याकुब 4 - नाहाली

संसारा हेरी दोस्ती

¹ तुमरे माय लेढाय एने लेडाईल कारीन आवा? कायता सुख-विलासनी नाह जें तुमरो अवयवात भानगड लेडाईल हि?

² तुमूह लोभ लालूच, एने तुमूह जुडतो एने; ज्यान केरीता तुमूह घात केणु तुमूह लेळाय एने लेडानु केरणू तुमूह तान केरता नाहं जुडतो कि मांगतेन नाहं.

³ तुमूह मागनु पुण मिलवणे नाहं, तान केरता कि वाईट ईच्छेनि मागनु, म्हणजे आपणो चैनिकरीता खर्चकेरणेन केरीन.

⁴ हे व्यभिचारणी, काय तुमूह नाहं मालूम कि जनामाय जोडीदार केरणेन बोगवानान वैरी ठरिनतात? शेवेट: जो कूण जगान हेरी बोणावूहु ईच्छा हि, तो आपणो जीवाह बोगवानाह वैरी ठेरावील हि.

⁵ काय तुमूह हे होमोजणु कि पवित्र शास्त्र वाया किथे, “ज्या आत्माह तान आमरे केरता बोणाविल हि, काय ते ओहलोच लोभ देरील ताआ प्रतिफोल ईर्ष्या हि?”

⁶ तो तर होवटो कृपा केरणे; ज्या कारण ज्यो लिखील हि, “बोगवान गर्विष्टा हेर्यो विरोध करने, पुण नम्रपुर कृपा करने.”

⁷ तान केरता बोगवानान अधीन एय जा; एने शैतानाआं सामना केरू, तर तो तुमरो पापीरीन निकलीन जाहू,

⁸ बोगवानान आहने आवो तर तो पुण तुमरो आहने आवूह, हे पापी, आपणो मोनाह पवित्र केरू.

⁹ दुखी एवू, एने शोक केरू, एने रेडो, तुमरो ओहलो दुखा माय एने तुमरो आनंदने नाराजमाय माय बोदलीन जाहू.

¹⁰ बोगवानान ओगांण नम्र बोणु एने तो तुमु शिरोमणी बोनाडी.

बायहा पोर दोष लागाडणेन

¹¹ हे बायहो, एक तीहरा बदनामी मा केरू जे आपणो पायोहपरत बदनामी केरणू कियील पायापोर दोष लागडते, तो व्यवस्थाह दोषी ठरर्विलो; एने जर तू व्यवस्थापुर दोष लागाडणे, तर तू व्यवस्थापुर चालणारे नाहं पुण तापोर न्यायाधीश हीच.

¹² व्यवस्था आपणार एने न्यायाधीश तर एकुच हि, जो वोचाविल एने नष्ट केरणेम समर्थ हि. पुण तू कूण हि; जो आपणो शेजाऱ्यावर दोष लागाडणे?

बोडाईन विरुद्ध चेतावणी

¹³ तुमूह हे जे केणु, “आज केवी काल आमु कायताहा तेभी नरकात जाइन ताहारी एक वर्ष रेहू, एने व्यापारान कमाई केरूह.”

¹⁴ एने हे नाहं होमजाडणे कि काल काय एय? कोलाक तर ली, तुमरो जीवन हि तर काय? तुमूह तर वाफ सारकोस हि, जे थोडोक टाइम देखातेह ओवतो दिसेनाशी एता.

¹⁵ “ज्यापरीन तुमूह हे केणेंन जुवी, जर प्रभुन ईच्छा रेंय तर आमु जीवतालो रेहू, एने न्या किव्हा ताहारी काल केरुहू.

¹⁶ पुण ऐवी तुमूह हुशारकी केरीन बढाई केरणू; इही आखा बढाई वाईट एता.

¹⁷ तान केरता जो कूण हाजो केरणेन करने एने नाहं केरतीन, तान केरता हे पाप हि.”