याकुब 5 - नाहाली

मालदाराह चेतावणी

¹ हे मालदार, माणहा होमली लिवू, तुमु आपणेपूर आवणारे क्लेश याबाराम आयडी-आयडी रेडो.

² तुमरो धन नासले हि एने तुमरो फाडका कुन्यामाय खाइल टाकील हि.

³ तुमरो होनो चांदी माय जंग लागिल हि; एने तो जंग तुमरे पोर गवाही आपण्यू, एने हि प्रमाणे तुमरो माह खाइल टाकणे, तुमूह शेवटेस दिहान केरता धन टुलू केरील हि.

⁴ देखू, ज्या मजुराहा तुमरो खेत काटील, तान ती मोजरी जी तुमूह फ्साविल्यो मेलीन लीईल आयेडतेन हि, एने कापणी केरनारापुररीन आक्रोश सेनाधीनच्या प्रभुन कानापूर पोचाडीन गीयी हि.

⁵ तुमूह पृथ्वीपोर मोज्यामारणे व भोग विलास किरील एने मोठा हुख देखील; तुमूह आवो वधाच्या एक दिह आपणो हृदय देखाणेम पालनो केरीन ताह मटली तृप्ती केरील.

⁶ तुमूह धर्मी दोषी ठेरिनीन घात किरील, तो तुमूह विरोध नाहं केरतीन.

दुखा माय धीर देरणेन

⁷ तान केरता हे बायहो, प्रभुन आगमनापर्यंत धीर देरू. देखू, खेतावालो जोमनि पोर मोंगो पिंकाची वाट दिखिह येतो पेल्ला एने शेवेट पाई एईल धीर धेरनु.

⁸ तुमूह पुण धीर देरू; एने आपणो मोनाह केठीन केरू, कारण प्रभुन आगमन आहने आवा हि.

⁹ हे बायहो, एक दिहरापुर दोष मा लागाडू, म्हणजे तुमूह दोषी नाहं होवो; देखू, न्यायाधीश बायनाआहनी उबरील हि.

¹⁰ हे बायहो, जे भविष्यवाणी केरणे वाला प्रभुन नावान हादील कि, ताह दुख उठणे एने धीर देरणेन एक कित्ता होमजू.

¹¹ देखू, आमु धीर देरणारा धन्य केणे तुमूह. तर प्रतिफोल एय गीयो ताह पुण अय्यूब समजीतीजे लीईल हि, ज्याही प्रभुन जुलुम कायकेरथी एने दयादेखाह.

¹² पुण हे मारा बाहाक आखामाय हाजी वात जी हि का शपथ मा खाहू, नाहं स्वर्गान, नाहं पृथ्वीन, नाह कानलीभी वस्तून; पुण तुमरी वातू होव ते होव, एने नाहं ते नाहं, का तुमु दोषी ठेरहू नाह.

प्रार्थनान शक्ती

¹³ जर तुमरे माय वालो कूण दुखी रेंय, तर तान प्रार्थना केरावी जर आनंदमाय रेंय, तर तान स्त्रोतरे गावाह.

¹⁴ जर तुमरे माय वालो कूण दुखारया रेंय, तर कलीसियान डाय डायाह हादिन, एने ते प्रभुन नावा केरीन तापोर तेल लागाडील तान केरता प्रार्थना केरणू.

¹⁵ एने विश्वासान प्रार्थना द्वारे दुखारया वोच जाहू एने प्रभु ताह उठाळीन उबरीयेल केरुहू; एने जर तान पाप पुण किरील रेंय, तर तान पुण क्षमा एय जाहू.

¹⁶ तान केरता तुमूह जीवान केरता एक दिहरान ओगांण आपुआपु पापान गाब्रील केरीन ली, एने एक दिहिराकेरता प्रार्थना केरू, ज्याही हजो एय जाहू: धर्मीन प्रार्थनान स्भावाने जुलुम काही एहू शकते.

¹⁷ एलिया पुण तर आपणो सारखो दुख हुख देखहु माणुह एतो; एने तान विनंती केरीन प्रार्थना केरील कि पाणी नाहं पोडती; एने साडे तीन वो-यावोर जोमनि पोर पाणी नाहं पोडील.

¹⁸ ओवतो तान प्रार्थना केरील, तर आकाशा मायरीन पाणी पोडील, एने जोमनि पोर उपजाडीले.

¹⁹ हे मारो बायहो, जर तुमरे माय वालो कूण सत्यान मार्गापरत भटकून जाहू एने कूण ताह पासाणआवनार फिरणार,

²⁰ तर तो ज्यो जाण लेय काल्ला भोटकिल पापीह फिराव लावी, तो एक जीव भी मोरने से वोचाडी एने जुलुम पापा पोर पोडदो टाकी.