यूहन्ना 19 - नाहाली

¹ ज्यापूर पिलातुसान यीशुह चापका मारेल.

² शिपाय काटान मुकूट गुथीन तान मुंडीमाय रीगाडील एने ताह जांमण्या फाडका ताह पेरावील.

³ एने तान आहने आवीन केणेंन लागिल, हे यहूद्यांन राजा नमस्कार, एने ताह थापू भी देईल.

⁴ तेवी पिलातुसान पोशा बाहेर निकलीन माणहाह कियील, “देखू, मी ताह तुमरेहे-यो बाहेर पोशा लावथू; म्हणजे तुमूह समजी कि माहु यामाय कायीच दोष सापडेल नाहं”

⁵ तेवी यीशु काटान मुकूट एने जामण्यो फाडका पेरीन बाहेर आवा एने पिलातुसान ताह कियील, “देखू, हा माणहे!

⁶ ताहे-या मुख्य याजक एने तान शिपायांनी ताह देखील तेवी आयडीन कियील, ज्या क्रुस पोर चेढाऊ, क्रुस पोर चेढाऊ! पिलातुसान ताह कियील, तुमूह च ताह लीन क्रुस पोर चेढाऊ कारण ज्याम मारो कायीच दोष देखाणे नाहं.”

⁷ यहूदी ज्यान उत्तर आपील, एने ता व्यवस्थानहोस तो मारीन टाकणेन योग्य हि कारण तान जीवाह बोगवानान सोरो बोनाईल.

⁸ ताहे-यो पिलातुसान ज्याह वातू होमल्या तर उंजू जादा बिईल.

⁹ एने पोशो किल्लामाय गीयो एने यीशुह कियील, “तू कावालु हि?” पुण यीशु ताह कायीच उत्तर आपील नाहं.

¹⁰ ज्यापूर पिलातुसान ताह कियील, “मारहे-या का बोलीह नाहं? काय तुवाह मालूम नाहं कि तुवाह सोडीन आपणेन अधिकार माहु हि. एने तुवाह क्रुस पोर चेढावणे भी माहु अधिकार हि?”

¹¹ यीशु उत्तर आपील, जर उपेरीन आपील नसतू, तर तारो मारपुर कायीच अधिकार रेणू नसते तामुळे ज्यान माहु तारो आथाम देरावीन आपील हि तान पाप जादा हि.

¹² ज्यापोररीन पिलातुसान ताह सोडीन आपणेन ठेरायेल पुण यहूदी आयडीन आयडीन कियील, जर तू ज्याह सोडीन आपण्यू तर तारी सेवा कैसराकडे नाहं जो कूण जीवाह राजा बनवणे तो कैसरन विरुद्ध जाथू.

¹³ ज्यू वातू होम्लीन पिलातुस यीशुह बाहेर लीन आवा एने ता जागापोर एक ओटलो एतो ताह इब्री भाषा माय गब्बाथा केणु, एने ताहरी न्यायासन पुर बोहील.

¹⁴ हा फसह तीवारान तियारिन दिह एतो एने सहाव्या तासा सुमारास एतो तेवी तान यहूद्याना कियील, “देखू, तुमरो राजा.”

¹⁵ पुण ते आयळील, “लीन जा! लीन जा! ताह क्रुस पोर चेढाऊ” पिलातुसान ताह कियील, “काय मी तुमरो राजाह क्रुस पोर चेढावूहू?” मुख्य याजकाने उत्तर आपील कैसराहा सोडीन आमारो दिहरो राजा नाहं.

¹⁶ तेवी तास ताह तान आथाम होपीन आपील म्हणजे तो क्रुस पोर चेढाव दी.

क्रुस पोर चढावणो

¹⁷ तेवी ता यीशुह लीन गीया. एने तो आपणो क्रुस विसीन ता ठिकाणापूर वूर बाहेर गीयो, जीह खोपडीन ठिकाण केवाणे एने इब्री भाषा माय “गुलगुथा” इही केणु

¹⁸ ताहारी ता ताह एने ताहेऱ्यो दुय माणहाह क्रुस पोर चेढ़ाइल एकाह जेवडीउखीर एने दिहीराह डाखरी वोखर एने विचमाय यीशुह.

¹⁹ एने पिलातुसान एक दोषपत्र लेखीन क्रुस पोर लागाडील एता एने तामाय इही लेखील एता, “नासरी यीशु, यहूद्यांन राजा”

²⁰ ज्यो दोष-पत्र जुलुम यहूदी वाचील, काहाकाय तो ठिकाण जाहरी यीशुह क्रुसपूर चेढ़ावील एतो नगराने आहने एता; एने पत्र इब्री, लतीनी, एने यूनानी माय लिखील एतो

²¹ तेवी यहूद्यांन मुख्य याजकान पिलातुसला कियील यहूद्याचा राजा मां लिखू पुण इही लिख कि ताह कियील मी यहूद्याचा राजा हि.

