लुका 23 - नाहाली

पिलातुस द्वारा यीशुह प्रश्न

¹ तेव्ही आखी सभा उठीन ताह पिलातुसन ओगांण ली गीया.

² हे केयीन तापोर दोष लागाडणे लागिल: “आमु ज्याह माणहाह बहकवताना, एने कैसराला केर आपणेन नाहं नकार कातांना एने आपणो जीवाह मसीह, एने राजा केतालून होमलील.”

³ पिलातुसान यीशुह फुसील, “काय तू यहूदीयान राजा हि? तो ताह उत्तर आपील, आपु केणु तोहोलोच.”

⁴ तेव्ही पिलातुसान मुख्य याजकान एने माणहाह कियेल, “माहु ज्याह माणहामाय दोष देखायील नाहं.”

⁵ पुण ते उन्जू दृढ तेणे केणेंन लागिल, “हा गलील तारीन न्या ताहवोर, आखाच यहूदया माय उपदेश केयीन माणहाह बोडकावीह.”

⁶ जो होमलील पिलातुसान फुसील, “काय तो माणुह गलीली हि.”

⁷ एने हे होमजाडीन कि तो हेरोदेसान राज्यान हि, ताह हेरोदेसा उगे मोकलीन आपील केरीन ता दिह माय तो पुण यरूशलेम माय एतो.

यीशुह हेरोदेसा फाय मोकेलणो

⁸ हेरोदेस यीशुह देखीन जादा प्रसन्न एनो, कारण ताह जादा दिह तारीन यीशुह देखणे एता ज्ञान केरता कि तान विषयातमाय होमलील एता, एने तान तान उगेरीन काही चिन्ह देखणेन आशा मेलतांलोन एतो.

⁹ तो ताहेर्यो जादा वातू फुसतालो, पुण तो ताह काणलोच उत्तर आपील नाहं.

¹⁰ मुख्य याजक एने शास्त्री उबरीयेल रेयीन तान मोनामरीन दोष लागाडते रेणा.

¹¹ तेवी हेरोदेस आपणा चेलाह हेरी तान अपमान केरीन थट्टा उडावली, एने भडक फाडका पेरावीन ताह पिलातुसाफाय मोकली दियील.

¹² तान एक दिह पिलातुस एने हेरोदेस हेरी बोणावीन गीया ज्ञान पेल्ला ते एक दिहरान शत्रु एता.

पिलातुस द्वारा यीशुह मोत दण्ड

¹³ पिलातुसान सरदाराह मुख्य याजक एने अधिका-यान एने माणहाह हादाडळीन ताह कियील.

¹⁴ “तुमूह आवो माणहाह बेहकाडणार ठेरावीन मारो उगे लावील हि, एने देखू, मी तुमरो ओगाण तान चौकशी केरील, पुण ज्या वातू चा दोष तुमूह तापोर लागाडया हि ता वातून विषय माय मी तान माय दोष देखील नाहं;

¹⁵ हेरोदेसाने पुण नाहं, कारण तान ताह आपणो उगे मोकलीन आपील हि: एने देखू, तान फायरीन इही कायीच एय गीयो नाहं कि तो मृत्यू च्या दण्डा योग्य ढेहाराव्या जाह.

¹⁶ ज्ञान केरता मी ताह मार आपणेह लागाडील सोडीन आपथु.”

¹⁷ पिलातुसान पूर्वीवालो टायीमा तान केरता एक बंदी केरेलाह्बी सोडील केरता मजबूर एतो.

¹⁸ तेवी आखा मिलिन आयडी कियील, “ज्यान काम निवरावीन टाक, एने आमरे केरता बरब्बाह सोड दी”

¹⁹ तो कुणी बलवे के कारण, जो नगरामाय एयेल एतो, एने हेत्यान कारण से बोन्दिखाणामाय टाकायेल इतू.

²⁰ पुण पिलातुसान यीशुह सोडतेन ने पोशा माणहाह होमजाडील.

²¹ पुण ते आयडीन कियेल, “ताह क्रुस पोर चेढ, क्रुस उपेर”

²² तान तिसरी वारीन ताह कियेल, “का, तान कालो वाईट किरील हि? माहु तामाय मृत्युन दण्डाचे, कारण काल्लीज वात देखील नाहं ज्ञान केरता योग्य मी ताह मार खावू रीगाडीन सोडीन आपथु.”

²³ पुण ते आयडीन आयडीन पासाण लागिन गीया कि तो क्रुस उपेर चेडायेल जाऊ एने तान आयडणे कामयाब एय गीयो.

²⁴ सेवट पिलातुस आज्ञा आपील तान विनंती नुसार किरील जाऊ.

²⁵ ता ताह माणहाह जो दंगा एने हेत्यान कारणाने बोन्दिखाणामाय टाकील एतो, एने ज्याह ते मांगतेन एता, ताह सोड दी एने यीशुह तान ईच्छा नुसार यीशुह होप देणु.

यीशुह क्रुस पोर चढावणो

²⁶ जेवी ते ताह लीनजाताला, तेवी ता शिमोन नावान एक कुरनेकर जो गावामरीन आविह एतो, ताह क्रुस लाद दियील का ताह यीशु पासाण पासाण जात रेणा.

²⁷ माणहान मटली गेर्दी तान पासाण आवी एने तामाय जादा बायकू पुण एता ज्या तान केरता छाती ठोकत एने शोक केरतीन एता.

