यूहन्ना 7 - नाहाली

यीशु एने तान बाहाक

¹ आवो वातू ओवतो यीशु गलील माय फिरीन रेणू; काहाकाय यहूदी ताह मारीन टाकणेन प्रयत्न केरतीन एता, तामुळे ताह यहूदामाय फिरनेन नाह एता.

² यहूदीयानन मंडपान तिवार आहनी आवील इतू.

³ तामुळे तान बायाक ताह कियील, “यारीन यहूदामाय जा, कारण जे उचकाहुच किरील काम तू केरणू ते तारो चेला ताभी देखणार.

⁴ कारण ओहलो कुनुस निह एय जो प्रसिद्ध एहू इच्छितो पुण गुप्तपणे काम केरुहू, तेवी तू ज्यो काम केरतालु तेवी जीवाच जगाम प्रकट केर.”

⁵ कारण तान बाहाक पुण तापोर विश्वास केरतीन नाह एता.

⁶ तेवी यीशु ताह कियील, “मारी टाइम उंजू आवी, नाहं पुण तुमरीकेरता आखीच टाइम हि.

⁷ जगाम तुमरो द्वेष केरतीन नाहं, पुण ते मारो द्वेष केरणू कारण मी तान विरोधामाय गवाही आपथु कि तान कामे वाईट हि.

⁸ तुमूह तीवारामाय जा; मी ऐवी आवो तीवाराम जात नाहं, कारण उंजू ताहवोर मारो टाइम पुरो एनो नाहं.”

झोपडीन पर्वमा यीशु

⁹ तो ताह ज्याह वातू केयीन गलीला मायरीन रेयीन गीयो.

¹⁰ पुण ताहेरया तान बाहाक तीवारामाय निकलीन गीया तेवी तो जीवेच भी, उघड पुण नाहं पुण जिहकाय लिकाडील पुण गीयो.

¹¹ यहूदी तीवारामाय हे केयीन होथू लागिल, “तो कां हि?”

¹² एने माणहामाय गुपचुप जादा वातू एईल; कूण किथी एता, “तो हाजो माणुह हि.

¹³ तेभी पुण यहूदी भयामुळे ते तान विषयी उघड पुण बोलीह नाह एता.”

पर्वमा यीशुन उपदेश

¹⁴ जेवी तीवारान आर्दो दिह निकलीन गीया; तर यीशु मंदिरामाय जाइन शिकवन आपुह लागिल.

¹⁵ तेवी यहूदीयांनी चक्कित एय कियील, “ज्यासे हिकना नाहं तेभी ज्यान कारीन आवा?”

¹⁶ यीशु ताह उत्तर आपील, “मारी लिकाडतालु मारी नाहं, पुण माहु मोकेलणा-या हि.”

¹⁷ जर कूण तान ईच्छापूर चालणेन ईच्छा करने, तर तो आवो हिकणे होमजाडीन जाहू कि हे बोगवाना फायरीन हि केव्ही माफायरीन किथी हि.

¹⁸ जो आपणे वूगेरीन काही किथे तो आपणाच दिखेह; पुण जो आपणो मोकलणारान महिमा देखहुं इच्छितो तोच खेरो हि एने तामाय अधर्म नाहं.

¹⁹ काय मुसाने तुमूह व्यवस्था आपील नाह एता? तेभी पुण तुमरे माय कोलाक जन व्यवस्था वर चालतो नाहं तुमूह काहा माहु मारीन टाकणे केरता मागतले?

²⁰ माणहान उत्तर आपील, “तुमरीम दुष्ट आत्मा हि! कूण तुवाह मारीन टाकणे केरता मांगथू?”

²¹ मी एक काम किरील, एने तुमूह आखा आश्चर्य केरणू.

²² तान केरताच मुसान तुमूह खतनान आज्ञा आपील हि ती मुसाफायरीन नाहं पुण वेगालाफायरीन आईल हि, एने तुमूह शब्बाथच्या एक दिह खतना केरणू.

²³ जेवी शब्बाथ ने दिह माणहान खतना एतालो म्हणजे मुसान व्यवस्थान आज्ञा टाल नाय जाय, केरीन तुमु माहु पोर राग केरतेह, का मी शब्बाथ ने दिह एक माणहान पुरी रीती से हाजो किरील.

²⁴ “मूय देखीन न्याय केरूह मा तर खेरी खेरीच न्याय केरू.”

काय यीशु महान हि?

²⁵ तेवी कोलाक यरूशलेमाम रेणारे केहू लागिल, “काय हा तो नाहं काय ज्याह मारीन टाकणेन प्रयत्न केरूह रेणा हि?

²⁶ पुण देखू, तो तर उघड पुण बोलेहे एने ताह कूण काही किथी नाहं, काय सरदारांनी खेरी खेरीच होमजाडीन लीईल हि कि जोस मसीह हि?

²⁷ ज्या तर आमु ओळखणे कि हा; कावालु हि; पुण मसीह ताहेरया आवूह तेवी कुणीहुच मालूम नाहा हे तो कि तो कावालु हि.”

