यूहन्ना 13 - नाहाली

प्रभु भोज

¹ फसहने तीवारान पेल, यीशु ने देखील कि ज्याह जागाह सोडणे एने मारो आबाक फाय जाणेन टाइम आवा हि तेवी आवो जगाम जें तान एता एने ज्यापूर तो प्रेम केरतीन एता तापोर तान शेवेटरान प्रेम देखाडणे.

² हाजपुरणे रोटू केरतीन एता शैतान एविवूर शिमोन इस्कर्योतचा सोरो यहूदा ज्यान मोनाम टाकील एता कि यीशुह धोकाम लीन देरावीन आपणे जुवी.

³ यीशु, हे ओळखतेह एतो कि मारो आबुक आखा काही तान आथे होपीन आपील हि एने तो बोगवानारीन आवा हि एने बोगवानान आहने पोशा जात हि,

⁴ तान केरता जेवण सोडीन उबरील रेणू तान आपणा बाहेर फाडका काडीन एने एक रुमाल आपणो माहणे बाधील.

⁵ ओवतो एक गंगाळामाय पाणी बोरगे आपणो चेलान पाय धुवू लागिल एने ता कोमरोह बांधील रूमालाकेरिन नुसु लागिल.

⁶ ओवतो जेवी तो शिमोन पतरसान आहने गीयो, तेवी पतरसाने कियील, “हे प्रभु, काय तू मारा पाय दुवही हीच?”

⁷ उत्तर आपतेन यीशु कियील, “ऐवी तुवाह मालूम नाहं कि मी काय केरतीन हि, ओवतो तुवाह मालूम एय.”

⁸ पतरसाने ताह कियील, “तू मारा पाय केधीच धोवणे नाहं” यीशु ने उत्तर आपील, “जर मी धोवणे नाहं तर तुवाह माहफाय जागो जुळी नाहं”

⁹ शिमोन पतरसाने ताह कियील, “हे प्रभु, फक्त मारा पायुच नाहं, तर मारा आथ एने मारा मुंडे पुण धोवीन आप.”

¹⁰ यीशु ताह कियील, “ज्यान उगेलने केरील हि ताह आपणो पायान व्यतिरिक्त काही दोवन्या आवश्यकता नाहं तर तो पुरो शुद्ध एतो तुमूह माणहे शुद्ध हेते पुण आखाच नाहं.”

¹¹ यीशु ताह ओळखतेह एतो जो ताह धोकाम देरावदे एतो तान केरता तान कियील एता, “तुमूह आखा शुद्ध नाहं.”

¹² ओवतो ताहेरया तान पाय धुवील गीया तेवी तान आपणा बाहेर फाडका पोशा रीगाडीन लीईल एने आपणो जागे पोशा आवीन बोहील काय तुमूह ओळखतेह हि कि मी तुमरीकेरता काय किरील?

¹³ तुमूह माहु गुरु एने प्रभु केणु एने तुमूह योग्य हि कारण मी तो हि.

¹⁴ तान केरता जर मी प्रभु एने गुरु असून तुमरो पाय धुवील तर तुमूह पुण एकमेकान पाय धोवणे जूइ मी तुम्राओगाण मी एक वार्ता आपील हि.

¹⁵ जानकेरता तुमूह भी दिहराहे-यो तोज केरूह शकणार जे मी तुवाहेर्यो किरील हि.

¹⁶ मी तुमूह खेरो किथु एक दास आपणा मालिकाहारीन मोठू नाहं एणेन संदेश आपणार मोठू हि ज्यान तुवाह मोकलील हि.

¹⁷ जर तुमूह ज्याह वातू ओळखतेह हि एने तानहोस चालणु तर तुमूह धन्य हेते.

¹⁸ मी तुमूहहु आखान विषयाम किथी नाहं मी ताह ओळखणे ज्याह मी निवाडील हि एने हे पुण कि यहूदा विश्वास हि पुण मी ताह जानकेरता निवाडील हि कि शास्त्राचे वचन खेरो एने जुवी एने ज्यान मारी रूटू खादल्यी तो मारिनिरूध एनो.

¹⁹ ऐवी हि घटना घेडाणेनपोयले मी तुमूह जानकेरता किथे कि विश्वास तो मी हि.

