यूहन्ना 3 - नाहाली

यीशु एने निकुदेमुस

¹ फरीसीम निकदेमस नावान एक माणुह एतो, तो यहूदीयान सरदार एतो.

² ता तो राती यीशुन आहने आवीन ताह कियील, “हे गुरुजी, आमूह मालूम हि कि बोगवाना फायरीन गुरु एय आवा हि, काहाकाय आवो चिन्हान जे तू देखाड्थू, जर बोगवान तान हेरी नाहं तर नाहं हिकाडू शकत.”

³ यीशु ताह उत्तर आपील, “मी तुमूह खेरी खेरीच किथे कि, जर कूण नवालान जेन्मोलेदो नाहं तर बोगवानान राज्य देख नाहं सेकते.”

⁴ निकदेम ताह कियील, “माणुह डावालु एय जाय, तर किहीकाय जेल्मो एहू शकणे? काय तो आपणो आईकने पेटामाय दिहरी वारीन प्रवेश केरीन एहू शकणे?”

⁵ यीशु उत्तर आपील, “मी तुमूह खेरी खेरीच किथे, जेवीवोर कूण माणुह पाण्याकेरिन एने आत्मा फायरीन जन्मल्या वाचीन तर तो बोगवानान राज्यातम प्रवेश नाहं केरूह शकत.

⁶ काहाकाय जो शरीरापासून जेन्मोलियेल हि, तो डील हि; एने जो आत्मा तारीन जेन्मोलियेल हि, तो आत्मा हि.”

⁷ नवल मा केरूह कि ती तुमूह कियील, हि, “तुवाह नवालान जेल्मो लेणे केरता गर्जेन हि.”

⁸ वारा जीन वोयताला तीन वोयताला एने तू तान शब्द होमलने, पुण नाहं होमजाडणे कि ती उगेरीन आवी एने कां जातेह? जो कूण आत्मा फायरीन जेन्मोलेदो हि तो ओहलोच हि.

⁹ निकदेमन ताह उत्तर आपील, “आवो वातू केवी एहू केरसेक्तालू?”

¹⁰ ज्यो होम्लीन यीशु ताह कियील, “तू इस्राएल ने गुरु एयीन भी ज्यू वातूह नाह होम्जीत?”

¹¹ मी तुमूह खेरी खेरीच केथु का आमु जे होमजथी तोज केतेह, एने ज्याह आमु देखील हि तान गवाही आपणु, एने तुमूह आमरी गवाही स्वीकार नाहं केरतीन.

¹² ताहेरया मी तुमूह पृथ्वीन वातू केदाह एने तुमूह आमरी गवाही स्वीकार नाहं केरतीन, जर मी तुमूह स्वर्गाची वात केहू तर ओवतो कोहलो विश्वास केरुहू?

¹³ कूण स्वर्गापूर नाहं चडणे, फक्त तोच जो स्वर्गामाय रीन उतरना, म्हणजे माणहान सोरो जो स्वर्गाम हि.

¹⁴ एने ज्या रीतीमाय मुसाहबी जेंगलामाय गेयळेक उचो किरील, तान रीतीमाय माहा हि कि माणहान सोरो पुण उपेर चेढील जाऊ;

¹⁵ तान केरता कि जो कूण तापोर विश्वास मेलूह ताह अनंत जीवन प्राप्त एने जुवी.

¹⁶ “काहाकाय बोगवान जगा पोर ओलोक प्रेम किरील कि, तो तान एकूलता एक सोरो आप दियील, ज्यानकेरता का जो कूण तापोर विश्वास मेली तो नाश नाय एय पुण ताह अनंत जीवन जुडी.

¹⁷ बोगवान आपणा सोराह जगामाय मोकलील का जगान न्यायनिवाडू केरणेन केरता नाहं, पुण तान द्वारे जगान उद्धार एने जुवी केरीन मुक्लील

¹⁸ जो तापोर विश्वास मेली, तान न्याय निवाडा नाहं एता, पुण जो तापोर विश्वास नाहं केरतीन, तो बोंगलाईन सापडणे; ज्यानकेरता कि तान बोगवानान सोरो एकूनएकुच एक नावापुर विश्वास नाहं केरतीन.

