लुका 5 - नाहाली

पेलूच चेलाह हाद्णु

¹ जेवी गेर्दी यीशुपुर पोडणे केरताली, एने बोगवानान वचन होमलने केरीन यीशुन आहने जाताली, एने गनसरेत सरोवरान मेरे रीन उबरील एती, तेवी ओहलो एनो.

² कि तान सरोवरान मेरे होटी दुय नाव उभी केर मिलील देखील, एने बोयटा बुंदे उतरीन जालो दोवताला एता.

³ ता नावामारिन एक जो शिमोन नावान एतो, चेडिन तास ताह विनंती केरील कि मेरे रीन थोडसं बाजूमाय लीन चाल. तेवी तो बोहीन माणहाह नावेपूररीन शिक्षण आपुह लागिल.

⁴ ताहेरया ती वात केयीन एनी तेवी शिमोनान कियील, “उनडालाम लीन चाल, एने मासा देरणे केरता जाला टाकु.”

⁵ शिमोनान ताह उत्तर आपील, “हे गुरुजी, आमु पुरो राती मेहनत किरील एने कायीच दिरील नाहं; तेभी तुमरो केणे से जालो टाकथू.”

⁶ ताहेरया तास तोहोलो किरील, तर जुलुम मासा टुलू एय गीयो, एने तान जाला फाटने लागिल हि.

⁷ ज्यापरीन तास आपणो ताहे-या वाला जे दिहीरा नावापुर एता, कियील कि आवीन आमरी मदत केरू, एने ते आवीन दुयू नावे न्याओर भूरील कि ते बुडहु लागिल.

⁸ हे देखीन शिमोन पतरस यीशुन पाया पोडीन कियेल, “हे प्रभु, मार फायरीन जा, कारण मी पापी माणुह हि”

⁹ कारण ओलाज मासा धेरनान कारण ताह एने तान हेरी एता ताह जुलुम नवल लागनो,

¹⁰ एने तोहोलोच जब्दीन सोरो याकूब एने यूहन्नाहा भी, जां शिमोनान हेरी भागीदार एता, थक्क यिईल. तेव्ही यीशु ने शिमोनाह कियील, “मां बिऊ; ऐवी तू माणहा जीवताला धेरहि.”

¹¹ उवतो ता नावीह मेरे लीन आवा आखो काही सोडीन तान पासाण चालणे लागिल.

कुष्ठरोगिह हाजो केरणेन

¹² तेवी तो एक गावाम इतू, ते ताहारी कुष्ठरोग लागिल एक माणुह आवज्यू; एने तो यीशुह देखीन पाया पोडील एने विनंती केरील केयील, “हे प्रभुजी. जर तारी ईच्छा एय ते माहु शुद्ध केर सेकीह.”

¹³ तान आथ ओगांण केरीन ताह स्पर्श किरील एने कियील, मारी ईच्छा हि, तू शुद्ध एय जाऊ. एने तान कुष्ठरोग चालूच हाजो एनो.

¹⁴ ओवतो तान ताह हास केरीन कियील, “कोणीही मां केहू, पुण जाइन आपणो जीवेच याजकाह देखाड, एने आपणो शुद्ध एनेबाराम जो काय मुसान निवाडीन आपील प्रमाणे ताह अर्पण केर कि तापुर गवाही बोणी.”

¹⁵ पुण तान वात उंजू पसारीन गीयी, एने गेर्दीन गेर्दी तान होमलनेकेरता एने आपणो दुखा-यामारीन हजो रेणू केरता एखठाच एय गीयो.

¹⁶ पुण तो जेंगलामाय आलेग जाइन प्रार्थना केरीन एतो.

लकवान रोगीह हाजो केरणेन

¹⁷ एक एक दिह इही एय गीयो कि तो शिक्षण आपतेन एतो, एने फरीसी एने शास्त्राध्यापक ताहारी बुहील एता जे गलीलामायवाला एने यहूदीयान प्रत्येक गावामरीन एने यरूशलेम मरीन आवा एता, एने हजो केरणेन केरता प्रभुन सामर्थ्य तान हेरी एती.

¹⁸ ता टाइम काही माणहे एक माणहाह जो लखवो एतो, खाटलापोर लावील, एने तो ताह माय लीन जाणेन एने यीशुन ओगाण मेलणे यत्न केरतीन एता.