²² पिलातुसान उत्तर आपील मी जे लेखीन आपील म्हणजे लेखीन आपील.

²³ ताहे-यो शिपाई यीशुह क्रुस पोर चेढाविन इयेलपूर तान फाडका लीन तान चार भाग किरील प्रत्येक सैनिकाकेरता एक भाग एने झगा पुण लियेल पुण झगा हिवेल नाह एतो पुण उपेरीन बुयवूर तियार गुंथिल एतो.

²⁴ तामुळे तास आपसामाय कियील, आपु ज्या फाडनु नाहं पुण ज्यापूर चिठी टाकु कि हा कुणीन एय हे आवो केरता एय गीयो कि पवित्र शास्त्रामाय जे लिखील एता ते पुरो एने जुवी, “तास मारा फाडका आपसामाय वाटीन लीईल, एने मारो फाडकापूर चिठी टाकील.”

²⁵ केरीन शिपाय तोहोलोच कियेल पुण यीशु क्रुसनआहने ता आहाक एने तीन बोणिक एने क्लोपान बायकू मरियम एने मरियम मग्दालिया उभी एती.

²⁶ ताहे-यो यीशु आपणी आहाक एने तान चेलाह ज्यापोर तो प्रेम केरतालु आहनी उबरीयेल एईच देखील तेवी आपणो आईक कियील, “हे बायकू, देखू, हा तारो सोरो हि.”

²⁷ तेवी तान चेला माय कियील, “जी तारी आहाक हि” एने ता टायमापुरीन चेला तीह आपणो गिर लीन गीयो.

यीशुन मोत

²⁸ यानबादमाय यीशु समजील कि ऐवी आखा पुरो एय गीयो हि तामुळे पवित्र शास्त्रामाय जे कियील हि, ते पुरो एणेन जुवी केरीन कियील, “मी तिह्ल्यो हि.”

²⁹ ताहारी आबा बोरीन मोलेल एक खाम्बला एता केरीन तान स्पंज आंबामाय बुडाविन ते स्पंज जुफापोर मेलीन तान मुयापूर लागाडील.

³⁰ जेवी यीशु तो स्पंज आबा लियेल, तेवी कियील, “पुरो एय गीयो, एने मुंडे बुंदे केरीन जीव सोड देनो.”

यीशुन साती पोर भालो

³¹ ज्यानकेरता कि तो तियारिन दिह एतो यहूदी पिलातुसला विनंती केरील तान पाय मुड्नेन एने बुंदे उतारनेन हि म्हणजे ते शब्बाथान एक दिह क्रुस पोर रेहू नाहं कारण तो शब्बाथान दिह मोठू दिह एतो.

³² केरीन शिपायांनी आवीन ता माणहा मायरीन पोयलान पाय मुडणे; एने ओवतो दिहरान पुण जो तान बरोबर क्रुस चेढाविल एतो.

³³ पुण ताहे-यो आवीन देखील कि तो मारीन गीयो हि केरीन तान पाय मुडणे नाहं.

³⁴ पुण शिपाया माय एकजाण ताह भोरशाकेरीन तान पाहलामाय बोदलो एने तान मायरीन चालूच रक्त एने पाणी निकेलना.

³⁵ ज्यान हे देखील तान हे गवाही आपील हि एने तान गवाही खेरो हि एने ताह मालूम हि कि तो खेरीच किथे कि तुमूह पुण विश्वास मेलठोन.

³⁶ ज्याह वातू ज्यानकेरता एईल कि पवित्र शास्त्रामाय जे कियील हि ते पुरो एने जुवी, “तान काल्लोज आड मुडणे जाहू नाहं

³⁷ पोशा एक जागीपोर इही लिखील हि ताह तान केरता कुरील तापोर तो नेजर केरुहू.”

यीशुह गाडणेन

³⁸ ज्या वातूबादमाय अरीमथीयान योसेफान जो यीशुन चेलो एतो पुण यहूद्यांन भयामुळे ता वातूह लीकाडीन मेलणे होता पिलातुसला विनंती केरील कि काय तो यीशुन शरीराह लीन जाइन शकणे पिलातुसान तान विनंती होमेल्नी, एने तो आवीन तान शरीर लीन गीयो.

³⁹ निकदेमास पुण जो पेल्लो यीशु हेऱ्यो राती गीयो एतो तो गेंध रूह एने अगरु तान सुमारे शंभर एखठा लीन आवा.

⁴⁰ तेवी तास यीशुन शरीराह लीईल एने यहूद्यांन बुजणे केरीन रीतीप्रमाणे ताह सुगंधि तेल द्रिन्याबराबुर बुजील फाडकाम,

⁴¹ ता जागे जाहरी यीशुह क्रुस पोर चेढ़ाइल एतो तामाय एक बोगीचो एतो तामाय एक माहाण एती तिमाय केविज कोणीही मिलील नाह एता.

⁴² तामुळे यहूद्यांन तीयारुच दिह हि ताम तास यीशुह तामाय मिलील; कारण ती माहाण आहनी एती.