लुका 24 - नाहाली

यीशुन पोशो जीव उठणो

¹ हफ्तान पेल्ला एक दिह वेगोस ता बायकू कबरेफाय आपु तियार किरील सुगंधि द्रिन्य लीन आवीन.

² ताह कबरेन आहने दिगुड हेरकेल देखानो,

³ एने तामाय गीया पुण ती जागी प्रभु यीशुन शरीर नाह सापडील.

⁴ तेवी त्यू ताह देखीन बोंग्लान्यू ते देखू दुय माणहे दोवल्या फाडका पेरील त्यून आहने आवीन उबरेना.

⁵ जेवी त्यू बिय जाईल, एने जोमनि पोर मूय केर रीयील एत्यू; तेवी तो त्यूह कियील, “तुमु जीवतालाह मुरीलामाय काहा होदतेह?

⁶ तो आवो जागापूर नाहं तो जीवतालू एनो हि ज्यामायकेर ताहेरया तो ऐवी गलीलामाय एतो तेवी तुमूह काय कियील एता,

⁷ तान कियील एता कि, माणहान सोरो पापी माणहान आथे देरीन आपणे निश्चित हि ओवतो तो क्रुस पोर चेढाविन, गीयो एने तिसऱ्या एक दिह ताह पोशो जीवतालू केरणेन निश्चित एता.”

⁸ तेवी ता बायकूह तान शब्द एरायेल,

⁹ ता कबर मायरीन परतल्या एने तासहे आखा अकरा चेलाना, एने दिहरी माणहाह कियील.

¹⁰ ज्याह बायकू एता मरियम मग्दालिया, योअन्ना एने याकूब ची आहाक मरियम हे तोहोलोच ताहेर्यो दिहीरा बायकू पुण ता चेलान किथी एता.

¹¹ पुण तान शब्द ताह वाया लागिल तास तानकेरीन विश्वास किरील नाहं.

¹² पुण पतरस उबरील रेणू एने कबरे वोर दोवळतीन गीयो, एने तान बुंदे वाकून देखील, पुण ताह केवळ तागान फाडका देखा तान काही देखा नाहं. एने जो एनो तासे बोनगलायीन घर गीयो.

इम्माउसान वाटी पोर चेलाह दर्शन

¹³ तान एक दिह तान चेला मायरीन दुय जन यरूशलेम मरीन लेगभोग सात मिल सेटो एईच इम्माउस नावान गावाह जात एता.

¹⁴ जी घटना घेडील एती, तापोर ते बोलीह चाली एता.

¹⁵ ताहेरया ते ता विषयी चर्चा केरतीन एता, एने विचार केरतीन एता तेविरीन यीशु ताजागेन उपस्थित एनो एने तान हेरीचालू लागिल.

¹⁶ पुण ता ताह ओळखू नाह केरीन तान डोलाह जीहीकाय बंद केरणेन आवील एता.

¹⁷ यीशु तान कियील, “चालणे एक दिहीराह तुमूह कोहलो विषयी चर्चा केरीन हेते?” ते चालणे थोबना ते जुलुम दुखी दिसत एता.

¹⁸ तामायरीन क्लयपा नावान एक व्यक्तीने ताह कियील, यरूशलेम माय रेणार मायरीन तू एखालो ओहलो माणुह रेंय जे पासाण दिहामाय घटना घेडील ती मालूम नाहं.

¹⁹ यीशु तान फुसील, काल्ली वातू? तास ताह आखा नासरी यीशु विषयी हि हा एक ओहलो माणुह एतो ज्यान जे कियील एने किरील ज्यासे बोगवान एने आखा माणहे ज्यान ओगाण हे देखाडीन आपील कि तो एक महान भविष्यवक्ता एतो.

²⁰ पुण मी ज्यान विषयी बोलीह एतो कि आमरा मुख्य याजक एने सरदारे केवी मृत्यू दण्ड आपणे माय होपील गीयो एने तास ताह क्रुस पोर चेढ़ाइल.

²¹ आमु आशा मेलीकि जोस एतो इस्राएलान मुक्ती आपणार एने आखा काही ज्याह घेटनाह तिसरू दिह हि.

²² एने आमरा टोलामायरीन काही बायुकू आमूह चितेत केरीन आपील हि आज वेगोस ता माहुफाय गीया.

²³ पुण ताह यीशुन शरीर देखा नाहं ते परतल्या एने आमूह कियेल कि तास स्वर्गदूतान दर्शन किरील एता कि तो जीवतालू हि.

²⁴ ओवतो आमरीमायरीन काही माहुफाय गीया एने जोहलो ता बायुकू कियील, तोहोलोच तास देखील एने तास ताह देखील नाहं.

²⁵ तेवी यीशु ताह कियील, तुमूह मूर्ख हेते एने भविष्यवक्तान जे काही कियील तापोर विश्वास केरणेन कोलाक बागे हि.

²⁶ काय मसीहान हे आवश्यक नाह एता कि तो ज्या त्रासांना बोगीन एने ज्यानहोस आपणो महिमा माय प्रवेश केरूह?

