लुका 9 - नाहाली

बारा चेलाह मोकलेणो

¹ ओवतो तो बारा जाणाहा हादिन ताह आखा दुष्ट आत्मा एने दुखा-याह हाजो केरणे केरता सामर्थ्य एने अधिकार आप दियील,

² एने ताह कियील बोगवानान राज्यने पोरचार केरणे एने दुखा-याह हाजो केरणेन केरता मुकलेल.

³ एने ताह कियील, वाटी पुर कायीच लेणु नाहं डींग्गु, थेयली नाहं, रूटू नाहं, नाहं पोशा, नाहं दुय-दुय फाडका नाह.

⁴ जां काल्ला घेरामाय तुमूह रेहू, ताच रेवू, एने ताचरीन पोशा आवत्रीवू.

⁵ जो कूण तुमरो स्वीकार नाय केरी, ता नगरामरीन निकेलतेन आपणा पायान मातड्यो झेटकी दिवू का ताह ती गवाही रेंय

⁶ शेवेट ता निकलीन गावा-गावामाय सुवार्ता पोरचार केरतीन, एने प्रत्येक माणहाह हाजा केरतीन फिरते रेणा.

हेरोदेसान घाबराणो

⁷ देशान चौथायीन राजा हेरोदेस जो आखो होमलीन बियीन गीयो, कारण काहींनी कियील कि यूहन्ना मुरील मायरीन जीवतालू एय हि,

⁸ एने काही एलिया देखाईल हि, एने काही भविष्यवक्ता मायरीन कूण एक जीवतालू एय गीयूह.

⁹ पुण हेरोदेस कियील, “यूहन्नान ते मी मुंड काटाड देयेल इतू, एने ऐवी ज्यो कूण हि ज्यान विषयामाय ज्यू ओह्ल्यू वातू होमेलथु?” एने तो ताह देखणेन ईच्छा केरील.

पाच एजार माणहाह खावाडनणो

¹⁰ ओवतो चेला पोशा आवीन आपु जो जो किरील एता. तो तो ताह पेलरीन के केयेल; तेवी तो ताह हेरी लीन बेथसदा नावान गावाउगे एखालामाय जागे गीयो.

¹¹ हे होमजाडीन गेर्दी तान पासाण आवी, एने ते आनंदमाय ताह मिलील, एने ताह बोगवानान राज्यान वातू केणेंन लागिल एने हाजो एयनेण ईच्छा केरतीन एता ताह हाजो किरील.

¹² तेवी दिह मावलणे लागिल, तेवी बाराहि जन आवीन, “गर्दीह खोबीर आपु चारू बाजुन गावाम जाइन एने वोहतीन माय मोकलीन खाणेन सोय केरीज्यू कारण आमु सुनसान जागाम हेते”

¹³ तो ताह कियील, “तुमुच ताह खाणेन आपु.” तास कियील, “आमुफाय पाच रोटा एने दुय मासा सोडीन उंजू कायीच नाहं; पुण होव, केध्दीह आमु जाइन आवो आखा माणहान केरता जेवण वेचातो लावी, ते एय सकीह.”

¹⁴ तेवी तान आपणो चेलाह कियील, “ताह पन्नास पन्नास जाणाहा पंगतीह बोहाडीन दया.”

¹⁵ तान तोहोलोच किरील एने बोहाडीन आपील.

¹⁶ तेवी तान तो पाच रूटू एने दुय मासा लीईल, एने स्वर्ग उगे देखीन आशीर्वाद मागिल, एने तोडीन तोडीन चेलाह आपतेन गीयो, कि माणहाह वोदीह.

¹⁷ तेवी आखा खाइल तृप्त एय गीयू एने चेला उगरील तुकडाकेरिन बारा टोपला बोरीन उखलील.

पतरसान यीशुह मसीह मानणो

¹⁸ जेवी तो एकांतात प्रार्थना केरतीन एतो, एने चेला तान हेरी एता, तेवी तान ताह फुसील, माणहे माहु काय केणु?

¹⁹ तास उत्तर आपील, “यूहन्ना बाप्तिस्मा आपणार, एने कूण कूण एलिया एने कूण कूण ज्याच कि जुना भविष्यवक्ता मायरीन जीवतालू एनो हि.”

²⁰ तो ताह फुसील, “पुण तुमु माहु काय केणु?” पतरस उत्तर आपील, “बोगवानान मसीह.”

²¹ तान ताह हास केरीन चेतावणी कि कुणीहुच केहू मा.

