यूहन्ना 15 - नाहाली

यीशु खेरो अंगूरानवेलो

¹ “खेरो अंगूरावेल मी हि एने, मारो आबुक माळी हि.”

² जी डाल मारामाय हि एने फोल आपतेन नाहं, तीह तो काटीन टाकथू; एने जी डाल फोल आपीह, ता डालखा तो काट टाकणे.

³ तुमूह तर ता वचनामुळे जे मी तुमूह कियील ऐवी तुमूह शुद्ध हि.

⁴ तुमु कुणबी बोणावीन रीवू, एने मी तुमरे माय रेईन जोहलो डाल जर वेलामाय नाहाएतो तर स्वताह ती फोल आपुह शकत नाहं तोहोलोच तुमूह भी मारामाय रेहू नाहं तर फोल आपुह शकत नाहं.

⁵ मी अंगूरानवेलो हि, तुमूह डालखा हि. जो मारामाय रेणे एने मी तामाय तो जादाच फोल आपथु, काहाकाय मारपूररीन आलेग एय कायीच केरूह शकत नाहं.

⁶ जर कूण मारामाय रेहू नाहं तर तो डालखीपूररीन टाकीन आपणे माय आवथू एने वाटीन जाथू एने माणुह ताह टुलू केरीन आकठाम टाकीन जातेह एने ते पेटालीन जातेह.

⁷ जर तुमूह मारामाय रेहू एने मारा वचन तुमरे माय रेहू तर जे जुवी ते मांगा एने ते तुमूह जुडी.

⁸ मारो आबाकने महिमा ताणुच एता कि तुमूह जुलुम फोल लीन आवु; तेविरीन तुमूह मारा चेलो बोनीह.

⁹ जोहलो आबुक मारपुर प्रेम किरील तोहोलोच मी तुमरे पोर प्रेम किरील हि; मारो प्रेमामाय बोणावीन रीवू.

¹⁰ जर तुमूह मारो आज्ञा मानणार तर मारो प्रेमामाय बोणावीन रेहू; जोहलो मी आपणो आबाकने आज्ञा मानणनये हि एने तान प्रेमामाय बोणावीन रेणे.

¹¹ मी ज्याह वातू तुमूह जानकेरता कियेल हि कि मारो आनंद तुम्रेमाय बोणावीन रेंय एने तुमरो आनंद पुरो एय.

¹² मारी आज्ञा हि कि जोहलो मी तुमरे पोर प्रेम किरील हि तोहोलोच तुमूह भी एक दिहरापुर प्रेम केरू.

¹³ ज्यापुररीन मोठू प्रेम कुणान नाहं कि कूण आपणो जोडीदाराकेरिन आपणो जीव आपील आपण्यू.

¹⁴ जी आज्ञा मी तुमूह आपथु जर तुमूह मानणार तर तुमूह मारा हेरी हेते.

¹⁵ एविरीन मी तुमूह दास केनार नाहं काहाकाय दासाचा मालूम नाह सोतू कि तान मालक काय करने; मी तुमूह हेरी कियील हि काहाकाय ज्या वातू आपणो आबाफायरीन होमल्या ता आखा तुमूह केयीन आपील.

¹⁶ तुमूह माहु निवाडील नाहं तर मी तुमूह निवाडील हि एने ठेरायेल कि तुमूह जाइन फोल लीन आवो; एने तुमरो फोल टिकीन रेणेन जुवी कि तुमूह मारो नावान जे काही मार आबाफायरीन मागू तो तुमूह आपणे माय आवी.

¹⁷ आवो वातून आज्ञा मी तुमूह तान केरता आपथु कि तुमूह एक दिहरापुर प्रेम केरणू.

जगान दोष

¹⁸ “जर जग तुमरो दोष करने तर तुमूह मालूम हि कि तुमरो पेलूच मारहे-या पुण दोष किरील.

¹⁹ जर तुमूह जगान रेणा हि, तर जग आपणेपूर प्रेम केरी हि: पुण ज्यानकेरता कि तुमूह जगान नाहं पुण मी तुमूह जगामाय निवाडील हि तामाय जग तुमरो दोष केरूह.

²⁰ जीवात मी तुमूह कियील एती दास आपणा मालकारीन मोठू नाहं ज्या या मेलू जर तान मारो तरास किरील तर तुमरो पुण द्वेष केरुहू; जर तास मारो वातू मानील तर तुमरो पुण मानती.

²¹ पुण हे आखा काही मारो नावामुळे तुवाहेर्यो केरुहू कारण ता माणहा मोकलणारा ओळखतेह नाहं.”

²² जर मी आवूह नाहरेने एने तुमरो बरोबर बोल्णु नाह तर ते पापी ठेरायेल नसतू; पुण ऐवी तान काल्लूच निमितान पापान केरता नाहं.

²³ जो मारहे-या द्वेष करने तो मारो आबाहेरी पुण द्वेष मेलाणु.

²⁴ जर मी तामाय ते काम किरील नसतू जे कूण किरील नाहं तर ते पापी ठेरना नसतू; पुण ऐवी तास माणहा एने मारो आबाक दुईजानाह देखील एने दुयुहे-या द्वेष किरील.

²⁵ हे तान केरता एय गीयो कि ते वचन पुरो एणेन जुवी जे तान व्यवस्था माय लिखील हि ताह मारहे-या उदईचुबी द्वेष किरील.

²⁶ पुण ताहेरया एतो मदत केरणार आवूह ज्याह मी तुमरेहे-यो आबाफायरीन मोकलुह म्हणजे सत्यान आत्मा जो बोगवाना फायरीन आवथू तर तो मारो गवाही हि.

²⁷ एने तुमु पुण मारा गवाही हेते कारण तुमूह सुरुवातीरीन मारहे-या रेणा हि.