²⁸ तेवी यीशु ने मंदिरामाय हिकाडतालु आपतेन आयेड मारीन कियील, “तुमूह माहु ओलकतेह एने, हे पुण मालूम हि कि मी कारीन हि मी तर स्वताह आवूह नाहं, पुण माहु मोकलणार सत्य हि ताह तुमूह ओळखतेह नाहं.

²⁹ मी ताह ओळखणे कारण मी ताफायरीन हि एने ताणुच माहु मोकलील हि.”

³⁰ जापोर तान ताह देरणेन प्रयत्न किरील, तेभी कुनुस तापोर आथ टाकु शकील नाहं कारण तान टाइम उंजू आवी नाहां एती.

³¹ तेभी पुण गर्दीमाय कोलाक माणहान तापोर विश्वास किरील एने केहू लागिल, “मसीह ताहेरया आवूह तर काय यांपुररीन जादा आश्चर्य काम देखाडणार जे याने देखाडणे?”

यीशुह देरणेन प्रयास

³² फरीसी माणहाह ताबारामाय लिकाईन वात केरतालोन होमलील; एने मुख्य याजक एने फरीसी ताह देरणे केरता शिपायांना मोकलील.

³³ ज्यापूर यीशु कियील, “मी थोडच टायमापोरउर उंजू तुवाहेर्यो हि ओवतो माहु मोकेलनाराफाय मी निकलीन जाहू.”

³⁴ तुमूह माहु होद्हू पुण मी सापडील नाहं; एने जाहारी मी हि ताहारी तुमूह आवहू शकत नाहं.

³⁵ ज्यापूर यहूदी आपसामाय कियील, “हा कां जाहू कि ताह आमु होथू शकणार नाहं? काय तो ताहेऱ्यो जाहू कि जे यूनानी माय वेराय माय एय रेतेह, एने यूनानी पुण लिकाडतालु आपण्यू?

³⁶ हि काल्ली वात हि कि ती ज्यान कियील कि तुमूह माहु होदहू पुण मी तुमूह सापडील नाहं; एने मी जाहारी हि ताहारी तुमूह आवहू शकत नाहं?”

जीवनान पाणीन नद्या

³⁷ तीवारान शेवटेस एक दिह जो मुख्य दिह हि यीशु उबरील रेणू एने हादाडळीन कियील, जर कूण तिह्ल्यो हि तर माहफाय आवो एने पिवू;

³⁸ जो मारपुर विश्वास केरुहू हि जाणेन पवित्र शास्त्रामाय हि तान मोनामरीन जीवनान नेद्यू वोयीन नीही,

³⁹ तान हे वचन पवित्र आत्मान विषयी केईल, ज्याह तापोर विश्वास केरनारापूर उतरीही एता; कारण आत्मा एविवूर उतरना नाह एतो कारण यीशु उंजू पुण आपणो महिमात पोचना नाह एतो.

⁴⁰ तेवी गर्दीमाय कोलाक जाणाह ज्याह वातू होम्लीन कियील, “खेरी खेरीच हा तोच भविष्यवक्ता हि.”

⁴¹ दिहरान कियील, “हा मसीह हि” पुण कोलाक कियील, “काहा? काय मसीह गलीलामरीन आवूह?”

⁴² काय पवित्र शास्त्रामाय हे आवा नाहं कि मसीह दाविदान वंशामरीन एने बेथलेहेम गावामरीन आवूह जाहारी दाविद रेथे एतो?

⁴³ केरीन तामुळे माणहामाय फुट पोडीन गीयी.

⁴⁴ तामायरीन कोलाक जन ताह देरणेन प्रयत्न केरतीन एता, पुण कुनुस तापोर आथ टाकील नाहं.

यहूदी आगुवान अविश्वास

⁴⁵ तेवी शिपायांन मुख्य याजक एने फरीसी आहने फिरीन आवा तो ताह कियील, “तुमूह ताह काहा लीन आवा नाहं?”

⁴⁶ शिपायांनी उत्तर आपील, “काल्लूच माणहान केविज ओहला वातू केरील नाहं.”

⁴⁷ फरीसी ताह उत्तर आपील, काय तुमूह पुण बुलवीन गीया हेते काय?

⁴⁸ काय सरदार एने फरीसी मायरीन कूण तापोर विश्वास किरील हि?

⁴⁹ पुण हे माणुह ज्याह व्यवस्था मालूम नाहं शापित होव.

⁵⁰ निकदेमस जो पेल्लो तान आहने आवा एतो एने तामायवाला एक एतो ताह कियील,

⁵¹ “काय आमरा व्यवस्था काल्लोबी माणहा जेवीवोर पेल्ला तान होम्लीन होजीन लेतेन नाहं कि तो काय केरतीन हि दोषी ठेरावने?”

⁵² तास ताह उत्तर आपील, “काय तू पुण गलीलान हि? होदणे एने देखू, कि गलीलामरीन कूण भविष्यवक्ता प्रकट एय नाहं काय?

⁵³ तेवी आखा आप आपणा गिर निकलीन गीया.”