लुका 18 - नाहाली

विधवा एने अधर्मी न्याय केरणार

¹ तेवी यीशु तान विषयाम नित्य प्रार्थना केरावी एने तुट गीयो नाहा हा वार्ता कियेल.

² “कूण एक नगरामाय न्यायाधीश रेथे एतो; तो बोगवानान बियीईन नाह एतो एने काल्लूच माणहान पोरेनदीही केरतीन नाह एतो.

³ ता नगरामाय एक विधवा रेथे एती, जी तान आहने आवीन आवीन किथी एती, मारो न्याय चुकाडीन माहु मारो कर्जदाराफायरीन वाचाढो.”

⁴ काही टाइम ताहवोर तो ते मानू नाहं पुण सेवट मोनाम विचार केरीन कियील, जर मी बोगवानान बियीईन नाहरेने, एने माणहान कालजी केरता;

⁵ तेभी हि विधवा माहु त्रास आपतेन रेथू, ज्ञान केरता मी तीन न्याय केरूह, केध्दीह इही होवो कि घडी घडी आवीन माहु त्रास आपुह.

⁶ प्रभु कियील, “होमलू, हे अधर्मी न्यायी काय किथे?

⁷ ज्ञान केरता काय बोगवान आपणो निवाडीलाहा न्याय तो केरुहू नाहं का, जो रात दिह तान धावा केरणू? काय तो आपणो विषय माय टाइम लागाडूह?

⁸ मी तुमूह किथे, तो चालूच तान न्याय केरूह तेभी पुण माणहान सोरो पृथ्वी उपेर न्यावालो तेवी ताह पृथ्वीपोर विश्वास रेंय काय?”

कूण धर्मी ठेहराय?

⁹ तो तान उगेरीन तापोर विश्वास मेलतांलोन एता, कि आमु धार्मिक हि, एने दिहीरा तुच्छ मानत एता, जोस वार्ता कियेल:

¹⁰ “दुय माणुह मंदिरामाय प्रार्थना केरणेन केरता गीया; एक फरीसी एने दिहरो जकात लेणार.”

¹¹ फरीसी उबरील रेयीन तान मोनाम प्रार्थना केरूह लागिल, “हे बोगवान मी तारो धन्यवाद करने कि मी दिहीरा माणहा सारखो टेगनारा अन्यायी, एने व्यभिचारी नाहं एने नाहं चुंगीलेणारा सारखो हि.

¹² मी आठवड्या मायरीन दुयीवारी उपास मेलीही; आपणो कोमाईन दहावा भाग पुण आपथु.”

¹³ “पुण जकात लेणार सेटोच उबरील रेयीन, स्वर्ग उगे देखहुं ईच्छी, नाहं तर आपणी छाती ठोकीन ठोकीन कियील, हे बोगवान पाप्यापोर दया केर.

¹⁴ मी तुमु किथु कि तो दिहरो नाह, पुण ज्योच माणुह धर्मी ठेरील एने आपणे घेर जाईल; कारण कि जो कूण जीवाह मोठू बोनाडी, ताह आत्यो केरणेन आवी; एने जो जीवाह आत्यो बोनाडी ताह मोठू केरणेन आवी.”

बोगवानान राज्य आतल्या सोरान होस

¹⁵ ओवतो माणहे आपणो सोराह पुण तान आहने लावणेन लागिल कारण तो तापोर आथ मेलील एने; पुण चेलाह देखीन ताह जुल्यो.

¹⁶ यीशु सोराह आहने हादाडळीन कियील, “सोराह मारो उगे आवणे दिवू, एने ताह नाह केहू मा; काहाकाय बोगवानान राज्य तान सारख्या ताणुच हि.

¹⁷ मी तुमूह खेरो किथे कि जो कूण बोगवानान राज्या सोरोन हारका स्वीकार केरुहू नाहं तो तामाय केधीच प्रवेश केरूह शकणार नाहं.”

एक मालदारान यीशुह प्रश्न

¹⁸ कूण एक अधिका-याने ताह फुसील, “हे हाजो गुरु, अनंत जीवनान अधिकारी रेणू केरता मी काय केरूह?”

¹⁹ यीशु ने ताह कियील, “तू माहु हाजो का केणे? कुनुस हाजो नाहं केवळ एक, अर्थाम बोगवान.”

