लुका 19 - नाहाली

जक्कय ने घेर यीशु

¹ एवी यीशु यरीहोमाय प्रवेश केरील एने तामायरीन तो ओगाण जात एतो.

² ताहारी जक्कय नावान एक माणुह एतो, तो करवसुली केरणारान मुख्य एतो.

³ ताह यीशुह देखताला एता कि काल्ल्हा हि. पुण ताह गर्दीमुळे दिसत नाह एतो, कारण तो बुठकु एतो.

⁴ तेवी ताह देखणेनकेरिन तो एक उबरान झाडापूर चेढील, कारण यीशु तान वाटीन जाहू एतो.

⁵ ताहेरया यीशु तान जागे पोचना तेवी उपेर देखीन तान कियील, “हे जक्कय, जेल्दी उतरीन आव; कारण आज माहु तारो घेराम रेणेन हि.”

⁶ तो आनंदमाय उतरीन आपणो घेराम लीन गीयो.

⁷ हे देखीन आखा माणुह कुरकुर केरूह केणेंन लागिल, “तो तर एक पापी माणहान घेराम गीयो हि.”

⁸ जक्कयान उबरीयेल रेयीन प्रभुह कियील, हे प्रभु, मी आपणी अर्धी संपती गारीबांह आपथु एने जर कुणान काही पुण अन्यायाने लीईल हि तर ताह चार पट्ट पोशा केरुहू.

⁹ तेवी यीशु ताह कियील, “आज आवो घेराह उद्धार प्राप्त एय गीयो हि तामुळे हा पुण अब्राहामान सोरो हि.

¹⁰ कारण माणहान सोरो टाकाईयलाह होदणे केरता एने तान उद्धार केरणेन केरता आवा हि.”

दोह शिक्का

¹¹ ताहेरया ते ज्याह वातू होंबलेह एता तर तान एक वार्ता कियील, ज्यानकेरता कि तो यरूशलेम आहने एतो, एने ते होमजाडणे एता कि बोगवानान राज्य ऐवी प्रकट एय हि.

¹² केरीन तान कियील, “एक श्रीमंत माणुह सेटो देशाम चालहु म्हणजे तो राज पद मेलावीन फिरीन आवूह.

¹³ तान आपणो दासामाय दहा जाणाह हादाडळीन ताह दहा शिक्का आपील एने ताह कियील, मी पोशा आवूह ताहउर लेनदेन केरुहू.

¹⁴ पुण तान नगरात रेणारे ताहेर्यो द्वेष केरुहू एने तान पासाण वकिलान द्वारे केयीन मोकलील कि आमूह नाहं जुवी कि हा आमऱ्येपुररीन राज्य केरुहू.”

¹⁵ “ताहेरया तो राज पद मेलावीन फिरीन आवा तेवी इही एय गीयो कि आपणो दासांना ज्याह तान रोखडी आपील एता आपनेहेऱ्यो हादाडळीन लावील म्हणजे मालूम केरुहू कि तान लेनदेन ने काय-काय कोमाईल.

¹⁶ तेवी पेल्लाचने आवीन कियील, हे मालिक, तारो शिक्क्याने मी दहा शिक्का कोमाईल हि.

¹⁷ तो ताह कियील, धन्य, हे हाजो दासान जादा एने थोडो माय विश्वास योग्य निकलील ऐवी दहा नगरापोर अधिकार मेलील.

¹⁸ दिहरो आवीन कियील, हे मालिक, तारो शिक्क्याने मी आजू पाच शिक्का कोमाईल हि.

¹⁹ तान ताह पुण कियील तू पुण पाच नगरांम अधिकारी एईन जा.

²⁰ तीस-याने आवीन कियील, हे स्वामी, देखू तारो हा हिकू हि ज्याह मी घासाडीमाय बांधीन मिलील हि.

²¹ कारण मी तुवाह बियीईन एतो ज्यानकेरता कि तू कठोर माणुह हि जे तू किरील नाहं ताह विसीन लेणे एने जे तू पेरील नाहं ताह तू काटीह.

²² तो ताह कियील, हे दुष्ट दासान, मी तारीच मुया केरीन तुवाह दोषी ठेरावीन हि तू माहु जाणांम एतो कि मी कठोर माणुह हि जे मी मिलील नाहयेतोतो मी विसीन लेणे एने जे मी पेरील नाहं ते मी काटीह;

²³ तर तू मारा सावकाराउगी का मिलील नाहं कि मी आवीन व्याजाहे-रो लीन लीईल हि.

²⁴ जे माणुह आहने उबरीयेल एता तो ताह कियील तो शिक्का ताफायरीन लीन ली एने ताह दया ज्याफाय दहा शिक्का हेते.