²⁷ एने ज्याह प्रमाणे मुसान सुरुवात केरीन भविष्यवक्ता फायवोर एने शास्त्रामाय ज्याह विषयी जे कियील एता तान ताह व्याख्या केरीन होमजाडील एता.

²⁸ ते ताहेर्यो ता गावान आहने आवा, ताजागेन जात एता यीशु ने ओहलो वागणू केरील जोहलो काय ओगाण जाणेन हि.

²⁹ पुण ताह शेक्तीसे आग्रह केरतीन कियील, आमरा हेर्यो थोबीन जा कारण लेगभोग हांजपोर एनी हि एने ऐवी दिह पुण टापेल गीयो हि तो ताहेर्यो थोबण्याकेरता आहने आवा.

³⁰ ताहार ताहेर्यो खाणेन मेजवर एतो तेवी तान रूटू विसील एने धन्यवाद आपील ओवतो ती मुडीन ताहेर्यो तो ताह आपतेन एतो.

³¹ तेवी तान डोला उघाडील गीया एने तास ताह ओलखिन लीईल पुण तो तान ओगाण गायप एनो.

³² ओवतो ते आपसामाय बोलहू लागिल, ताहेर्यो आपु ताहे-या बोलीह एतो एने शास्त्र होमजाळीन एतो तेवी काय आपणो हृदयाफाय उखाली आविह नाहां एती?

³³ ओवतो ते चालूच उबरीयेल रेणा एने पोशा यरूशलेम माय निकेलना ताह अकरा प्रेरित एने दिहरा माणहे हि एक्ठाच जुडील.

³⁴ जे किथी एता कि प्रभु खेरीच जीवतालू एनो हि तान शिमोनाह दर्शन आपील हि.

³⁵ ओवतो ता दुयुन वाटेमायबी जी घटना घेडील ता आखा कियील, एने तास कियील कि रोटान टुकडा किरील एता तेवी यीशुह केवी ओलखिल एता.

यीशुन आपणा चेलाह देखाणो

³⁶ एव्ही ते ताह ज्याह वातू केताच एता कोलाकामाय स्वयं तान विचमाय आवीन उबरील रेणू एने ताह कियील, तुमूह शान्ति जुळी.

³⁷ पुण ते चक्कित एईन भयभीत एय गीयो तास विचार किरील ते एखादु भूतडो दिखिह हि.

³⁸ पुण तो ताह कियील, तुमूह इही बियेना सारकोस का हेते? तुमरो मोनाम शंका का हि?

³⁹ मारो आथाह एने मारो पायांना देखू माहु स्पर्श केरू एने देखू कि काल्लोबी भूतडा मा एने आडे नसतातव जोहलो तुमूह दिखिह हि ते मारा हि.

⁴⁰ हे केयीन तान आथ एने पाय देखाडीन.

⁴¹ पुण आपणो आनंदाच्या भारत ऐवी पुण ते तापोर विश्वास केरतीन नाह एता, ते भौचक्के एता, यीशु ने तान कियील, न्या तुमरीफाय काही खाणेन हि काय?

⁴² तास बुजाईल मासान टुकडा ताह आपील.

⁴³ तान तान ओगाण लीन खादो.

⁴⁴ ओवतो तो ताह कियील, ज्याह वातू हि ज्या मी तेवी तुमूह केदाह एता ताहेरया मी ऐवी तुवाहेर्यो हेतूप्रत्येक वात जो मारबाराम मुसान व्यवस्था माय भविष्यवक्तान एने शास्त्र ज्याह पुस्तकामाय लिखील हि पुरो एयुच हेते.

⁴⁵ ओवतो पवित्र शास्त्र सोमजाळणेन केरता तास तान डोला उगडीन आपील.

⁴⁶ एने तास ताह कियील, हा तोच हि जे लिखील हि मसीह त्रास बोगीन एने तिसऱ्या एक दिह मुरील मायरीन जीवतालू एय.

⁴⁷ एने पाप्यान क्षमान केरता मोन फिरावान संदेश यरूशलेम पासून सुरुवात केरीन आखा नाव दिहरी जातीन पोरचार किरील जाहो.

⁴⁸ तुमूह ज्याह वातू चे गवाही हेते.

⁴⁹ एने आखा मारो परम आबुक मारहे-यो जी प्रतिज्ञा केरील हि ताह मी तुमरीकेरता मोकलुह पुण तुमूह ज्या नगरामाय ता टायमाउर थोब रेवू जाहुख वोर तुमूह स्वर्गान सामर्थ्य जुडीत नाह.

यीशुन स्वर्गाम जाणेन

⁵⁰ यीशु ओवतो बैथानी ताहवोर लीन गीयो एने तान आथ उपेर केरीन आशीर्वाद आपील;

⁵¹ ताह आशीर्वाद आपतेन तो ताह सोडीन आलेग एय गीयो एने तो स्वर्गामाय उपेर विसाय गीयो.

⁵² तेवी तास तान महिमा किरील एने मोठू आनंद केरीन यरूशलेमाम पोशा गीया.

⁵³ एने ता मंदिरामाय बोगवानान स्तुती केरती रेताला.