यूहन्ना 17 - नाहाली

यीशुन महायाजकिय प्रार्थना: स्वतान केरता

¹ ज्याह वातू केनेबादमाय यीशु आकाशाफाय देखीन कियील, “जो मारो आबुक, ती टाइम आवी हि कि; आपणो सोरा महिमा प्रदान केर जानकेरता कि तारो सोरो तारो महिमा केरूह शकेल,

² तू ताह योग्य आखा प्राणी जीवापोर अधिकार आपील हि, कि तो आखाह ज्याह तू ताह आपील हा अनंत जीवन आपुह शकेल.”

³ अनंत जीवन हे हि कि ते तारो एक मात्र खेरो बोगवान एने यीशु मसीहान, ज्याह तू मोकलील हि, ओलेख.

⁴ जे काम तू माहु आपील एता, ते पुरो केरीन जगाम मी तुवाह महिमा किरील हि.

⁵ तान केरता तू पुण माहु महिमा केर हे मारो आबुक, तोच महिमा माहु आप जो जगाच्या देखील तारहेऱ्यो माहु प्राप्त एतो.

चेलान केरता

⁶ जगामारीन जे माणहे तू माहु आपील हि मी ताह तारो नावान जगाम हिक किरील हि ते माणहे तारो एता पुण तू ताह माहु आपील हि. एने तास तारो वचनान पोहणे किरील हि.

⁷ ऐवी ते ओलकतेह कि प्रत्येक वस्तु जी तू माहु आपील हि ती वस्तु तुवाफारीनुच आवी;

⁸ मी ताह तोच संदेश आपील एतो, एने तास ग्रहण किरील हि, ते निश्चय पूर्वक ओलकतेह, कि मी खेरीच तुवा फायरीन आवूह हि एने ताह विश्वास एनो हि कि तूच माहु मोकलील हि.

⁹ मी तान केरता प्रार्थना केरीन हि; मी जगानकेरीन प्रार्थना केरीन नाह पुण तान केरता करने ज्याह तू माहु आपील हि, कारण ते तारो हि;

¹⁰ जे आखा काही मारा हि ते तारो हि एने जे तारो हि ते मारा हि एने ताफायरीन मारो महिमा एनो हि.

¹¹ ओगांण मी जगामाय नाय रेंव, पुण ज्या जगामाय रेती, एने मी तुवा फाय आवथू, हे पवित्र पिता, आपणा ता नाव से जो माहु आपील हि, तान रक्षा केर, का ता आमरे सन्मान एक एती.

¹² ताहेरया मी ताहेर्यो एतो, मी तारो ता नावान, शक्ती केरी तान रक्षा केरील जे तू माहु आपील एता मी रक्षा केरील एने तामायरीन कुणीन भी नष्ट एनो नाहं ज्यान शिवाय तान जो नाशयेणेन सोरो एतो जानकेरता कि शास्त्राचे वचन खेरो एने जुवी.

¹³ ऐवी मी तारहेर्यो आविह हि पुण ज्याह वातू मी आवो जगाम एतालून किथी हि जानकेरता ते आपणो हृदयाम मारो पुरो आनंद एहू शकणे.

¹⁴ मी तारो वचन ताह आपील हि पुण जगान तापोर घीन केरील हि कारण ते सोवसारान नाहं जोहलो मी आवो जगाम नाहं.

¹⁵ मी इही प्रार्थना केरतीन नाहं कि तू ताह संसारामाय काडीन ले पुण हे कि तू तान ता दुष्ट शैताना फायरीन रक्षा केर.

¹⁶ ते सोवसारान नाहं तोहोलोच मी ज्याह जगाम नाहं.

¹⁷ सत्य के द्वारा तू ताह पवित्र केर: तारो वचन खेरो हि.

¹⁸ जोहलो तू माहु ज्याह जगाम मोकलील तोहोलोच मी यान जगाम मोकलील हि.

¹⁹ मी तान केरता जीवाह तार केरता पवित्र केरीन हि जानकेरता कि ते पुण सत्यान द्वारे जीवाह तारो सेवा केरता आपथु एने जुवी.

आखा विश्वासीन केरता

²⁰ “पुण मी फक्त तान केरताच प्रार्थना केरीन नाहं तर तान केरता पुण जे तान संदेशा द्वारे मारपुर विश्वास केरती.

²¹ ता आखा एक एने जुवी ते पुण आमरा माय एक एने जुवी जानकेरता आबाक जगान विश्वास केरणू कि माहु तू मोकलील हि.

²² जो महिमा तू माहु आपील हि मी ताह आपील हि जानकेरता कि ते पुण तोहोलोच एक एने जुवी जोहलो आपु एक हेते.

²³ मी तामाय रेंय एने तू कुणबी रेहू, ज्यासे ते पुरो एकताल प्राप्त केरुहू एने जग ओलखिन लेहु कि तू माहु मोकलील हि एने तू ताह तोहोलोच प्रेम किरील हि जोहलो तू मारपुर प्रेम किरील हि.

²⁴ हे मारो आबाक, जे माणहे तू माहु आपील हि मारी ईच्छा हि कि जाहरी मी हि ताहरी तुमूह ते पुण मारहे-या रिजी जानकेरता कि ते पुण मारो महिमाह देखहुं शकणार जो तू माहु आपील हि कारण हि जगाह बोणावणेन पेल तू माहु प्रेम किरील हि.

²⁵ हे खेरो आबुक, जग तुवाह ओळखतेह नाहं पुण मी तुवाह ओलखिल हि एने मारा चेला ओलकतेह कि तू माहु मोकलील हि.

²⁶ मी फक्त तुमरीम नावान हिक कियील नाहं पुण मी ज्यान पुण हिक केरणे पुण लागाळ रेईन जानकेरता कि जे प्रेम जे तू मारपुर देखाडील हि तामाय पुण एने जुवी एने मी पुण तामाय रेव.”