यूहन्ना 9 - नाहाली

जल्मा से आंधलाह हुदारणेन

¹ जातेलीन तो एक माणहाह देखील तो पायदा एयील तेवीचरीन तो आंधलू इतू.

² तान चेला ताह फुसील, “हे गुरुजी, कूण पाप किरील एतो का ज्यो आंधलो पायदा इनूह, ज्यो माणुह का ज्यान आहाक आबोक?”

³ यीशु उत्तर आपील, “नाह ते ज्यो पाप किरील इतू नाह ते तान आहाक आबोक ज्यो ज्यानकेरता एनोह का बोगवानान काम तामाय प्रगट एने जुवी

⁴ जो माहु मोकलील हि, आमूह तान काम दिह दिहेच केरणे गिरीज हि; ती रात आवणी हि जांमाय कूण काम नाय केर सेकी.

⁵ जेवीवूर मी जगाम हि, ताहुकवोर मी जगान उजालो हि.”

⁶ ज्यो केयीन तो बुईपोर थूपील, एने थूपऱ्यान माटळ्यो गारो केरीन, तो गारो ता आंधलान डोलापोर लागाडीन.

⁷ तो ताह कियील, “जा शीलोहान कुंडामाय दोव ली” शीलोहान अर्थ मोक्लील ओहलो हि तो जाइन दोवील, एने देखतेलीन पोशो आवु

⁸ तेवी पडोसी एने जां पेल ताह भिख मांगतालो देखील एता, केणे लागिल, “काय ज्यो तोच ते नाहं, जो बोहीन भिख मांगते रेतालो?”

⁹ काही माणहे कियील, “ज्यो तोच हि, दिहरा कियेल, नाहं, पुण तानहोस हि.” तो कियील, “मी तोच हि.”

¹⁰ तेवी ता ताह फुसणे लागिल, “तार डोला किहीकांय उगडील?”

¹¹ तो उत्तर आपील, “यीशु नावान एक माणुह माटळ्यो गारो केरीन, मार डोलाह लागाडील एने माहु कियील, शिलोह माय जाइन दोव ली, सेवट: मी जाईल एने दोवील एने देखणे लागिल.”

¹² ता ताह फुसील, “तो कां हि?” तो कियील, “माहु नाहं मालूम.”

फरीसी द्वारा आंधलान जाच पडताल

¹³ माणहे ताह जो पेल आंधलू इतू ताह फरीसीफाय ली जाईल.

¹⁴ जेवी दिह यीशु गारू केरीन तान डोलाह उघाडील इतू, तो शब्बाथान दिह इतू

¹⁵ पोशा फरीसी भी ताह फुसील का तान डोला काल्ली रीती से उगडी गीया. तो ताह कियील, “तो मार डोलापूर गारू लागाडील, ओवतो मी दोव लीईल, एने ऐवी देखथु.”

¹⁶ ज्यापोर काही फरीसी केणे लागिल, “ज्यो माणुह बोगवाना फायरीन नाहं, काहाकाय ज्यो शब्बाथान दिह नाहं मानीत.” दिहरा कियील, “पापी माणुह ओहला चिन्ह नाह देखाड सकीत?” सेवट: तामाय फुट पोड गीयी.

¹⁷ तास ता आंधलाह पोशा कियील, “तोच तार डोला उघाडील हि. तू तान बारामाय काय किथे?” तो कियील, “तो भविष्यवक्ता हि.”

¹⁸ पुण यहूदीह विश्वास नाहं एनो का तो आंधलो इतू एने ऐवी दिखेह, जेवीवूर ताह तान डोला उघाडील एता, आहक आबाकाह हादाडीन.

¹⁹ ताह फुसील, “काय ज्यो तुमरो सोरो हि, ज्याह तुमूह केणु का ज्यो आंधलो पायदा एयील इतू का? एने ऐवी तो किहीकाय देखीह हि?”