¹⁹ एने न्याय निवाडा मुळे हे हि कि प्रकाश जगाम आवा हि, एने माणहेच आंधाराह प्रकाशापैकी जादा प्रिय जाणिल आवरी किरील कारण तान कामे वाईट एती.

²⁰ कारण जो कूण वाईट करने, तो उजालान द्वेष करने, एने प्रकाशमाय आहने नाहं आविह, नाहं इही मां होवो कि कामापुर दोष लागाडया जाहू.

²¹ पुण जो सत्यापोर चालणे, तो प्रकाशा आहने आवथू, यानकेरीता कि तान कामे प्राप्त एने जुवी कि तो बोगवानानापूररीन इयील हि”

यीशुन विषयमा यूहन्ना गवाही

²² ता ओवतो यीशु एने तान चेलो यहूदिया देश आवा; एने तो ताहारी तान हेरी रेयीन बाप्तिस्मा केरणे लागिल.

²³ यूहन्ना पुण शालीम आहनीवाला एनोन बाप्तिस्मा केरतीन एतो, कारण ताहारी मोक्तास पाणी एता, एने माणहे आवीन बाप्तिस्मा लेतेन होते.

²⁴ यूहन्ना तीबोखे ताहवोर जेलमाय नाहं टाकील गीयो एतो.

²⁵ ताहारी यूहन्ना चेला माय कायताहा यहूदी हेरी शुद्धी केरणे बाराम वादावाद एनो,

²⁶ एने ते यूहन्नाफाय आवीन ताह कियील, “हे गुरुजी, जो माणुह यर्दिनेन आहने तारो हेरी एतो, एने ज्यान गवाही आपील एती; देखू, ते बाप्तिस्मा आपतेन, एने आखा जन तान आहने आवते.”

²⁷ यूहन्नान उत्तर आपील, “जो ताहवोर माणहाह स्वर्गामाय रीन नाहं आपील जाहू, ताहउर तो कायीच नाहं मिळवू शकत.

²⁸ तुमूह तर स्वताच मारी गवाही हि कि मी कियील, मी मसीह नाहं, पुण तान ओगाण मुकलील जाईल हि.”

²⁹ ज्यान वोवडी हि, तोच उपेर हि, पुण वोवडान हेरी जो उबरीयेल रेयीन तान होमलने, ताह उपरल्या शब्दापुरनीन जुलुम आनंद एतो: ऐवी मारा हे आनंद पुरो एय गीयो हि.

³⁰ जरुरी हि कि तो वोदणार एने मी थोडो एय.

³¹ “जो उपेर आवथू आखांन उपेर हि; जो पृथ्वीपोररीन आविह तो पृथ्वीन हि, एने पृथ्वीनबी वातू किथे: जो स्वर्गावरून आवथू तो, पृथ्वीन उपेर हि.

³² जो कायतान देखील एने होमलेल हि, ताणुच गवाही आपथु; एने कूण तान गवाही स्वीकार नाहं केरतीन.

³³ जा-जा तान गवाही स्वीकार केरीन लीईल तान आवो वातीपुरी शिक्का लागाडील आपील कि बोगवानान सत्य हि.

³⁴ काहा ज्याह बोगवानान मोकलील हि, तो बोगवानान वातू किथे; काहाकाय तो आत्मा नाहं आपतेन.

³⁵ आबुक सोरावर प्रेम केरथू ज्यान आखा वस्तु तान आथे आपील हि.

³⁶ जो सोरा पोर विश्वास मेली, अनंत जीवन तान हि; पुण जो सोरान नाहं होमले, तो जीवनाह नाहं देखीह, पुण बोगवानान राग तापोर रेणे.”