लुका 13 - नाहाली

पश्चाताप केरो नाह ते नाश एवो

¹ ता टाइम ता जागापूर उपस्थित काही माणहान यीशुह ता गलीली विषयी कियील, तान रक्त पिलातुसान तान बलीहे-यो मेलावीन आपील एता.

² तेवी यीशु ताह कियील, तुमूह काय विचार केरणू, कि हे गलील अब्राहाम दिहीरा आखा गलीली अब्राहाम पेक्षा खराब पापी एता ताह ज्याह वातू भोगाव्या लागण्यू.

³ नाहं; मी तुमूह किथी हि जर तुमूह आपणा मोन फिरावील नाहं तर तुमूह पुण ओहलाच मोरी, जोहलो ते मोरणाह एता.

⁴ एने, ता अठरा माणहान विषयी तुमूह काय विचार केरता शिलोहामाय बुरुज पोडीन, ताह मारील: काय विचार केरता, ते यरूशलेम माय रेणार दिहीरा आखा होवटो अपराधी एता?

⁵ नाहं, मी तुमूह किथे कि जर तुमूह मोन फिरावील तर तुमूह आखा पुण तोहोलोच मोरहु.

बिगेर फोल वालो अंजीरान झाड

⁶ ओवतो तान हा वार्ता कियेल, “कुणी एक आपणो अंगूर मोलाम एक अंजीरान झाड लागाडील एता तो तापोर फोल होदेह आवा एतो पुण ताह मिलना नाहं.

⁷ ज्यापूर तान मालीह फुसील, ऐवी देखू, मी तीन वो-यावोर अंजीरान झाडाह फोल होदेह आवा हि पुण माहु एक पुण फोल जुडील नाहं जानकेरता ज्या तोडीन टाक हा जोमनि पोर वाया हि का हि?

⁸ मालीह ताह उत्तर आपील, हे गुरु, ज्या ज्याह वर्षी सोडीन आप, ताहउर मी ज्ञान आजुबाजू खाडो खोदीन खत पेरीन.

⁹ ओवतो ओंगाल्यो वर्षी फोल आपण्यू तर हाजो हि, जर फोल आपील नाहं तर तू ज्या तोडीन टाकु शकणे.”

कुबड़ी बायकूह हुदारणेन

¹⁰ कूनएक प्रार्थना सबामाय शब्बाथ एक दिह यीशु ताहेरया आराधनालय माय संदेश आपतेन एतो.

¹¹ तेवी ताजागेन एक ओहलो बायकू एती तिमाय दुष्ट आत्मा वास किरील एता तीह अठरा वर्ष विकारान एक बायकू एती ती डोगो पोडीन कुबडी एनी एती एने ती जारिक पुण हेल्लीच एता नाहां एती.

¹² यीशु तीह ताहेरया पेल्ला तेवी आहने हादाडील एने कियील, हे बायकू तुवाह आपणो बिमारीमायरीन मुक्त एनी इही किथे.

¹³ तीन मुंडीपोर आथ मिलील एने ती चालूच हेल्लीच उभी रेणी, ती बोगवानान स्तुती केरूह लागिल.

¹⁴ यीशु ने शब्बाथ एक दिह तीह हजो किरील जानकेरता कि प्रार्थना आराधनालयान मंत्र्यांनी किसवायल माणहाह कियेल काम केरणे सहा दिह रेणू तर ता दिहामाय आवो एने आपणा रोग सेटो केरू पुण शब्बाथ एक दिह दुखा-यो हजो केरूह नाहा.

¹⁵ ज्यो होम्लीन प्रभुने उत्तर आपतेन ताह कियील, “हे कोपटी, काय तुम्हुमाय प्रत्येक जाण शब्बाथ दिह आपणा बोईल एने आपणा गेदळाह सोडीन ताह पाणी पीणेन केरता लीन जात नाहं काय?”

¹⁶ ऐवी हि बायकू अब्राहामान सोरीह, एने तीह अठरा वर्ष शैतानान आथाम एती काय जीह शब्बाथ एक दिह तीन बंधनामायरीन तीह सोडवणू नाहं काय?

¹⁷ ताहेर्यो तान हे कियील, तेवी ताह विरोध केरणारा आखा माणहे लाजवाईन फजित एय गीया, ताजागेन आखा गेर्दी तान महिमा कामान वजसे जे तान किरील एता आनंद एय गीयो एता.

