लुका 11 - नाहाली

प्रार्थना हिकाडणो

¹ एक दिह तो काल्ली तेभी जागीपोर प्रार्थना केरतीन एतो. ताहेर्यो तो प्रार्थना केरीन निव्रावणे, तर तान चेला मायरीन एकजाण कियील, “हे प्रभु, जोहलो यूहन्नान आपणो चेलाह प्रार्थना केरणेन केरता हिकाडील, तोहोलो आमूह हिकाडीन आप.”

² तो ताह कियील, “जेवी तुमूह प्रार्थना केरुहू तर इही किवू: हे आमरा आबाक, तारो नाव पवित्र मानाय जाय, तारो राज्य आवी.

³ आमरा दिह बोरान रूटू दाडीन दिह आमूह आप्या केर.

⁴ आमरा पापान क्षमा केर, काहाकाय आमु भी आमरा अपराधीह क्षमा करणु, एने आमूह परिक्षाम लावही मां.”

मांगती रीवो

⁵ ओवतो तो ताह कियील, “तुमरो मायरीन कूण हि तो तान एक हेरी हि, एने तो अर्ध्या राती जाइन तान आहने केनार हे दोस्ती; माहु तीन रूटू आप.

⁶ काहाकाय एक प्रिनासी हेरी माहफाय आवा हि, एने तान ओगांण मेलणेन माहफाय कायीच नाहं;

⁷ एने तो मायरीन उत्तर आपण्यू, माहु त्रास आपुह मां; ऐवी बायणो बंद हि एने मारी सोरा माहफाय हि तामुळे मी उठीन तुवाह आपुह शकत नाहं.

⁸ मी तुमूह किथे जर तान हेरी असून पुण ताह आपतेन नाहं तेभी पुण लाज सोडीन मागणेन ताह आवश्यक एता तोला उठीन आपण्यू.

⁹ एने मी तुमूह किथु का मांगु म्हणजे तुमूह आपुह; होदू म्हणजे तुमूह जुडी; ठोकु म्हणजे तुमरीकेरता उगाडणे माय आवी.

¹⁰ कारण जो कूण मांगणे ताह जुडणे; जो होदणे ताह सापडी; एने जो ठोकणे तान केरता उगाडणे माय आवी.

¹¹ तुमरे माय ओहलो कूण हि आबुक हि, ता का तान सोरो रूटू मागी ताह दिगुड आपी, एने मासो मांगी तर ताह मासान बोदलाम ताह गेयळेक आपी?

¹² केव्ही इनंडो मागणार तर ताह विचू आपी?

¹³ जेवी जर तुमु खराब रेयने आपणा सोराह हाजाली वस्तु आपणेन सोमजीतेवी, ते तुमरो स्वर्गावालू आबुक तुमूह पवित्र आत्मा काहा नेय आपी.”

यीशु एने दुष्ट आत्मान अधिकारी

¹⁴ ओवतो तान एक मुक्का दुष्ट आत्माह काडील. ताहेर्यो दुष्ट आत्मा निकलीन गीयो तर मुक्का बोलणे लागिल; एने माणहाह आश्चर्य लागनो.

¹⁵ पुण तामायरीन काही जाणाह कियील, हा तर बालजबुल नावान शैतान दुष्ट आत्मान प्रधानान मदतकेरिन दुष्ट आत्मा काढी.

¹⁶ दिहरो तान परिक्षा केरणेन केरता ताफायरीन आकाशा मायरीन एक चिन्ह मागिल.

¹⁷ पुण तान मनामरीन वातू समजून ताह कियील ज्या ज्या राज्यातम फुट एता तो राज्य उजाड एईन जातेह; एने ज्या घेराम फुट पुळील तो नाश एईन जातेह.

¹⁸ जर शैतान जीवाचने विरोधी एईन जाहू तर तान राज्य केवी बोणावीन रेंय? कारण तुमूह मारो विषयातमाय केणु कि ज्यो शैतानान मदतकेरिन दुष्ट आत्मा काढी.

¹⁹ हाजो मी शैतानान मदतकेरिन दुष्ट आत्मा काढी तर तुमरी सोरा कुणीन मदतकेरिन काढवू? तावजेसे तोज तुमरो न्याय केरुहू.