यीशु द्वारा आपणी मोत ने भविष्यवाणी

²² तेवी तान कियील, “माणहान सोरो केरता आवश्यक हि कि तो जादा दुख सहन केरूह, डाय डाया एने मुख्य याजक एने शास्त्री ताह तुच्छ होमजाडीन मारीन टाकतीह, एने तो तीन दिहामाय जीव उठनू.”

यीशुन पासाण चालणेन अर्थ

²³ तान आखा कियील, “केध्दीह कूण मारो पासाण आवहू ईच्छी तो ताह, तर आपणो जीवाह नाकारीन आप एने प्रत्येक एक दिह आपणो क्रुस विसीन मारो पासाण आवो.

²⁴ काहाकाय जो कूण आपणो जीव वाचाडूह ईच्छा हि तो ताह गोमाडी, पुण जो कूण मारो केरता आपणो जीव टाकाय तोच ताह वोचाडी.

²⁵ जर माणुह आखा जगाह मिल्वी एने आपणा जीवाह गोमाड देय, नाह ते तान दुख पोचाडी ते ताह काय लाभ एय?

²⁶ जो कूण माहु एने मारी वातूकेरिन लाजवाय, माणहान सोरो भी आपणी एने आपणो आबाका वूखेर रीन पवित्र स्वर्गदूतांन महिमा हेऱ्यो आवी तेवी तो भी लाजवाय

²⁷ मी तुमूह खेरो किथु कि जो न्या उबरीयेल हि, यान विच मायल्या काही इही हि कि जो ताहवोर बोगवानान राज्य देखीन नाहं लेतेन, तो ताहवोर मृत्युन चोव चाखीन लेती.”

मुसा एने एलिय्याह हेरी यीशु

²⁸ ओवतो वातून कूण आठ दिह ओवतो तिथ पतरसस एने यूहन्ना एने याकूब न्या लेईन प्रार्थना केरणे केरता बोयडापोर गीयो.

²⁹ ताहेर्यो तो प्रार्थना केरतेच एतो, तेवी तान चेहरान रूप बोदलीन गीया, एने तान फाडका शुभ एय चमकेन लागिल.

³⁰ एने देखू, मुसा एने एलिया ज्या दुय माणहे ताहेरी वात केरतीन एता.

³¹ ते महिमा हेरी देखा एने तान मोरणेन चर्चा केरतीन एता, जे यरूशलेम माय एय एता.

³² पतरसस एने तान जोडीदार हुवतालूच एता, एने ताहेर्यो हाजाला प्रकारे विचार केरतीन, तान महिमा एने ता दुय फरीसीन, तान आहने उबरीयेल एता देखील.

³³ ताहेर्यो तो तान आहने जाणेन लागिल, पतरसाने यीशुह कियील, “हे स्वामी, आमरा न्या रेणे उचित हि का: सेवट आमु तीन मंडप बोणाविल, एक तारो केरता, एक मुसा केरता, एने एक एलिया केरता.” ताह मालूम नाह एता कि काय केरणे हि.

³⁴ तो तो केतूच एतो कि एक ढग आवीन ताह घेरून लीईल, एने ताहेर्यो तो ता वादलाड घेरणेन लागिल तेवी बियीन गीया.

³⁵ तेवी ता वाद्लामरीन हा शब्द निकलील, “हा मारो प्रिय सोरो एने मारो निवाडील हि, ज्यान एक.”

³⁶ हा शब्द इयेलपूर यीशु एखलाच देखानो; एने तो ठावको रेणा एने जो काही देखील एता तान कुनुस वात ता एक दिह कुनुस केणेन नाहं.

सोराह दुष्ट आत्मा से छुटकारो

³⁷ एने दिहरे दिह तो डोंगरापोररीन उतरना तेवी एक मोठली गेर्दी तान आहनी आव पोचीनी.

³⁸ एने देखू, गेर्दी मायरीन एक माणहान आयडीन कियेल, “हे गुरु, मी तुवाह विनंती करने कि मारो सोरापूर कृपा दृष्टी केर; काहाकाय तो मारो एकूलता एक सोरो हि.

³⁹ एने देखू, एक दुष्ट आत्मा ताह देरणे, एने तो एक एक आयडीन उठणे; एने तो ताह ओहलो पिल्लीन टाकथू कि तान मुया मायरीन फेस आवथू; एने ताह चेडिन सोडता सोडथू नाहं.

⁴⁰ मी तर तारो चेला विनंती केरील कि ताह काढा, पुण तो काडीन शकले नाहं.”

⁴¹ यीशु उत्तर आपील, “हे अविश्वासी एने कुटील माणहे, कि काहरीवूर तुमरो हेरी रेंय एने तुमरो सहन केरूह? तारो सोरा न्या लेईन आव.”

