यूहन्ना 21 - नाहाली

तीबिरीयान समुद्रान मिरे यीशु चेलाह देखाणो

¹ ओवतो तीबिरीयान समुद्रा आहनी यीशु आपणो चेलान ओगाण पोशो स्वताहा प्रगट किरील, तान स्वताहा ज्यानहोस प्रगट किरील:

² शिमोन पतरस, थोमा (जो दिदुमुस केतेह एता) गलीलामायवाला काना न्यावाला नथनेल, जब्दीन सोरा एने तान चेला दिहरा दुयू जन हे एक्ठाच जमाना येतो.

³ शिमोन पतरसाने ताह कियील, “मी मासा देरणेन जात हि.” ते ताह कियेल, “आमु पुण तारहेऱ्यो आविह हि.” तेवी ते ताहेऱ्यो गीया एने नावीम जाइन, बोह्ना पुण ता राती ते कायीच देरू शकले नाहं.

⁴ एविवूर वेगीस एनी एती तेवी यीशु मेरापूर उबरील रेणू; पुण चेला ताह ओलखिल नाहं कि तो यीशु हि.

⁵ ओवतो यीशु ने ताह कियील, “सोरांन, तुमरेहे-यो काही मासा हि?” तास उत्तर आपील, “नाहं.”

⁶ ओवतो तान कियील, “नावीन डाख-यो भागाम जालो टाकु, तर तुमूह काही जुडी” तेवी तास जालो टाकील पुण जुलुम मासाकेरिन ते जालाह पोशा ताफायरीन खेचेल जात नाह एता.

⁷ केरीन तो चेलो जापोर यीशु प्रेम केरतालो ताह तो पतरसाह कियील, “हा तर प्रभु हि, ताहे-यो शिमोनान हे होमलील कि तो प्रभु हि तेवी तान आपणा बाहेर फाडका पेरेल एने पाण्यामाय उडी मारना कारण तो उघडा एतो.”

⁸ पुण दिहरा चेला नावीम मासा से बोरील जाल खेचतीन आवा, काहाकाय ता मेरा से सेटा नाह एता, दुय होव आथ सेटा एता.

⁹ तेवी ते मेरापूर आवा तास ता जागापूर हेलगतालो एईच कियील आकठो देखील, तापोर मासा एने रूटू भूजनेनकेरता मिलील एता.

¹⁰ यीशु ताह कियील, “तुमूह जे ऐवी मासा दिरील हि, तामायरीन काही लीन आवो.”

¹¹ ओवतो शिमोन पतरस नावीपोर गीयो एने मोठला माशांनी भूरील जालो मेरापूर खेचील जालामाय ओलोक मासा एता तेभी जालो फाटनो नाहं.

¹² यीशु ताह कियील, “याहारू आवो, एने जेवण केरू” तान चेला मायरीन कुणीन हि इमुत आवा नाहं कि ताह फुसणे जुवी, तू कूण हि? कारण तास ओलखिल एता कि तो प्रभु हि.

¹³ यीशु ओगाण गीयो एने तान रूटू लीईल एने ताह आपील एने ओहलाच मासा पुण आपील.

¹⁴ एविवूर हि तिसरी टाइम एती जेवी यीशु मरनेनओवतो जीवतालू इयेलपूर आपणो चेलान ओगाण तो प्रकट एनो.

यीशु एने पतरस

¹⁵ ओवतो ताहे-यो तान जेवण एय गीयो तेवी यीशु ने पतरसाला कियील, “यूहन्नान सोरा शिमोन, जोलाक प्रेम हे मारपुर केरणू काय तू ताणओंगानरीन होवटो प्रेम मारपुर करने? पतरसाने यीशुह कियील, होव, प्रभु, तुवाह मालूम हि कि तारपोर प्रेम करने यीशु ने पतरसाला कियील, मारी कोकरा चार.”

¹⁶ तो ताह दिहीरीवार कियील, “यूहन्नान सोरा शिमोन, काय तू मारपुर प्रेम करने? पतरसाने यीशुह कियील, होव प्रभु, तुवाह मालूम हि कि तारपोर प्रेम करने यीशु ने पतरसाला कियील, मारो मेंढरान राखवाली केर.”

¹⁷ यीशु पतरसाला पोशो कियील, यूहन्नान सोरा शिमोन, काय तू मारपुर प्रेम करने? तेवी पतरस जादा नाराज एनो कि यीशु ताह तीस-यांदा फुसील, काय तू मारपुर प्रेम करने? तेवी पतरसाने यीशुह कियील, “हे प्रभु, तुवाह आखा काही मालूम हि, तुवाह मालूम हि कि मी तारपोर मी प्रेम करने यीशु ने ताह कियील, मारो मेंढराह चार.”

¹⁸ मी तुवाह खेरो किथे, ताहे-यो तू जुवान एतो तेवी तू आपणो कोमराह रुमाल बांधीन जाहारी ईच्छा एती ताजागेन जात एतो पुण ताहे-यो तू डावाला एय तेवी आथ सेटो केरुहू एने कूण दिहरो तारो कोमरोह रुमाल बांधीन ज्याडगी तू जाहू नाह एतो ता जागापूर तुवाह लीन जाहू.

¹⁹ तान हे देखाळण्यापूररीन कियील कि तो कायतान होस मृत्युसे बोगवानान महिमा केरुहू ओलोक केयीन तो ताह कियील मारो पासाण आव.

यीशु एने तान मोगालो चेलू

²⁰ पतरस पासाण वोलीन देखील, का जो चेलो ज्यापूर यीशु प्रेम केरतीन एतो, तो तान पासाण आविह हि हा तोच एतो ज्यान जेवण केरतीन येतो यीशुन छातीपूर वाकून फुसील एता, “हे प्रभु, तो कूण हि? जो तुवाह धोकामाय धेराविले तो?”

²¹ ताहे-यो पतरस ताह देखील, तेवी तो यीशुह कियील, “हे प्रभु, यान काय एय?”

²² यीशु ताह कियील, “जर मारी ईच्छा रेंय ताहउर तान न्याहीरीज रिजी तर तुवाह तान काय? तू मारो पासाण आव.”

²³ ज्यानहोस हि वात बायाकामाय इह्केरीन प्रकारे पोरचार एनो कि तो चेलो मारणार नाहं; यीशु हे कियील नाहं कि तो मारणार नाहं, पुण हे कियील एता, कि “जर मारी ईच्छा रेंय तर जेवीवोर मी पोशा आवूह, हा न्याहीरीज रिजी तर तुवाह तान काय?”

उपसंहार

²⁴ जोस तो चेलो हि जो ता वातू विषयी गवाही आपथु एने तान केरता हे लेखील हेते, आमूह मालूम हि कि तान गवाही खेरो हि.

²⁵ यीशु ने उंजू जादा कामे केरील हेते जर एक-एक केरीन ता आखा लेखील हि, तर मी विचार करने कि ते पुस्तक ओलोक एय गीयो हि कि आखा जगाम पोर तो होमाना नसतू.