लुका 16 - नाहाली

हुशार भण्डारी

¹ ओवतो यीशु आपणो चेलाह कियील, “एक श्रीमंत माणुह एतो तान एक कारभारी एतो, तापोर आरोप एतो कि तो संपत्ती निवरावीन हि.

² तेवी तान हादाडील एने कियील, तार बारामाय मी हे काय होमलथू? आपणो कारभारान हिशोब आप, काहाकाय ज्यान ओगाण तू कारभारी रेणू नाहं.

³ ज्यापूर कारभारी ने मोनाम विचार किरील, मारो मालिक मार्फायरीन कारभा-यान काम मांगत हि ऐवी मी काय केरूह? मारो उगे ऐवी ओलिक शेक्ती रेणी नाहं कि, मी खेताम जाइन खोदाई गाळणेन काम केरूह शकणे एने मागणेन माहु लाज लागीह.

⁴ हजो ऐवी समजील, कि माहु काय केरणे जूइ कि ज्यान उगेरीन ताहेर्यो माहु कारभारी पदापुरीन काडीन टाकील जाहू तेवी माणहे आपणो घेराम मारो सत्कार केरुहू.”

⁵ तेवी तान मालिक च्या प्रत्येक आपणारा हादाडील, पेल्ला माणहा तान फुसील, मारो मालकान तुवाह कोलाक देण हि?

⁶ तान कियील शंभर माप जैतुनान तेल, ज्यापूर तो बोल्णु हा ले तारो रोख, एने बोहीन जेल्दी ज्या फोलह केरीन आप.

⁷ ओवतो तान दिहीराह कियील एने तुवाह कोलाक देण हि? तान कियील, शंभर खड्या गोव, तो ताह कियील हा ले तारो रोखा एने शंभर चे ऐशी केरीन आप.

⁸ “ज्यापूर तान मालक्याने ता बेईमानी कारभारीन प्रशंसा किरील केरीन तान चतराई केरीन काम किरील. एता संसारिक माणुह आपणेहोस माणुह मुळे व्यवहारामाय अध्यात्मिक होवटो चेत्रो एय.

⁹ मी तुमूह किथे कि, अधर्म मालमत्ता केरता आपणा हेरी बोणावू कारण ताहेर्यो मालमत्ता निवरी तेवी अनंतरेणेन केरता तुमरो स्वागत केरती.

¹⁰ जे माणहे यापोर थोडाक केरता विश्वास किरील, जाहो एने ज्याह प्रमाणे ते थोडाक केरता बेईमानी, एहू केरसेक्तालू तो होवटो पुण बेईमानी एहू शकणे.

¹¹ ज्यानहोस जर तुमूह अधर्म मालमत्तापूर विश्वास मेलूह नाहं, तर खेरा धेन विषयी कूण विश्वास मेलूह?

¹² जे कूण दिहरान हि जर तुमूह तान केरता विश्वासाचे पात्र नाहा हे तो तर जे तुमरो हि, ते तुमूह कूण आपण्यू?”

¹³ “काल्लोच दास दुय मालीकान चाकरी केर सकीत नाह: कारण तो एकापुर प्रेम केरी एने दिहरापुर रोग मेली; एने एका हेरी मिलिन रेय एने दिहरा खराब जाणी, तुमु भी बोगवान एने धेन ज्या दुयुन सेवा नाह केर शकते.”

बोगवानान राज्यान किंमत

¹⁴ फरीसी जा लोभी एता, ताहेर्यो हे होमलीन तान जुलुम मोजाक केरील.

¹⁵ तो ताह कियील, “तुमूह ते माणहान ओगांण स्वताह धर्मी सोमजणु पुण बोगवान तुमरा मोनाह ओलखणे, काहाकाय जी वस्तु माणहान ज्याह जुलुम किमती होमोजणु ता बोगवानान ओगांण अशुद्ध हेते.”

