लुका 2 - नाहाली

यीशुन जल्मो

¹ ता दिहामाय आगुस्त कैसर यान उगेरीन आज्ञा आवी कि आखा जग माय वाला माणहान नाव लिखाय जाणे.

² जिच पेल्ली नावनिशानी ता टायीमा एनी, तेवी क्विरीया सिरीयान सूर्यान सभेदार एतो.

³ ताहेरया माणहे नाव लेखणेन केरता आप आपणाह नगराम आवा.

⁴ सेवट योसेफ पुण ज्यानकेरता कि तो दाविदान घेरामायवालू, एने वंशान एतो, गलीलातमाय नासरेथ गावाम यहूदियामाय दाविदान गावाम बेथलेहेमामाय गीयो.

⁵ कि आपणी मांगणी एईल मरियम हेरी जी पेटावाली एती नावे लेखली,

⁶ तान न्या रेथे येतो तान जेल्मो आपणेन दिह पुरो एय गीयो,

⁷ एने तिने आपणो पोयलोच सोरा जेल्मो आपील एने ताह फाडकाम वेटाळीन गव्हाणीत मिलील; कारण तान केरता धर्म शाळेम जागो नाहां एती.

स्वर्गदूता द्वारा गोवाल्याह संदेश

⁸ एने ता देशाम कोलाक मेंढपाळ एता, जे राती मैदानाम रेयीन आपणो कळपाचे होमालताला.

⁹ एने प्रभुन एक दूत आवीन तान उगे उबरील रेणू, एने प्रभुन तेज तान चारू बाजूमाय चोमेकना, एने ते जुलुम बियीन गीया.

¹⁰ तेवी स्वर्गदूत तांह केयील, “बिवू मां; देखू काहाकाय मी मोठली आनंदन सुवार्ता होमलाड थु जी आखां माणहान केरीन हि

¹¹ का आज दाविदान नगरामाय तुमरीकेरता एक उद्धार केरता जन्मो लीईल हि, एने ज्योस यीशु प्रभु हि.”

¹² एने ज्यान तुमरीकेरता जिच खुन कि तुमूह एक सोराह फाडकाम गुंडालेल एने गव्हाणीत नाहील देखणे.

¹³ तेवी उचकाहूस ता स्वर्गदूता हेऱ्या स्वर्गदूतांन टोलो बोगवानान स्तुती केरतीन लागो, एने ज्यो केताला देखाना,

¹⁴ “आकाशामाय बोगवानान महिमा एने पृथ्वीपोर ता माणहामाय जां से तो प्रसन्न हि, शान्ति एय.”

गोवाल्यान बेथहेमाय जाणो

¹⁵ स्वर्गदूत ताफायरीन स्वर्गाम निकलीन गीया, तेवी मेंढपाळानी आपसामाय कियील, “आवो आपु बेथलेहेम ला जावू हि वात जी एनी हि, एने ज्याह प्रभुन आमूह कियील हि, देखहु.”

¹⁶ एने ते लागीच जाइन मरियम एने योसेफाह, एने ता सोराह दोरकोठा मेलील देख्या.

¹⁷ ताह देखीन तास हि वात जी ज्याह सोरान विषयी ताह केदाह गीयी एती प्रगट एनी,

¹⁸ एने आखा होमलणारे ता वातूस जी मेंढपालानी ताह कियील आश्चर्य किरील.

¹⁹ पुण मरियम हे आखा वातू आपणो मोनाम मेलीन विचार केरतीन रेणी.

²⁰ एने मेंढपाळाने जोहलो ताह केदाह गीया एता, तोहोलोच आखा होमलीन एने देखीन बोगवानान महिमा एने स्तुती केरतीन निकलीन गीया.

यीशुन नावकरण

²¹ ताहेरया आठ दिह पुरो एय गीयो एने तान खतनान दिह आविलपोर, तर तान नाव यीशु मिलील गीया जे स्वर्गदूतांन तीन पेटामरीन आवणारा पेलूच कियील एता.

मंदिर मा यीशुन अर्पण

²² ताहेरया मुसान व्यवस्था तान शुद्ध ला दिह पुरो एय गीयो, तेवी तो ताह यरूशलेमाय लीन गीया, कि प्रभुन सुमोर आवी,

²³ जोहलो कि प्रभुन व्यवस्था माय लिखील हि: “प्रत्येक पेल्लो प्रभु केरता पवित्र ठेरणू.”

²⁴ एने प्रभुन व्यवस्था वचनामाय, “आलणेन एक जोड, नाहं तर कबुतर चे दुय पिल्ले” लीन बलीदान केरुहू.

शिमोनान गाणो

²⁵ यरूशलेम माय शिमोन नावान एक माणुह एतो, एने तो माणुह धार्मिक एने भक्त एतो; एने इस्राएलान शान्तिन वाट दिखिह एतो, एने पवित्र आत्मा तापोर एतो.

²⁶ एने पवित्र आत्मा द्वारे ताह प्रकट एय गीयो एता कि जो ताहवोर तो प्रभुन मसीहान देखीन नाहं लेतेन, तो ताहवोर मारणार नाहं.