²⁸ यीशु तान उगे देखीन कियेल, “हे यरूशलेमन जुवान्यू, मारो केरता रेडू मा पुण आपणो केरता एने आपणो सोराह केरता लेणेन.

²⁹ कारण देखू, ते दिह आविह हि तामाय माणहे केती, धन्य ते वांझ हि एणेन प्रसवलेली उदरे, एने ते स्तन तान केरता दुध पिवाळील नाहं.”

³⁰ ता टायीमा “ते बोयडान केणेंन लाकती कि आमरा उपेर पड़ा, एने टेकड्यान केती आमूह हाफू.”

³¹ कारण ते नीला झाडांन हेरी इही केरणू तर ते हुकील हेरी काय केरूह?

³² ते दिहरी दुय माणहा पुण जे कुकर्म केरतीन एता तान हेरी मारणे केरता लेईन गीया.

³³ जेवी ता ती जागे ज्याह कवटी केणु ताहारी पोचील, तेवी ताहारी ता उन्जू दुय सिनालो केरणाराह भी एता एकाह जेवडी उगे एने दिहीराह डाखरीउगे क्रुसांपोर चेढाविल.

³⁴ तेवी यीशु कियील, “हे आबोक न्याह क्षमा केर, कारण न्याह मालूम नाहं का ज्या काय केरतेह?” एने ता चिठ्या टाकीन तान फाडका वाट लीईल.

³⁵ माणहे उबरेय-उबरीन देखताला, एने अधिकारी भी थट्टा केरी-केरीन केताला, का ज्यो दिहीरा वोचाडील, जर ज्यो मसीह बोगवानान निवाडील हि ते जीवाह वोचाड ली.

³⁶ शिपाई भी आहनी आवील एने ताह स्पंज आपिन तान थट्टा केरीन केताला,

³⁷ तू यहूदीयान राजा हि ते, जीवाह वोचाड.

³⁸ एने तान मुंडीपोर एक दोषपत्र भी लागाडील एता: “ज्यू यहूदीयान राजा हि.”

क्रुस पोर मोन फिरावणार पापी

³⁹ जो अपराधी ताहेऱ्या टांगील एता, तान विचमाय एकजाण तान निंदा केरीन कियील, “काय तू मसीह हीच ने? ते जीवाह एने आमूह भी वोचाड”

⁴⁰ ज्ञान केरता दिहरो ताह जुलीन कियील “काय तू बोगवानाह बित नाहं? तू पुण तर तोच दण्ड भोगती हि,

⁴¹ एने आमु तर न्याय नुसार दण्ड भोगती हि, कारण आपणो कर्माचेच फोल भोगती हि; पुण तान काही गुन्हो नाहं किरील.”

⁴² “तेवी तान कियील, हे यीशु जेवी तू आपणो राज्यातम आवही, तर मारी इआवीह मेलही.”

⁴³ तो ताह कियील, “मी तुवाह खेरीच केथु का आज तू मार हेर्यो स्वर्ग लोकामाय रेहि.”

यीशुन जीव निकेलणो

⁴⁴ आहनी आहने दिहीरा सुमारास तिसऱ्या सुमारा ताहवोर आखा देशाम आंधारो पोडीन गीयो.

⁴⁵ एने सूर्यान उजालो नाहीसा एनो, एने मंदिराममाय वालो पोडदु विचमाय फाटीन दुय भाग एय गीयू,

⁴⁶ एने यीशु मोठली आवाजामाय आयडीन कियील, हे पित्या, मी मारो आत्मा तारो आथाम होपथू “एने हे बोलीन आपणो जीव सोडील.”

⁴⁷ अधिका-यान जो काय एनो तो देखीन बोगवानान महिमा किरील, एने कियेल “निश्चित ज्यो माणुह धार्मिक इतू.”

⁴⁸ एने गेर्दी जी हे देखणेन एक्ठाच जोमनि एती, आवो घेटनाह देखीन छाती ठोकत निकलीन गीयी.

⁴⁹ एने तान आखा ओलखातीन, एने ज्यू बायकू गलीलामरीन ता हेर्यू आवील एती, ती सेटा उबरीन ज्यो आखो देखताली.

अरिमतियाहने योसेफ हेरी यीशुह बुजणो

⁵⁰ ताहारी योसेफ नावान महासभान एक सदस्य एतो तो सज्जन एने धार्मिक माणुह इतू.

⁵¹ एने तान योजना एने तान आखा कामांन प्रसन्न नाह एता तो यहूदीयान नगरात अरीमथीयान रेणार एने बोगवानान राज्यान वाट देखणार एतो.

⁵² तान पिलातुसान आहनी आवीन यीशुन डील मांगील.

⁵³ एने ताह उतारीन मखमलीच्या चादराम गुंडालीन, एने एक माहणे माय मिलील, जी डोंगरापोर खोदेल एती; एने ज्यामाय केधीच कुणीहुच मिलील गीया नाहं.

⁵⁴ तो तियारी केरहू दिह एतो एने शब्बाथ सुरु ला एतो.

⁵⁵ ता बायुकू जे तान हेरी गलीलामाय आवील एता, पासाण पासाण जाइन ता माहु देखील, एने तान शरीर कोहलो प्रकारे मिलील गीया हि.

⁵⁶ तेवी ते जाइन सुगंधीत वस्तु एने सुगंधीत तेल तियार किरील; एने शब्बाथ एक दिह तास आज्ञा च्या नुसार विश्रांती लीईल.