लुका 15 - नाहाली

टाकायील मेंढरान वार्ता

¹ ऐवी ताहेर्यो चुंगी लेणार एने पापी आखा तान होमलानेन तान आहने आविह एता.

² तेवी फरीसी एने यहूदी धर्मशास्त्री बोडबोड केरतीन कियेल, “हा माणुह तर पापी माणहान स्वागत केरीन हि एने ताहेऱ्यो जेवण केरतीन हि.”

³ ज्यापूर यीशु ताह हा वार्ता होमलायेल:

⁴ “होमजू तुमरे माय वालो कुणी फाय शंभर मेंढरे हेते एने तामायरीन एक टाकाईल तर काय तो नव्याण्णव मेंढरे जेंगलामाय सोडीन ते टाकायेल पासाण जाहो जेवीवोर ते सापडील नाहं.

⁵ ओवतो ते मेंढरो ताह सापडेल, तेवी ताह आनंदमाय ताह आपणो खांद्यापूर विसीन लेणे;

⁶ एने ताहेर्यो तो गिर पोशा जाथू तेवी आपणो दोस्ताहा एने शेजाऱ्यांना आहने हादाडळीन ताह किथे, मारहे-या आनंद केरू काहाकाय मारा टाकाईल मेंढरो सापडील हि.

⁷ मी तुमूह किथी हि ज्यानहोस कुणी एका मोन फिरावणारान पापी केरता, ता नव्याण्णव धर्मीन एदम्यारीन, ज्याह बोदलणेन जरुरत नाहं स्वर्गाम आनंद किरील जाहो.”

टाकायील सिक्कान वार्ता

⁸ “किवा होमजू कूण बायकू हि, जीफाय दहा चांदीन सिक्के हि एने, तीन एक शिक्का ढाकणे तर काय ती दिवू लागाडील घेराम जेविपोर झाडत रेंय, एने लक्ष आपील होदेह रेहू जेवीवोर ते सापेडतालो नाहं?

⁹ एने ताहेर्यो तीह ते सापडीलील तेवी ती आपणो दोस्ताहा एने शेजाऱ्यांना आहने हादाडळीन केनार, मारहे-या आनंद केरू काहाकाय मारो शिक्का जो टाकाईल एतो तो सापडील हि.

¹⁰ मी तुमूह केणेन कि ज्यानहोस एक मोन फिरावणार पाप्यान केरता पुण बोगवानान दूतांन उपस्थित ताजागेन आनंद किरील जाहो.”

उड़ाऊ सोरान वार्ता

¹¹ ओवतो यीशु कियील, “एक माणहान दुय सोरा एता.”

¹² आत्या सोरो आपणो आबाक कियील, “जी संपती मारो वाटान हि, ती संपती माहु आपील आप” तेवी आबुक आपणो दुयसोराह संपत्ती वाटीन आपील.

¹³ एविवूर जुलुम टाइम एनी नाहां एती, कि आत्या सोरो आपणी संपत्ती लीईल एने सेटो देशाम जाणेन निकलील, एने ताजागेन मोज्यामारणे केरीन आपणी आखा मालमत्ता विसीन टाकील.

¹⁴ ताहेर्यो तान आखा संपती निवरील एती तेविरीन ता देशाम भयानक दुष्काळ पोडील एतो तेवी तो अडचणीम रेहू लागिल.

¹⁵ जानकेरता तो ता देशाम कुणी माणहाउगी जाइन. मोजरीन केरूह लागिल तान ताह आपणो खेताम डुकरे चारणे केरता मोकलीन आपील.

¹⁶ ताजागेन तान विचार किरील कि ताह मुंग्या खाणेन जुडी, जे डुकरे खाणे एता, पुण कूण ताह एक मुंग्या पुण आपील नाहं.

¹⁷ ओवतो ताह ताहेर्यो तो शुद्धीपूर आवा तेवी बोल्णु, मारो आबाक फाय इही कोलाक मोज-या हि ताहेऱ्यो खाइन पुण उगरी एने मी न्या उपाशी मोरतालू हि.

¹⁸ ऐवी मी यारीन मारो आबाक फाय जाह एने ताह केहू, “आबुक मी स्वर्गान बोगवान एने तार विरुद्धामाय पाप किरील हि.”

¹⁹ ऐवी ओगाण मी तारो सोरो केणेन केरीन योग्य नाहं माहु आपणो मोज-या होमजाडीन मेलीन ले.

उड़ाऊ सोरान वापस आवणो

²⁰ तेवी तो उठीन आपणो आबाक फाय निकलील ऐवी तो काही अंतर सेटो वालू एतो, तेवी तान आबुक ताह देखील, एने तान आबाक तापोर जुलुम दया आवी तेवी तो दोवळतीन जाइन तान आपणो गेलामाय गळा रीगाडीन तान मुक्के लीईल.

²¹ “सोरो आपणो आबाक कियील, आबुक, मी तारो नेजेकेरीन एने स्वर्गान विरुद्ध पाप किरील हेते मी ऐवी तुमरो सोरो केणेन केरीन योग्य नाहं.”

²² पुण आबुक आपणो दासांना कियील, जेल्दी हाजो कपडे लावो एने ज्या ते रीगाडू तान आथाम मुंदी एने पायांम चाट्या रीगाडू.

²³ पुष्ट ओहलो पशु लीन काटू ताह खाइन आपु आनंद केरूह.

²⁴ काहाकाय जो मारो सोरो मोरणु एतो, ऐवी जोहलो जीवतालू एनो हि, हा टाकील एतो पुण ऐवी तो सापडील हि, तेवी ते आनंद केरूह लागिल.

मोठला सोरान केणो

²⁵ “ऐवी तान मोठू सोरो खेताम एतो. ताहेर्यो आवा एने घेरान आह्ने पोचना, तेवी तान गाण्य नाचणेन आवाज होमलील.

²⁶ तान आपणो एक दासाह हादाडळीन फुसील हे, आखा काय चालना हि?

²⁷ दासान ताह कियील, तारो बाहाक आवा हि, एने तारो आबुक सुरक्षित एने हाजो देखीन एक पुष्ट पशु काटील हि.

²⁸ मोठू बाहाक जादा किसवानु तो माय जातच नाह एतो तेवी तान आबुक बाहेर आवा एने ताह होमजाडील.

²⁹ पुण तान आबाक उत्तर आपील, देखू, मी वो-ह्यांनवो-हे तारी सेवा केरतीन आवा हि मी तारो काल्लोबी आज्ञा विरोध किरील नाहं पुण तुमूह माहु एक बोकडा आपील नाहं कि मी आपणो दोस्ती हे-यो आनंद केरूह.

³⁰ पुण ताहेर्यो तारो हा सोरो, आवा ज्यान वेश्यामाय आपणा आखा धन खेरचील, तान केरता तू मोठू पुष्ट पशु मारील.

³¹ आबुक ताह कियील, मारो सोरा, तू कायमने मारो आहने हि एने जे काही माहफाय हि ता आखा तारोच हि.

³² पुण आमूह आनंद एणेन जुवी एने तिवार साजरा केरुहू तारो हा बाहाक जो मोरणु एतो, ऐवी पोशो जीवतालू एनो; हि हा टाकाईल एतो, ऐवी सापडेल हि.”