²⁷ तो आत्मान हिकाडणे मंदिरामाय आवा; एने ताहेरया आहाक एने आबुक ता सोरा यीशुह आहने लावील, कि तान केरता व्यवस्थान नुसार केरूह.

²⁸ तेवी तान ताह आपणो मांडीम लीईल एने बोगवानान धन्यवाद आपील कियील:

²⁹ हे स्वामी, ऐवी ताहवोर तू आपणो दासाला आपणो वाचणेन नुसार शान्ति से सोडीन आपथु,

³⁰ कारण मारो डोलाकेरिन तारो उद्धाराह देख लीईल हि,

³¹ ज्याह तू आखा देशान माणाहान ओगाण तियार किरील हि,

³² का तो अन्यजात्यूह सत्य प्रकट केरणेन केरीन एक ज्योती एय, एने तारा निवाडील माणहा इस्राएलान महिमा एय.

³³ तान आबुक एने ज्यान आहाक आवो वातूनकेरता जी तान विषयाम कियील जात एती, आश्चर्य केरतीन एता.

³⁴ तेवी शिमोनान ताह आशीर्वाद आपील, तान आहाक मरियम कियील, “देखू, तो तर इस्राएलमास जादा बुंदे पडणे, एने उठवणे केरता, एने एक इही चिन्ह एणेन केरता ठेरना गीया हि, तान विरोधामाय वातू केरील जाहो.

³⁵ नापून तारो जीव पुण ताल्वारीन आरपार छेदुन जातीमाय याफायरीन जादा हृदयाचे विचार प्रकट एती.”

हन्नान गवाही

³⁶ अश्शेरान वंशामाय वालो हन्ना नावान फनुएची सोरी एक भविष्यवाणी केरणारा एती. ती जुलुम वृद्ध एती, एने वाराड एईल ओवतो सात वर्ष आपणो वूवोडू हेरी रेय शकली एती.

³⁷ ती चौऱ्यांशी वोरीह रीन विधवा एती: एने मंदिराह नाह सोडताली पुण उपास एने प्रार्थना केरी-केरीन रात-दिह भक्ति (उपासना) केरताली

³⁸ एने ती ता तेवीच आवीन प्रभु बोगवानान धन्यवाद केरणे लागिल, एने ताह आखा, जा यरूशलेमान सुटकान वाट जोवताला, ताहारी जाइन तान बारामाय केणे लागिल.

नासरथमा वापस

³⁹ ताहेरया ते प्रभुन व्यवस्था पोर आखा काही पुरो केरीन एय गीयो गलील आपणो नगरामाय नासरेथाह पोशा निकलीन गीया.

⁴⁰ एने सोरा वोदणार, एने बलवान एते गीयो, एने बायहे परिपूर्ण एता गीयो; एने बोगवानान अनुग्रह उपेर एतो.

मंदिरामाय आत्योचने यीशु

⁴¹ तान आहाक आबुक प्रत्येक वर्षी फसहनान तिवार ओवतो यरूशलेम माय जात एती.

⁴² तेवी यीशु बारा वोरह्यान एनो, तेवी ते पूर्वीवालो रीतीन नुसार यरूशलेम माय गीया.

⁴³ तेवी ते ते दिह पुरो केरीन निकालणेन लागिल, तर सोरा यीशु यरूशलेम माय रेयीन गीयो; एने हे तान आहाक डायडायहा मालूम नाह एता.

⁴⁴ ते हे होमजाडणे एता कि तो दिहीरा प्रिनाशा बरोबर रेंय, एक दिहान प्रिनास ओगाण किरील: एने ताह आपणो घेरल्या माय एने ओलखातीन माणहामाय होदणेन लागिल.

⁴⁵ पुण तो जुडना नाहं, तर ते होदतेन होदतेन यरूशलेम माय पोशा निकलीन गीया,

⁴⁶ एने तीन दिह ओवतो तास ताह मंदिरामाय गुरुजनामाय बोहील तान होमेलतेन, एने ताह प्रश्न फुसतालोन देखील.

⁴⁷ जोलाक पुण तान होंबलेह एता, हे आखा तान बुद्धी उपेरीन एने तान उत्तरासे भोगलाईन एता.

⁴⁸ तेवी ते ताह देखीन भोगलाईन एय गीयो एने तान आईकने ताह बोलिल, “हे सोरा, तू आमरा हेरी ओहलो का वेवारो किरील? देखू, तारो आबुक एने मी तुवाह कष्टी एय होदणे लेतेन एतो?”

⁴⁹ तो ताह कियील, “तुमूह माहु काहा होदताला एता? काय तुमूह मालूम नाहं कि तुमूह माहु मारो आबाकने घेराम एय या मालूम नाहाकाय?”

⁵⁰ पुण जीवात तास ताह कियील, तान ताह होमजाली.

⁵¹ तेवी तो तान हेरी गीयो, एने नासरेथ माय आवा, एने तान वंशामाय रेणू; एने तान आईकने हि आखा वातू आपणो मोनाम मिलील.

⁵² एने यीशु बुद्धीसी एने डीलाकेरिन, एने बोगवानान एने माणहान अनुग्रहात वाढते गीयो.