⁴² तो एतोच एतो कि अशुद्ध आत्मा ताह देरावीन पिललीन, पुण यीशु दुष्ट आत्माह जुल्यो एने सोरा हाजो केरीन तान आबाकने आथे होपीन आपील.

⁴³ तेवी आखा माणहे बोगवानान महा सामर्थ्यान देखीन भोगलाईन एय गीयो. पुण ओवतो आखा माणहाह ता कामा माय जो तो केरणे ओवतो तो चेला कियील.

⁴⁴ “पुण जी वातू तुमरे कानामाय रेणें जुवी, काहाकाय माणहान सोरो माणहान आथे देराव जाणे माय हि.”

⁴⁵ पुण ता जी वातूह नाह सोमेजताला, एने ज्यो तासे नाह लिक रेणी; का तासे जाण नाह सेकना, एने ता जी वातून बारामाय ताह फुसणे से बिताला.

आखा से मोठू कूण?

⁴⁶ ओवतो तान माय हा वाद विवाद एणेन लागिल कि आमरा मायरीन मोठू कूण हि.

⁴⁷ ओवतो यीशु तान मोना माय वालू विचार होमजाडीन लियेल, एने एक सोराह लेईन आपणो आहने उबरीयेल किरील,

⁴⁸ एने ताह कियील, “जो कूण मारो नावान ओवतो सोराह स्वीकारीन, तो माहु स्वीकार करने; एने जोकोन मान्हा स्वीकारीन कारण तो तुमरे माय वाला आखान आत्यो हि तोच मोठू हि.”

जो विरोधाम नाह, तो पक्ष हि

⁴⁹ तेवी यूहन्नान कियेल, “हे स्वामी, आमु एक माणहाह तार नावामाय दुष्ट आत्मा काडतालु देखील, एने आमु ताह नाकारील, काहाकाय तो आमरे पासाण नाहं आविह.”

⁵⁰ यीशुन ताह कियील, “ताह मना केरहू मा; काहाकाय तो तुमरो विरोधामाय नाहं, तो तुमरेहोस हि.”

यरूशलेमान यात्रा

⁵¹ ताहेर्यो तान उपेर उठाळ्या जाणेन दिह पुरो एयन्याम एता, तेवी तान यरूशलेम ला जाणेन विचार दृढ किरील.

⁵² तान आपणो ओगाण दूत मुकलेल तो शमरोनान एक गावाम गीयो एने तान केरता जागो तियार करण्या केरता गीया.

⁵³ पुण ता माणहान ताह आवहू आपील नाहं, कारण तो यरूशलेमेन जात एतो.

⁵⁴ हे देखीन तान चेला याकूब एने यूहन्नान कियील, “हे प्रभु, काय तारी ईच्छा हि कि आमु आज्ञा आपुह, कि आकाशा मायरीन आकठाम पोडीन ताह पेटालीन टाक?”

⁵⁵ पुण तान फिरावीन ताह जुलील एने कियील, तुमूह मालूम नाहं कि तुमूह कोहलो आत्मान हि काहाकाय माणहान सोरो माणहान जीवान नाश केरणे केरता नाहं पुण वोचाडणे केरता आवा हि.

⁵⁶ एने ता दिहरा एक गावाम निकलीन गीया.

यीशुन पासाण चालणेन अर्थ

⁵⁷ ताहेर्यो वाटी जातालोन ताह, तर कूण एकजाण ताह कियील, “जा जा तू जाही, मी तारे पासाण पासाण आवूह.”

⁵⁸ यीशु ताह कियील, “कियील कोल्यान केरीन देरे एने आकाशामाय वाला चिडाह पांजरा रेणू, पुण माणहान सोराह मुंडे लीकाडणेन भी जागो नाहं.”

⁵⁹ तान दिहीराह कियील, “मार पासाण आव” तान कियील, “हे प्रभु माहु पेल जाणेदी मारा आबाक गाडीन आवथू.”

⁶⁰ तो ताह कियील, “मुरीलाह आपणा मुर्दा गाडने दी, पुण तू जाइन बोगवानान राज्यान घोषणा केर.”

⁶¹ एक उन्जू एकजाण कियील, “हे प्रभु, मी तारो पासाण आवथू जाथू; पुण पेल्ला माहु जावू द्या कि आपणो घेरून माणहाह जाइन केयीन आवथू.”

⁶² यीशु ने ताह कियील, “जो कूण आपणो आथ एलापोर मेलीव पासाण दिखेह, तो बोगवानान राज्या केरता योग्य नाहं.”