राईन दाणो एने खमीररान वार्ता

¹⁸ ज्या ठिकाणा पोर तान कियील, “बोगवानान राज्य केवी हेते एने मी तान मेल कायता हे-यो केरूह?

¹⁹ ते राईन दाणानगीत हि ज्याह कूण लीन आपणो जेंगलामाय पेरील ते मोठा एय गीयो एने एक झाड बुणील ओवतो आकाशामाय वालो चिडा फाकडानकेरिन आवीन तान डालखीम पांजरा बोणावणेन.”

²⁰ तान पोशो कियील बोगवानान राज्यान मेल मी कोहलो बरोबर केरूह?

²¹ ते खमिराणगेत हि, ज्याह एक बायाकू लीन तीन माप पिठामाय एने तो आखा टाकतालान खमीर सारखो एनो.

हाकडो दरिनाजो

²² यीशु ताहेर्यो नगरामाय एने गावाउगेरीन संदेश आपतेन यरूशलेम जात एतो,

²³ तेवी ताह कूण फुसील, “प्रभु काय थोलाकास माणहान उद्धार एय?” तो ताह कियील,

²⁴ “चोवडा दरवाजामाय रिगणेन केरता शक्योतो आखाच प्रयत्न केरू, काहाकाय मी तुमूह किथु कि आहने जाणेन प्रयत्न जादा केरती पुण जाता आवूह नाहं.”

²⁵ ताहेर्यो घेरान मालिक इकवारी उठीन बायणो बंद केरीन आपथु तर तुमूह बाहेर उबरीयेल रेयीन बायणो ठोकतेन केनार, “हे मालिक आमरे केरता बायणो उगाड दी” पुण तो तुमूह उत्तर आपुह, मी तुमूह ओलखित नाहं, तुमूह कारीन आवा हेते?

²⁶ तेवी तुमूह केनार, आमु तारहेऱ्यो खादा, तारहेऱ्यो पिईल, तू आमूह आमरा गेल्लीम शिक्षण आपील.

²⁷ पुण तो तुमूह केह, “मी तुमूह ओळखतेह नाहं तुमूह कारीन हेते ते? हे कुकर्म केरणारा मारो फायरीन पोडीन जा,

²⁸ तुमूह अब्राहाम, ईसाहाक, याकूब, तोहोलोच आखा भविष्यवक्तान बोगवानान राज्यामाय देखणार पुण तुमूह बाहेर डेकलीन आपणे माय आवी, ताहरी रेडनेन एने दात केकडावणू रेय.

²⁹ ओवतो पूर्व एने पश्चिम, उत्तर एने दक्षिण उगेरीन माणहे बोगवानान राज्यामाय आवीन जेवणान जागे आपणो जागे बोहती.

³⁰ लक्षांम रेहू दया कि ताजागेन जो सेवट हि, पेल्ला एय एने जो पेल्ला हेते तो सेवट एय.”

हेरोदेसान धोमकी

³¹ ता टाइम यीशु हेऱ्यो काही फरीसी आवा एने ताह कियेल, “हेरोदेस तुवाह मोरू इच्छितो जानकेरता यारीन एखादो जागापूर निकलीन.”

³² तेवी तो ताह कियील, जाव ता खोडकाला किजी, एक मी माणहा मायरीन दुष्ट आत्मांना काढहु, मी आज पुण हजो केरुहू.

³³ एने हेकालेबी ओवतो तिसऱ्या एक दिह मी जाणो जरुरी हि, काहाकाय ज्यो एय नाह सकीत का काल्लो भविष्यवक्ता यरूशलेम ने बाहार माराय जाय.

यरूशलेमान केरता दुख

³⁴ “हे यरूशलेम! हे यरूशलेम! तू भविष्यवक्तान जीव लेतेन हि एने बोगवानान ज्यान तारहेर्यो मुकलेल हि, तापोर दिगुड जगारनु हि मी कोलाक वारीन तारो माणहाह एक्ठाच केरतीन एता जोहलो एक कुकडी आपणो पिलाह आपणो फाडकान बुंदे एक्ठाच केरतीन हि पुण तुमूह पोटील नाहं.

³⁵ देखू, तार केरता तारो घेर बोगवानान द्वारे आपील हि मी तुवाह किथी हि, तू केरीन, धन्यवादीत हि तो जो प्रभुन नावान आविह हि तू मारी ता टायमापोरउर पोशो देखणार नाहं जेवीवोर टाइम आवी निह एय.”