²⁰ तू आज्ञाना जाणीह: “व्यभिचार नाहं केरुहू, हत्या केरूह मा, एने चोरी केरणेन नाहं, खोटी गवाही आपुह मां, आपणो आबुक एने आपणो आहाकान आदर केरहू.”

²¹ तान केयेल, “मी तर आवो आखाह जुवान पणा तारीन देखतालु आवूह हि.”

²² जो यीशु ने ताह केयेल, “तुमरीम ऐवी पुण एक वातून थोडो हि आपणा आखा काही पाकील गारीबांह आपिन टाक; एने तुवाह स्वर्गाम धन जुडी, एने आव चाल मारो पासाण आव.”

²³ ज्यो होमलीन तो जुलुम नाराज एनो, काहाकाय तो जुलुम श्रीमंत एतो.

²⁴ यीशु ताह देखीन कियील, “धनवानान बोगवानान राज्यामाय प्रवेश केरीन कोलाक केठीन हि.

²⁵ बोगवानान राज्यातम धनवान केरता प्रवेश केरणेन केरता उंटळान हुईन नाकाम जाणू सोपो हि.”

²⁶ ओवतो उपेरीन होमलणार कियील, “तर ओवतो कुणीन उद्धार एहू शकणे?”

²⁷ तान कियील, “जो माणहा फायरीन नाहं एहू शकत, तो बोगवान फायरीन एहू शकते.”

²⁸ पतरससान कियील, “देखू आमु तर घेरदार सोडीन तारो पासाण आवा हि.”

²⁹ तान ताह केयेल, “मी तुमूह खेरोच किथु कि ओहलो कुणीचनाह जो बोगवानान राज्या केरता घेर किवा बायकू, किवा बाहाक, किवा आई-आबाक किवा सोराह सोडीन आपील हि.

³⁰ एने आवो टाइम मोक्तास पटीने जुडील नाहं एने आवणारा युगात अनंत जीवन.”

पुनरुस्थानान भविष्यवाणी

³¹ ओवतो तो बाराजणान हेरी लेईन जाइन ताह कियील, “देखू, आमु यरूशलेमाम जातेन, एने जोलाक वातू माणहान सोरोनकेरता भविष्यवक्ता द्वारे लिखील गीया हि, तो आखा पुरो एय हि.

³² काहाकाय तो दिहरी जातीयांन आथाम होपील जाय, एने तो तान चेष्टा केरती एने तापोर थूपती,

³³ एने ताह फटके देती, एने घात केरती; एने तो तीन दिहामाय पोशो जीवतालू एय.”

³⁴ पुण तो ओवतो वातू मायरीन काल्लीज वात होमजील नाहं; एने ती वात तास लिकाईन मेलील एने जो कियील गीया एता तो तान लक्षांम आवा नाह एता.

आंधला भिखारीह डोला

³⁵ ताहेर्यो तो यरीहो आहने पोचना, तर एक आंधलो रोडान मेरापूर बोहीन भिख मांगतेन एतो.

³⁶ ती गेर्दीन जात वालाह आवाजा होमलीन फुसणे केरीन लागिल, “ज्यो काय एता हि?”

³⁷ तास ताह केयेल, “यीशु नासरी जात हि.”

³⁸ तेवी तो आयडीन कियील, हे यीशु दाविदान सोरा, मारो उपेर दया केरू

³⁹ जो ओगाण ओगाण जात एता, तो ताह जुलने लागिल कि ठावको बोह; पुण तो जास्तीस आयडणेन लागिल, “ज्यो दाविदान सोरा, मारपुर दया केरू”

⁴⁰ तेवी यीशु उबरील रेयीन आज्ञा आपील कि ताह मारो उगे लावो, एने तेवी तो आहने आवा तेवी तान ताह फुसील,

⁴¹ “तुवाह काय जुविकाय कि मी तारो केरता काय केरूह?” तान कियेल, “हे प्रभु ज्यो केर कि मी देखहुं शकेल.”

⁴² यीशु ताह कियील, “देखहुं फोलरेना तारो विश्वासान तुवाह हाजो किरील हि.”

⁴³ तेवी लागीच तो देखणेन लागिल, एने बोगवानान महिमा केरतीन तान पासाण निकलीन गीयो एने आखा माणहान देखीन बोगवानान स्तुती केरील.