²⁰ तान आहाक आबोक उत्तर आपील, “आमूह ते मालूम हि का ज्यो आमारो सोरो हि, एने तो आंधलो पायदा एयील इतू;

²¹ पुण आमूह ज्यो नाहं मालूम का ऐवी तो किहीकाय देखीह, एने ज्यो नाहं मालूम का कूण तान डोला उघाडील. तो वयामाय आयील हि, ताहुच फूस लिवू; तो आपणा बारामाय स्वतान केय आपण्यू.”

²² जीवात तान आहाक आबोक ज्यानकेरता कियील कारण ता यहूदीह बिताला, काहाकाय यहूदी एकमोत एय जाईल एता का जर कूण ताह केय का तो मसीह हि, ते प्राथना आराधनालय मायरीन काड देती.

²³ ज्या कारण से तान आहाक आबोक कियील, “तो वयाम आवील हि, ताहुच फूस लिवू.”

²⁴ तेवी तास ताह माणहाह ज्यो आंधलो इतो, दिहरी वारीन हादाडीन ताह कियील, “बोगवानान महिमा केर आमूह ते मालूम हि का तो माणुह पापी हि.”

²⁵ तो उत्तर आपील, “माहु नाह मालूम का तो पापी हि; माहु एकुच वात मालूम हि का मी आंधलू इतू एने ऐवी देखतू.”

²⁶ ता ताह पोशा कियील, तो तारहेर्यो काय किरील? एने तार डोला उघाडील?

²⁷ तो ताह कियील, मी ते तुमूह केय आपील हि, एने तुमूह ते नाहं होमल्या; ऐवी दिहरी वारीन काहा होमलने होदतेह? काय तुमूह भी तान चेला बोडण्या हेते?

²⁸ तेवी ता ताह हाजो बाक्तो केयीन केदा, “तूच तान चेलो हि, आमु ते मुसान चेला हेते

²⁹ आमूह मालूम हि का बोगवान मुसा हेर्यो वातू केरील इतू; पुण ज्या माणहाह ते नाहं ओलखते का ज्यो का वालू हि.”

³⁰ ता ताह उत्तर आपील, जी ते नवलने वात हि का तुमूह नाहं मालूम का तो कावालु हि, तेभी तो मार डोला उगाड दियील हि.

³¹ आमुहू मालूम हि का बोगवान पापी माणहान नाहं होमलने, पुण जर बोगवानान भक्त रेंय एने तान इच्छेप्रमाणे चालते रेंय, ते तो तान होमलने.

³² जगान सुरुवातनात एताच ज्यो केध्दी होमलने माय नाहं आवो का कूण तेभी आंधलोच पायदा एयील तान डोला उघाडील.

³³ जर ज्यो माणुह बोगवाना फायरीन नाय रितू, ते कायीच नाह केर शकतालु.

³⁴ ता ताह उत्तर आपील, तू ते बिलकुल पापामाय जेल्मो लियेल हि, तू आमूह काय हिकाडीह? एने तास ताह बाहेर काड दियील.

आत्मिक आंधलोपण

³⁵ यीशु होमलेल का ता ताह बाहेर काड दियील, एने ता हेर्यी भेट एनी ते कियेल, “काय तू बोगवानान सोरा पोर विश्वास करने?”

³⁶ तो उत्तर आपील, “हे प्रभुजी, तो कूण हि, का मी तापोर विश्वास केरू?”

³⁷ यीशु ताह कियील, “तू ताह देखील भी हि, एने जो तारहेर्यो वातू केरील हि, तो तोच हि.”

³⁸ तो कियील, “हे प्रभु मी विश्वास केरथू” एने तो ताह वोंदिल

³⁹ तेवी यीशु कियील, “मी जगाम न्यायनिवाडू केरणे केरता आवील हि, कारण जां नाह देखते ता देखती, एने जां देखतेह ता आंधला एय जाती.”

⁴⁰ फरीसी मायरीन जाता हेऱ्या एता तां ज्यू वातू होमलीन ताह कियील, आमूबी आंधला हेते काय?

⁴¹ यीशु ताह कियील, जर तुमु आंधला रेतां ते पापी नाय ठेरता; ऐवी केतेह का आमु देखतेह, केरीन तुमरो पाप बोणीन रेणें.