²⁵ तो ताह कियील, हे स्वामी, ताफाय तर दहा शिक्का तर हेते?

²⁶ मी तुमूह किथु कि ज्याफाय हि ताह आपील जाय; एने न्यानहेऱ्यो नाहं ताफायरीन तो पुण लीन लीईल जाय जो ताफाय हेते.

²⁷ पुण मारो ता दुश्मना ज्याह लागणे नाह एता कि मी तां पोर राज्य केरूह ताह न्या मार ओगाण आवीन तानकेरीन घात केरू.”

यरूशलेम माय विजय प्रवेश

²⁸ हि वात केयीन तो यरूशलेमान तान ओगाण-ओगाण गीयो.

²⁹ ताहेर्यो तो जैतुन नावान डोंगरापोर बेतफगे एने बैथानी आहने पोचना, तेवी तान आपणो चेला मायरीन दुय जाणाह ज्यो केयीन मोकलील,

³⁰ ओगाणवालु गावाम जा; एने तामाय पोहोचताच एक गेदडान पिलो जीपोर केविज कूण प्रवेश किरील नाहं बांधीन मिलील तुमूह जुडी ताह सोडीन लीन आवो.

³¹ जर कूण तुमूह फुसहु कि काहा सोडनु, तर ज्यो केणेन कि प्रभुह ज्ञान गिरीज हि.

³² ज्याह मोकलील एता तास जाइन ताह कियील एता, तोहोलोच देखाईल.

³³ जेव्ही तो गेदडान पिलाह सोडथू एता, तेवी तान मालकाह ताह फुसील, ज्या गेदडान पिलाह का सोडथू हि.

³⁴ तान कियील, प्रभुह ज्ञान गिरीज हि.

³⁵ तो ताह यीशु हेऱ्यो लीन गीया एने आपणा फाडका ता पिला पोर टाकीन यीशुह तापोर बोहाडीन आपील.

³⁶ जेव्ही तो जात एतो तेवी तो आपणा फाडका वाटी पुर मेलतांलोन जात एता.

³⁷ आहने आविह एतालून ताहेरया तो जैतुन डोंगरान उतरनीपोर पोचना तेवी चेला आखीच कलीसिया ता आखा सामर्थ्यान कामान वजसे जे तास देखील एता आनंदित एईनमोटला शब्दान बोगवानान स्तुती केरूह लागिल,

³⁸ “धन्य हि तो राजा, जो प्रभुने नावान आवथू! स्वर्गाम शान्ति एने आकाशगंगेत स्तुती ओहलो”

³⁹ तेवी गेर्दीमाय वालू काही फरीसी केणेंन लागिल, “हे स्वामी, आपणो चेला जुल्यो.”

⁴⁰ तान उत्तर आपील मी तुमूह किथु, जर ज्यो ठावको रेहू तर दिगुड आयडणार.

यरूशलेमान केरता दुख

⁴¹ ताहेरया तो आहने आवा तेवी नगराला देखीन तो रेडील.

⁴² एने कियील कोलाक हाजो एय गीयो हि कि तूच आवो दिहा एने हाजो वातूह समजील हि पुण ऐवी ते तारो डोळ्याने लिकाईन गीया हि.

⁴³ काहाकाय ता दिह तारपोर आवीती का तारा दुसमोन होम्च्यू केरीन तुवाह बांधीन एने चारुबी उखररीन तुवाह दाबती;

⁴⁴ एने तुवाह एने तारो सोराह जा तुमरीमाय हेते, माटळ्याम मेलावणार एने तारेपोर देगडापूर दिगुड भी नाय मेली; काहाकाय तू ता वेलाह नाह सोमजनो तारपोर कृपा-दुष्टी केरील एती ती तू ओलखणु नाहं.

मन्दिरान सफाई

⁴⁵ तेवी तो मंदिरामाय जाइन वेचणाराह बाहेर काडने लागो.

⁴⁶ एने तांह केयो, लिखील हि; मार घेर प्रार्थनान घेर रेंय, “पुण तुमु ते ताह डाकून गुफा बोणाव दियील हेते.”

⁴⁷ तो दाडीन मंदिरामाय लिकाडतालु आपतेन एतो; एने मुख्य याजक एने शास्त्री एने माणहान प्रमुख तान नाश केरणेन केरता योग्य टाइम होदतेन एता.

⁴⁸ पुण कायीच उपाय काडीन शकले नाहं कि, हे कायताहा प्रकारे केरुहू कारण आखा माणुह मोठला आवडीने तान होंबलेह एता.