²⁰ पुण जर मी बोगवानान सामर्थ्यान दुष्ट आत्मांना काडीन तर बोगवानान राज्य तुमरेहे-यो आवीन गीया हि.

²¹ ताहेर्यो बलवंत माणुह हत्यारे बांधीन आपणो घेरान रक्षा करने तेवी तान संपती वाचीन रेणेन.

²² पुण ताउगेरीन होवटो बलवंत तापोर चेढाय केरीन ताह जिंकीन लेणे तर तान ते हत्यार ज्यापूर तान विश्वास एतो साडाळीनि लेणे एने तान संपती साडाळीनि वाटीन आपथु.

²³ जो मारहे-या नाहं तो मारो विरोधामाय हि एने जो मारहे-या नाहं जो मारहे-या टुलू केरतीन नाहं तो उधळतो.

अशुद्ध आत्माह घेरान होद

²⁴ “ताहेर्यो अशुद्ध आत्मा माणहा मायरीन निकलीन जातेह तेवी हुखेल जागाम आराम होदतेन फिरणे एने ताहेरया जुडतो नाहं तर किथी मी आपणो तान घेराम जारीन निकालनु एतो फिरीन जाहू.

²⁵ एने पोशा आवीन तान झेडगेचा एने होबाडील देखील.

²⁶ तेवी तो जाइन आपणे केरता दुष्ट आत्मा उंजू सात आत्मांना आपणेहेर्यो लीन आवथू एने ती तामाय वस्ती केरथू एने ता माणहान पासणली परिस्थिती पिलरीन वाईट एईन जातेह.

²⁷ ताहेर्यो तो ज्याह वातू केताच एतो तेवी गेर्दीमाय एक बायाकू मोठला शब्दान कियील, धन्य हि ते पेट ज्यामाय तू रेणू एने धन्य हि ते स्तन ज्याह तू चुहील.

²⁸ तो ताह कियील हा; पुण धन्य हेते जा बोगवानान वचन होमेलनू एने मानणु.”

स्वर्गीय पुरावान मांग

²⁹ ताहेर्यो मोठली गेर्दी एक्ठाच एईन जमत एती तेवी तो केणेंन लागिल, ओवतो युगान माणुह वाईट हेते; तो चिन्ह होद्णु पुण योनान चिन्हा सोडीन दिहरा चिन्ह ताह आपील जाहू नाहं.

³⁰ तोहोलोज योना निनवेन माणहा केरता चिन्ह ठेरेल तोहोलोच माणहान सोरो पुण ओवता कालाम माणहा केरता चिन्ह ठेरणार.

³¹ दक्षिणान राणी न्यायान एक दिह आवी समयान माणहा हेऱ्यो उठीन ताह दोषी ठेरावणार काहाकाय तो सुलेमानाह ज्ञान होमलने केरीन पृथ्वीन टूकेरीन आवी, एने देखू, न्या तो हि जो सुलेमानारीन मोठू हि.

³² निनवेन माणुह न्यायान एक दिह आवो काळान माणहा हेऱ्यो उबरीयेल रेयीन ताह दोषी ठेरावणार; कारण तास योनान पोरचार होम्लीन मोन फिरावना एता एने देखू न्या तो हि जो योनाफायरीन मोठू हि.

शरीरान दिवो

³³ “कूण माणुह दिवू लागाडीन ताह घेराम केव्ही मापान बुंदे मेलणे नाहं पुण दिवह उपेर मेलणे, जानकेरता जो आहने आवणे ताह उजालो जुड सेकीह.

³⁴ तारो शरीरान डोलो तारो दिवू हि, तामुळे ताहेर्यो तारो डोलो साफ हि, तर तारो आखा शरीर पुण उजाला माय हि; पुण ताहेर्यो तो वाईट रेय, तेवी शरीर भी आंधाराम हि.

³⁵ तामुळे होमंबालीन रेणेन कि जो प्रकाश तुमरीम हि तो आंधारो बोणणेन मां.

³⁶ तामुळे तारो आखा शरीर प्रकाशित जुवी, एने तान काल्लूच भागाम आंधारो रेणेन मां, तेवी आखा इही प्रकाशित एय, जोहलो ता समयामाय एता, जेवी दिवो आपुह आपण प्रकाशाने तुवाह प्रकाश आपीह.”

