यूहन्ना 11 - नाहाली

लाजरसान मोत

¹ मरियम एने तीन बोणिक मार्थान तान गावाम बैथानी माय लाजर नावान एक माणुह दुखाऱ्यो एतो.

² जी तीच मरियम एती जिने प्रभु पुर ईत्र टाकीन तान पायांना आपणो लेट्याकेरिन नुसेल एता, जिनुच बाहाक लाजर बिमार एतो.

³ केरीन: तान बोणिक ने केयीन मुकलेल, “हे प्रभु देखू, ज्यापूर तू प्रिय करने, तो दुखारया एतो.”

⁴ हे कोलाक यीशु कियील, “हा बिमारी मोरने नाहं, पुण बोगवानान महिमासाठी हि, कि ताउगेरीन बोगवानान सोरान महिमा एय.”

⁵ यीशु मार्था एने तान बोणिक एने लाजर ज्यापूर यीशु प्रिय केरतालु एतो.

⁶ तेभी पुण ताहेरया तान होमलील तो दुखारया हि, तो ज्या जागापूर एतो, ताहारी दुय दिह उंजू थोबीन गीयो.

⁷ ज्याबाद माय तान चेलाह कियील, “आवो आपु पोशा यहूदात जाहू.”

⁸ चेला ताह कियील, “हे गुरुजी, एव्ही तेभी यहूदी तारपोर दिगुड देतीहू हि, तेभी तू ताच जाथू”

⁹ यीशु उत्तर आपील, “काय दिहान बारा तास एता नाहं? जर कूण दिहामाय चालूह तर तो ठोकर खाण्यू नाहं, काहाकाय आवो जगान प्रकाश दिखेह.

¹⁰ जर कूण पुण राती चालन्यू तर तो ठोकर खाहोव काहाकाय तामाय प्रकाश नाहं.”

¹¹ तान ज्याह वातू, केदाह ज्यान बादमाय ता केहू लागिल, “आमारो लाजर हेरी हुवीन गीयो हि, पुण मी ताह जागे केरणे जात हि.”

¹² तेवी चेला ताह कियील, “हे प्रभुजी जर तो हुवीन गीयो हि तर हाजो एय जाहू.”

¹³ यीशुन तर तान मोरणेन बारामाय कियील, पुण ते समजील कि तान हुवणेबाराम कियील हि.

¹⁴ तेवी यीशु ताह हेल्लीच पुण केयीन आपील, लाजरस मोरीन गीयो हि,

¹⁵ एने मी तुममुळे आनंदित हि मी ताहारी नाह एतो ज्याह तुमूह विश्वास केरू. पुण ऐवी आवो आमु तान आहने जाहू.

¹⁶ तेवी थोमा ने जो दिदुमुस कियेल जाथू, आपणो तारी हे-या वाला चेलाह कियील, “आवो, आमु पुण ह्याच्या बरोबर मोरणेन चाला.”

यीशुच पुनरुस्थान एने जीवन

¹⁷ ताहारी पोचनेपोर यीशुह मालूम एय गीयो कि लाजराला माहणाम मेलीन चार दिह एय गीयो हि.

¹⁸ बैथानी यरूशलेमा आहने दुय मिल अंतरापूर हि.

¹⁹ जादा यहूदी मार्था एने मरियम जागे आपणो बायाकने मोरनापोर ताह सांत्वना आपणे केरता आवा एता.

²⁰ ताहेरया मार्था ने यीशुन आवणेन माहिती मिलने पुरीन ती ताह मिलने गीयी, पुण मरियम घेरामुज बोहीन रेणी.

²¹ मार्था ने यीशुह कियील, हे प्रभु जर तू न्या रेणू येतो तर मारो बाहाक मोरीज गीयू नसते.

²² पुण ऐवी पुण मी सोमजीतेवी कि जे काही तू बोगवाना फायरीन मांगुह बोगवान तुवाह आपण्यू.

²³ यीशु ताह कियील, “तारो बाहाक पोशा जीवतालू उठी”

²⁴ मार्था ने तीह कियील मी सोमजीतेवी कि शेवटेस दिहामाय पुनरुस्थान टाइम तो जीवतालू उठी.

²⁵ यीशु ताह केदा पुनरुस्थान एने जीवन मीच हि; जो कूण मारपुर विश्वास मेली तो मोरण्यू तेभी पुण जीवतालू उठी.

²⁶ एने जो कूण जीवतालू हि एने मारपुर विश्वास मेली तो अनंत काळापर्यंत मोरण्यू नाहं काय तू आवो वातुपोर विश्वास केरूह?

²⁷ तो ताह कियील, हा, हे प्रभु मी विश्वास केरूह कि बोगवानान सोरो जो मसीह जगामाय आवूह एतो तो तूच हि.

यीशु रेडनो

²⁸ हे केयीन ती निकलीन गीयी एने आपणी बोणिक मरियम ला हादाडळीन तीह गुपचुप कियील कि, “स्वामी आवा हि एने तुवाह हादतेन हि.”

²⁹ हे होमेलताच ती चालूच उठीन तान आहने आवी.

³⁰ यीशु ऐवी गावाम पोचना नाहएतुपुन तान जागीपोर एतुता मार्था ने तान भेट लीईल एती.

³¹ तेवी यहूदी तिहे-यो गिर एता, जे तीह सांत्वना आपतेन एता हे देखीन ती मरियम चालूच उठीन बाहेर गीयी हि ती माहणापोर रेडने जात हि ते तीन पासाण जाहू लागिल.

