यूहन्ना 2 - नाहाली

गलील ने कानामा पेहलो चमत्कार

¹ तीन दिह बाद गलील माय काना गावाम कुणी फाय वाराड एता. यीशुन आहाक भी ताहारी एती.

² वाराडाम यीशु एने तान चेला पुण नेवतो एता.

³ तेवी ती जागावालो अंगूररस निवरीगियो, तेवी यीशुन आहाक यीशुह कियेल, “ताफाय ऐवी अंगूररस नाहं सोतो.”

⁴ यीशु तान आईकिह कियील, “हे बायकू, तू माहु काहा किथी हि? मारी टाइम उंजू आईल नाहं सोतो.”

⁵ ओवतो तान आईकने दासांना कियील, “ज्यो तुमहू जो काय केय, तो करज्यू.”

⁶ ताजागेन यहूदीन शुद्धी करण रीतीन पाणी भोरनेन सहा देगडान डोसरा मिलील एता, हे डोसरो मेलील एता जोहलो यहूदीयान पवित्र उगेलेनेकेरता कामाम आविह एता प्रत्येक डोसरामाय तीन-तीन मण पाणी होमाय ओहला एता.

⁷ यीशु दासांना कियील, “डोसरामाय पाणी बोर देवो.” एने दासान डोसरामाय फुल पाणी बोरीन आपील.

⁸ ओवतो तो ताह कियील, “ऐवी जारिक बाहेर काढा, एने भोजन कारभा-याफाय लीन जावू.” तेवी ते लीन गीया.

⁹ ओवतो तेवी ता भोजन कारभा-यो तान चोव लीईल, जे अंगूररस बुणील एता ताह मालूम नाहं कि हे अंगूररस कारीन आवा पुण ता दासांना मालूम एता, तान केरता पाणी काडीन एता ओवतो भोजन कारभा-यो वोरोहो हादाडील.

¹⁰ एने ताह कियील, “प्रत्येक जन वोर हाजो अंगूररस आपथु एने आमंत्रित माणहे तेवी तृप्त ऐतेह तेवी ढाल्लो पुण तुमूह तर हाजो अंगूररस एविवूर होम्बालीन मेलील हि.”

¹¹ यीशु गलील च्या काना गावाम वोर आश्चर्य काम केरीन आपणी महिमा प्रकट केरील ज्या उखेरीन तान चेला तापोर विश्वास किरील.

¹² ज्याबाद माय यीशु एने आपणी आहाक, बाहाक एने चेला हेऱ्यो कफर्णहुमाम चालना गीया ताहारी तो काही दिह रेणा.

यीशु मंदिरामाय रीन व्यापाऱ्याह निकालीह

¹³ यहूद्यांन फसह तिवार आहने आवील हि, तान केरता यीशु यरूशलेमाम चालीन गीयो.

¹⁴ ताजागेन मंदिरामाय यीशु देखील कि माणहे डोरे, मेंढरेव कबुतरे ज्यान वेचने केरतीन एता एने शिक्का बोदेलनारा सौदौ केरणार आपणो गादिपूर बोहील एता.

¹⁵ तेवी तो दोयडान एक चापाकडो बोणावीन, आखा मेंढराह एने बोयलाह मंदिर मायरीन बाहेर काड दिनू, एने सर्राफान पोयशा जगार दियील, एने मेज उलटाव दियील,

¹⁶ एने कबुतर वेचणाराह कियील, “न्याह न्यारीन ली जा. मार पितान भवनाह व्यापारान घेर मा बोणावू.”

¹⁷ तेवी तान चेलाह इर आवो का लिखील हि, “तार घेरान धुन माहु खाय जाय.”

¹⁸ उत्तर आपतेन यहूदी यीशु कियेल, “तू आमूह कालो अदभूत चिन्ह देखाडहु शकणे का ज्यासे तू जे काही करने तान तू अधिकारी हीच हे स्पष्ठ केरूह शकणे?”

¹⁹ यीशु ने ताह उत्तर आपतेन कियील, “ज्याह मंदिराम पाडीन टाकु, मी तीन दिहामाय उबरीयेल केरुहू.”

²⁰ ह्यापूर यहूदी कियेल, “ज्याह मंदिराम बांधणेकेरता सेचाळीस वोरी लागिल एती, एने ताह तू तीन दिहामाय बोणावणे निकलील?”

²¹ पुण आपणो केणेम ज्या मंदिरा विषयी यीशु चर्चा केरील एती ते तान शरीर एता.

²² ओगाण जाइन ताहेरया तो मरनेनओवतो पोशो जीवतालू एनो तेवी तान शब्द चेलान इआवीह आवा कि यीशु हे कियील एता एने शास्त्रवर एने यीशुन शब्दापूर तास विश्वास किरील.

यीशु माणहान मोनाह जाणीह

²³ फसह तीवारान दिहामाय ताहेरया यीशु यरूशलेम माय एतो, तेवी जुलुम माणहान तान आश्चर्य कामान देखीन नाव विश्वास किरील.

²⁴ पुण यीशु स्वता: ला तान विश्वास सुळील नाहं, काहाकाय आखा माणहाह ओळखतेह एतो.

²⁵ ताह ज्याह वातून काय भी गिरीज नाहां एती कि कूण आवीन ताह ता माणहा बारामाय गवाही आपी, काहाकाय माणहान मोनाम काय हि हे तो ओळखतेह एतो?