शास्त्री एने फरीसीह फोटकार

³⁷ जेव्ही तो बोलीह एतो तेवी एक फरीसीन ताह विनंती केरील कि माहुफाय जेवण केरणू तो माय जाइन रूटू खाणेन बोहील.

³⁸ फरीसी ज्यो देखीन बोंनग्लाय गीया का तो रूटू खाणेन पेल नाह उगेल्नु

³⁹ प्रभु ताह कियील, हे फरीसीन, तुमूह तेली एने वाटीह बाहेररीन साफ केरणू तुमरे माय आंधारो एने दुष्ट पणा बोरेल हि.

⁴⁰ हे मुर्खानो, ज्यान बाहेरने भाग बोनाईल हि कायतान मायवाल भाग बोनाईल नाहं काय.

⁴¹ पुण हा माय वाला वस्तून तुमूह दान केरीन दया तर देखू आखा काही तुमरीकेरता शुद्ध एईन जाहू.

⁴² पुण हे फरीसी तुमरे पोर हाय! तुमूह पुदिना एने बडीशेप एने जुदाजुदा साग पातान दहावा भाग आपणु पुण लेनेआवो एने बोगवानान प्रेमाह टालीन आपणु; जुवी एता कि ज्याह पुण केरतीन रेणेन जुवी एता ज्याह सोडणेन मां एता.

⁴³ हे फरीसी तुमरे पोर हाय तुमूह आराधनालय माय मुख्य जागो एने बाजारामारीन नमस्कार ताह जुवी.

⁴⁴ हाय तुमरे पोर काहाकाय तुमूह लिकाईल कबरेसारखे हि जीपोर माणुह चालणु पुण होमजाडणे नाहं.

⁴⁵ तेवी एक व्यवस्थापक ताह उत्तर आपील, हे गुरु, आवो वातून केयेलकिरीन तू आमरा निंदा करने.

⁴⁶ तान कियील शास्त्री तुमरे पोर हाय तुमूह ओहलो बारलो जो वीसने केठीन हि तो माणहापोर मेलतेन पुण तुमूह स्वताह ता बाराह आपणो एक आगलीकेरीन पुण स्पर्श केरतीन नाहं.

⁴⁷ हाय तुमरे पोर तुमूह ता भविष्यवक्ता माहणे बोणावतेहे ज्याह तुमराच आबुक दादांनी मारीन टाकील एता.

⁴⁸ केरीन तुमूह गवाही हि एने आपणो बापदादान कामाम सहभाग हि; काहाकाय तास ताह मारीन टाकील एने तुमूह तान माहणे बोणावतेहे.

⁴⁹ ज्यानकेरता बोगवानान बुद्धीसी पुण कियील हि मी तान आहने भविष्यवक्ता एने प्रेरितांन मोकलुह, एने तो तान मायरीन कोलाक जाणाह मारीन टाकणे एने काही जाणान तरास केरुहू.

⁵⁰ तामुळे जोलाक भविष्यवक्ता रक्त जगान उत्पती फिरीन वोईल हि आखान हिशोब आवो पिडीन माणहा फायरीन लीईल जाय.

⁵¹ हाबेलान खुन मायरीन जख-यान खुणेपर्यंत जो वेदीन एने मंदिरान माय घात किरील एतो मी तुमूह खेरीच किथु ज्याह आखा वातून हिशोब ज्याह पिडीन माणहा फायरीन लियेल जाय.

⁵² हाय तुमूह व्यवस्थापक तुमूह ज्ञानान किल्ली लीईल हि पुण तुमूह स्वताहन प्रवेश किरील नाहं एने प्रवेश केरणारा पुण थोबाडीन मिलील हि.

⁵³ ताहेरया तो तारीन निकलील तेवी शास्त्री एने फरीसी वाईट प्रकारे तान पासाण पोडीन गीया त्रास आपुह लागिल कि तो ताहेर्यो उंजू बोलणेन जुवी.

⁵⁴ एने आवो नादान रेणा एकी तान तोंडच्या कानलु तेभी वातूह देरू.