¹⁹ पुण ताहेरया गेर्दीन कारण से ताह माय नाहं लीन जाहू शकले तर तास घेरापोर चेडिन एने कोवल्या बाजूमाय केरीन, ताह खाटला हे-यो विचमाय यीशुन ओगाण उतारेल.

²⁰ तान तान विश्वास देखीन ताह कियील, “हे माणुह, तारो पापान क्षमा एनी हि.”

²¹ तेवी शास्त्री एने फरीसी वादावाद केरणे लागिल, “ज्यो कूण हि जो बोगवानान निंदा करने? बोगवानानाह सोडीन उंजू कूण पापान क्षमा केरूह शकणे?”

²² यीशु तान मोनान वात सोमजी, ताह कियील, “तुमूह आपणो मोनाम काय विचार केरतीन हि?

²³ होपो काय हि? काय जो केवू कि तारो पापान क्षमा एनी हि, केवी ज्यो केवू कि उठ एने चाल

²⁴ पुण तान केरता कि तुमूह होमजू कि माणहान सोरो पृथ्वीपोर पापान क्षमा केरणेन पुण अधिकार हि” तान ता लखवामाय कियील, “मी तुवाह किथु, उठ एने आपणी खाटलो विसीन आपणे घेर निकलीन जा.”

²⁵ तो चालूच तान ओगाण उठिल, एने ज्यापूर पुळील एतो ताह विसीन, बोगवानान स्तुती केरतीन आपणो घेर निकलीन गीयो.

²⁶ तेवी आखा थक्क एय गीयो एने बोगवानान महिमा केरूह लागिल एने जुलुम बियीन केवाय लागिल, “आज आमु बिगरओलखाती वात देखील”

लेविह हादणेन

²⁷ ता ओवतो तो बाहेर गीयो एने लेवी नावान एक चुंगी लेणारह जकातीन नाकापूर बोहील देखील, एने कियील, “मारो पासाण आवो.”

²⁸ तेवी तो आखा सोडीन उठिल, एने तान पासाण गीयो.

पापी माणहा हेरी खाणो

²⁹ तेवी लेवीणे आपणो घेराम तान केरता एक मोठली मेजवानी आपील; चुंगी लेणारान एने दिहरी माणहे जो तान हेरी खाणेन बोहील एता, एक मोठली गेर्दी एती.

³⁰ ज्यापुररीन फरीसी एने शास्त्री तान चेला ज्यो केयीन कुरकुर केरूह लागिल, “तुमूह वसुली केरणार एने पापी माणहे का खाता-पिते?”

³¹ यीशुन ताह उत्तर आपील, “वेदय हाजान केरता नाहं तर, पुण दुखा-यान गर्जेन हि.

³² मी धार्मिकाकेरता नाहं, तर पाप्यान पश्चातापनकेरिन हादणे आवूह हि.”

उपासाण प्रश्न

³³ तास ताह कियील, “यूहन्नान चेला तर बाराबुर उपास केरणू एने प्रार्थना केरतीन रेतेह, एने तोहोलोच फरीसीन चेला भी, पुण तारो चेला तर खाता-पितात.”

³⁴ यीशु ताह कियील, “काय तुमूह एने वाराडया, जेवीवोर वोवडान तान हेरी रेय, उपास केर केरावणू?

³⁵ पुण तो दिह आवूह, तामाय नवरबोगवानान तामायरीन आलेग किरील जाहू, तेवी तो ता दिहामाय उपास केरुहू.”

³⁶ तान एक उंजू वार्ता पुण ताह कियेल: “कूण माणुह नोवालो फाडकान फाडीन जुना फाडकाम ठिगळ नाहं लागाळ, नाहं तर नोवालो फाटीन जाहू एने तो ठिगळ जुनालामाय जोमहु नाहं.

³⁷ एने कूण नोवालो अंगूररस जुना बुधल्यात नाहं बोरीत, नाहं तर नोवालो अंगूररस बुधलाह फाटीन वोयीन जाहू एने बुधलान पुण नाश एय.

³⁸ पुण नोवालो अंगूररस नोवालो बुधल्याम बोरील जुवी.

³⁹ काल्लो माणुह जुनो अंगूररस पिईन नवलान ईच्छा करने कारण तो किथी हि, कि जुनाला हाजो हि.”