¹⁶ यूहन्नाफायवुर व्यवस्था एने भविष्यवक्तान मुख्यता एता ताबादमाय बोगवानान राज्यान सुवार्ता पोरचार केरील जात हि एने प्रत्येक माणहे मोठला प्रमाणाम ताफाय खेचेल जात हि.

¹⁷ आकाश एने पृथ्वी नाहीशी एय पुण व्यवस्था मायरीन एक भी बिंदूह निकाल देणे से सहज हि.

¹⁸ “जो कूण आपणी बायकू सोडीन दिहरा बायकू हेर्यो वाराड केरीह, तर तो व्यभिचार केरीह एने जो ओहली सोडील बायकू हेरी वाराड केरीह तो पुण व्यभिचार केरणे.

मालदार माणुह एने गरीब लाजर

¹⁹ “ऐवी देखू, एक माणुह एतो तो जुलुम श्रीमंत एतो तो जांमणी तलम फाडका घालीत इही एने प्रत्येक दिह थाटामाटाम जीवनान आनंद लेतेन एतो.

²⁰ तान जागापूर लाजर नावान एक गरीब दुखी तान दरिनाजाआहणे पोडीन रेथे एता तान डील फोडाच्या जेखमान भूरील एता.

²¹ ता श्रीमंत माणहान उष्ट पुडील तान पेट बोरणेकेरता तो तडफत एतो न्याओर कि चिताह आविह एता एने तान जखमेपोर चाटत एतो.

²² एने ओवतो इही एय गीयो कि तो गरीब माणुह मोरणु तेवी स्वर्गदूत आवीन ताह लीन गीया एने अब्राहामान गोदमाय जाइन बोहाडया तो श्रीमंत माणुह पुण मारीन गीयो ताह जोमनि माय गाळील.

²³ नरकात ताहेर्यो तडफत येतो ताहेरया तान आपणा डोला उपेर केरील तेवी अब्राहाम जुलुम सेटो दिसत एतो पुण तान लाजरला तान गोदमाय देखील.

²⁴ तेवी तान आवाज आपील कियील, आबुक अब्राहामान, मारपुर दया केर एने लाजराला मोकील कि तो आपणी मुंदी पाणीम बुडाविन मारी जीभ थेन्डो केरीन आपजी काहाकाय मी ज्याह आकठाम तडफत हि.

²⁵ पुण अब्राहामान कियील, हे मारो सोरा, एर तू तारो जीवन सहवासाम आपणी हाजी वस्तु मेलविल एने पुण लाजराला वाईट वस्तूच जुडी ऐवी तो याहारू आनंद केरतीन हि एने तू त्रास केरतीन हि.

²⁶ एने ज्याह आखा परिस्थितीम आमरा एने तुमरो माय एक मटली खाई हि जानकेरता कि जर कूण तुमरेहे-यो आवहू इच्छितो तेभी ताह जाता आवूह नाहं एने तारीन कोणीही याहारू आविह आवूह नाहं.

²⁷ ता श्रीमंत माणहान कियील, तर ओवतो हे आबुक मी तुवाह विनंती करने कि लाजराला मारो आबाकने गिर मोकील.

²⁸ कारण मारा पाच बाहाक हेते तो ताह चेतावणी आपुह जानकेरता कि तास तेभी ज्याह त्रास हुवांरनी जागीपोर आवहू नाहा.

²⁹ पुण अब्राहामने कियील, तान आहने मुसा हि एने भविष्यवक्तान पुस्तक पुण हि ताह तान होमलूह आप.

³⁰ श्रीमंत माणहे कियील, नाहं आबुक अब्राहामान, जर कूण मुरील मायरीन ताहेऱ्यो जाहो तर ते मोन फिरिनिणार.

³¹ अब्राहामने ताह कियील, जर ते मुसा एने भविष्यवक्ता तान होंबलेह नाहं तर जर कूण मुरील मायरीन जीवतालू एहू तान आहने जाहो तेभी ते मानणार नाहं.”