²⁰ मी तुमूह खेरो खेरोज किथु कि जो कूण मान्हा मोकलने ग्रहण करने तो मान्हा ग्रहण करने एने जो मान्हा ग्रहण करने तो ताह ग्रहण करने ज्यान मान्हा मोकलील हि.

धोकान संकेत

²¹ हे केनेबादमाय यीशु आत्मा माय व्याकुल एनो एने गवाही आपील मी तुमूह खेरो किथे, तुमरे मायरीन एक ओहलो हि कि तो माहु धोका आपील देरावदे.

²² तेवी तान चेला एक दिहीरा देखाडहु लागिल ताह निश्चित एता नाह एता कि तो कुणीनबारामाय बोलीह हि.

²³ तान एक चेला तान आहनी बोहील एतो ताह यीशु जुलुम प्रेम केरतीन एतो.

²⁴ तेवी शिमोन पतरसाने ईशारो किरील कि पुसू का तो कूण एहू शकणे ज्यावीरूढ यीशु बोलीह एतो.

²⁵ यीशुन पोटताली चेलो ताह इहज तान छातीपूर वाकून ताह फुसील, “हे प्रभु तो कूण हि?”

²⁶ यीशु ने उत्तर आपील, रोटान टुकडा वाटकामाय बुडाविन ज्याह मी आपण्यू तोच हि ओवतो यीशु रोटान टुकडा वाटकामाय बुडावील एने तो विसीन शिमोन इस्कर्योतचा सोरो यहूदाला आपील.

²⁷ जोहलोबी यहूदाने रोटान टुकडा लियेल तामाय शैतानाने वास किरील ओवतो यीशु ताह कियील, जे तू केरणे निकलील हि ते जेल्दी केर.

²⁸ पुण ता जागापूर रूटू खाणेन बोहरेयीलमामरीन कुणबी हे सोमोजनो नाहं यीशु हे का कियील.

²⁹ काय भी विचार किरील कि पोयशान थैली यान एती तान केरता यीशु ताह किथी हि कि फसह तिवार केरता काही आवश्यक सामग्री लीन आवु केव्ही केतालू एतो कि गारीबांह काही आपील आपज्यू तान केरता यहूदाने रोटान टुकडा लियेल.

³⁰ जेवण केरील तां बाद तो तात्काळ निकलीन गीयो हि रातीने टाइम एतो.

नोवाली आज्ञा

³¹ तो निकलीन जायीलओवतो यीशु केदा, “माणहान सोरो ऐवी महिमात आवा हि एने तान द्वारे बोगवानान महिमा एनो हि.”

³² जर ताहानद्वारे बोगवानान महिमा एनो हि तर बोगवान आपणे फायरीन ताह महिमा आपण्यू एने ताह महिमा जेल्दी हि आपण्यू.

³³ हे मारो पोटताली सोरांन, मी ऐवी जारीकुच टाइम तुवाहेर्यो हि तुमूह माहु होदणे एने जोहलो मी यहूदी अधिकारीन कियील एता, तोहोलो तुमूह ता जागापूर आवहू शकत नाहं ता जागापूर मी जात हि, तोहोलोच तुमूह पुण किथे.

³⁴ मी तुमूह नोवालो आज्ञा आपथु कि तुमूह एकमेका हे-यो प्रेम केरू जोहलो मी तुमूह प्रेम किरील हि तोहोलोच तुमुबीही एकमेका हे-यो प्रेम केरू.

³⁵ जर तुमूह एकमेका हे-यो प्रेम केरुहू तेवी प्रत्येक जन ओलखिन लेती कि तुमूह मारा चेला हेते.

पतरसने यीशुह नकारणेन संकेत

³⁶ शिमोन पतरसाने ताह फुसील, “हे प्रभु, तू का जात हि?” यीशु ताह उत्तर आपील, “तू ऐवी मार पासाण आवहू शकत नाहं; पुण ओवतो तू मार पासाण आवूह.”

³⁷ पतरस ताह कियील, “हे प्रभु, ऐवी मी तारे पासाण काहा आव सकेत नाहं? मी तर तार केरता मारो जीव भी आप देह.”

³⁸ यीशु उत्तर आपील, “तू स्वताहन जीव आपण्यू? मी तुवाह खेरीच केथु का कुकडू वाह नाह देत ताहवोर तू माहु तीन वारीन नाकार दीही.”