन आप.”

⁶⁴ यीशु ताह कियील, “तू स्वताह इही कियील तेभी पुण मी तुवाह किथे कि ज्यान ओगाण तुमूह माणहान सोराह आखा शक्तीमानाच्या जेवडी उगे बोहील एने आकाशान वादलामाय आवातल्या देखूह.”

⁶⁵ तेवी महायाजक आपणा फाडका फाडीन केयील का, ज्यो बोगवानान निंदा केरीह, ऐवी उंजू आमूह गवाही दारान काय गिरीज हि? देखू तुमूह भी होमेल्नी हेते.

⁶⁶ ऐवी तुमरो काय विचार हि? तास उत्तर आपील तो मृत्यू दण्डास योग्य हि.

⁶⁷ तेवी ता तान मुयापूर थूपील, एने कूण ते ताह दुमा केरीन देताला, एने दिहरा ते ताह थापाकेरीन दिन केताला,

⁶⁸ “हे, मसीहा, भविष्यवाणी केरीन आमूह के का तुवाह कूण देईल?”

पतरसा द्वारा यीशुह नकारणो

⁶⁹ पतरस खोलीमाय बाहेर बोहील एतो ओलाखमाय एक दासीने आवीन ताह कियील, “तू पुण गलीली यीशु हे-यो एतो.”

⁷⁰ पुण तीह बायकू ता आखा सुमोर तान कियील, “माहु समाजैल नाहं कि तू काय किथी हि.”

⁷¹ तेव्ही तो बाहेर जाइन आखठा केरीन गीयो तेवी एक बायकू दासीह ताह देखीन ताहारी एता ताह कियील, “ज्यो माणुह भी नासरी यीशु हे-यो एतो.”

⁷² तेवी तान शपथ खाइन नकार आपतेन पोशो कियील, “मी ता माणहाह ओळखतेह नाहं.”

⁷³ ओवतो वेलाम जे ताहरी उबरीयेल एता ता पतरसाहेर्यो आवीन ताह कियेल, खेरी खेरीच तू भी तामायरीन एक हि कारण “तारी कोली तुवाह प्रकट केरूह.”

⁷⁴ तेवी तो कोसने एने शपथ खाइन केरणे लागिल, “मी ता माणहाह ओलखी नाहं” एने तोलाचमा कुकडो वाहनो,

⁷⁵ तेवी पतरसा जीवात यीशु कियील एती ती वात इर आविह का, कुकडो वाहणेन पेल तू माहु तीन वारीन नाकर केरही, एने तो बाहेर जाइन मोठ मोठस रेडने लागिल.