³² ताहेरया मरियम ताहारी पोहचीलही जाहारी यीशु एतो तर ताह देखताज तान पायापोर पोडीन केहू लागिल, हे प्रभु जर तू न्या रेणू येतो, तर मारो बाहाक मोरणु नसते.

³³ ताहेरया यीशुन तीह एने यहूदियाह जे तिहे-यो आवा एता ताह रेडतालु देखील तेवी आत्मा माय दुखाम एने दुखी एनो.

³⁴ एने कियील, तुमूह ताह का मिलील हि? हे प्रभु आवीन देखीन ली.

³⁵ यीशु रेडील.

³⁶ तेवी यहूदी केणेंन लागिल, देखू, तो तां पोर कोलाक प्रिय केरतीन एतो.

³⁷ पुण तामायरीन काही जाणाह कियील, काय हा ज्यान आंधलान डोला उघाडील, हे पुण केरूह शकील नाहं कि हा माणुह मोरणु नसते.

लाजराह जीवाडणेन

³⁸ पोशा यीशु मोनाम जादा दुखी इयेल माहणापूर आवा ती एक गुफो एती एने तीपुर एक दिगुड मेलील एतो.

³⁹ यीशु कियील, “दिगुड बाजूमाय केरू” ता बोणिक मुरलीन मार्था ताह केणेंन लागिल, हे प्रभु, तामायरीन ऐवी दुर्गंधी आवी कारण ताह मारीन चार दिह एय गीया.

⁴⁰ यीशु ताह कियील, काय मी तुवाह कियील नाह इतू का, जर तू विश्वास किरही ते बोगवानान महिमा देखहि.

⁴¹ तेवी तान ता देगडाह बाजूमाय किरील यीशु डोला उपेर केरीन कियील, हे आबुक, मी तारो धन्यवाद करने कि तू मारा होम्लीन लीईल हि.

⁴² माहु मालूम एतो, कायम तू मारा होमलथू पुण जी गेर्दी आजुबाजू उभी हि तामाय मी हे कियील ज्यान मुळे कि ते विश्वास केरणे जुवी कि तू माहु मोकलील हि.

⁴³ हे केयीन तान मोठला शब्दान आयेड मारीन कियील, हे लाजर, निकलीन आव.

⁴⁴ जो मरण जूळनो एतो तो बुजील फाडकान आथ पाय बांदायेल निकलीन आवो एने तान मूय रूमालाकेरिन बाधील एता यीशु ताह कियील, ताह सोडीन दया एने जाहू दया.

यीशुन विरुद्ध चाल

⁴⁵ तेवी जे यहूदी मरियम जागे आवा एता एने तान हे काम देखीन तापोर तामायरीन केताहा विश्वास किरील.

⁴⁶ पुण तान मायरीन काही जन फरीसीन उगे जाइन यीशुन कामान माहिती आपील.

⁴⁷ ज्यापूर मुख्य याजक एने फरीसी ज्यान मोठली सभा हादील एने कियील, आमु काय केरतीन हि? हा माणुह तर जादाच चिन्हे देखाळतालु हि.

⁴⁸ जर आमु ताह ओहलाच सोडीन आपुह तर आखा तापोर विश्वास मेलीन लेहु एने रोमी आवीन आमरा जागापोर एने जाती दुयुपूर राज्य केरूह लेहु.

⁴⁹ तेवी तान मायरीन कायफा नावान एक व्यक्तीने जो ता वर्षाचा महायाजक एतो ताह कियील, तुवाह कायीच मालूम नाहं;

⁵⁰ एने हे पुण होमजाडणे नाहं कि तुमरीकेरता हे हाजो हि कि आमरा माणहा केरता एक माणुह मारणे एने आखीच जाती नष्ट एणेन मां.

⁵¹ हि वात तान आपनेफायरीन कियील नाहं पुण ता वर्षाचा महायाजक ईयेन भविष्यवांनी केरील कि यीशु आवो जाती केरता मोरी.

⁵² एने ता जातीन केरता नाहं तर तान केरता पुण कि बोगवानान वेराय माय एईल सोराह एक्ठाच केरीन आपण्यू.

⁵³ केरीन ता दिहेरूनच ते ता ताह मारीन टाकणेन प्रयत्न केरूह लागिल.

⁵⁴ तान वजसे यीशु ता टायमापुरीन यहूदामय प्रसिद्ध एय फिरील नाहं पुण तारीन जेंगलामाय वाला, आहनेन प्रांतात ईफ्राईम नावान नगरात निकलीन गीयो आपणो चेला हेऱ्यो ताच रेणेन लागिल.

⁵⁵ यहूदीयान फसह तिवार आहने एतो एने जादा माणुह तीवारान पेल्ला दिहारीन यरूशलेमत गीया कि स्वताह शुद्ध केरुहू.

⁵⁶ केरीन ते यीशुह एतो लागिल, एने मंदिरामाय उबरीयेल रेयीन आपसामाय केणेंन लागिल, “तुमूह काय विचार केरता काय तो तीवारामाय आवूह नाहं?”

⁵⁷ मुख्य याजक एने फरीसीन हि आज्ञा आपील मिलील कि जर कोणीही मालूम हि कि यीशु का हि, तर केणेन म्हणजे ते यीशुह देरावीन लेहु.