याकुब 3 - नाहाली

जीभीह काबूम केरणेन

¹ हे मारो बायहो, तुमरो मायरीन मोक्तास जन शिक्षक मा बोणावूहु, कारण मालूम हि कि आमु शिक्षक उजू दोषी एय.

² तान केरता कि आमु आखा मोक्तास गाडा चुकीत जाथू; जो कूण वचनामाय नाहं चुकीह तोच तर सिद्ध माणुह हि एने आखा शरीरोरी पुण लगाम लागाडू केरसेक्तालू.

³ जेवी आमु आपणो तावामाय केरणेन केरता घोडो मुख माय लगाम लागाडणे, तर आमु तान आखा शरीराह पुण फिरिनूहु शकणे.

⁴ देखू, नाव पुण, ती ओलिक मटली रेणू एने जास्ती वाराआ लोटली जातेह, तेभी पुण एक हनोही हिकाडनेह सुकाणदाराच्या ईच्छा फिरिनिल् जातेह.

⁵ तिहिज जीभ भी एक आत्योज इस्सू हि, एने ती मोठली मोठली वातीन हुशारकी दिईल. देखू, आतल्या गेने कोलाक मोठली जेंगलामाय आगठो लागाडील जातेह.

⁶ जीभ पुण एक आगठो हि; जीभ आपणो अवयवात अधर्मन मंदिर हि, एने आखा शरीरपोर कायनेहाजो केरील, एने जीवनामाय आगठो लागाडील आपल्या, एने नरकान कुड्याच्या आखहा हेलगतालो रेणेन.

⁷ कारण प्रत्येक प्रकारान जीवे चिडा, एने सरपटणारे प्राणी, एने समुद्रा माय माणुह स्वभावो एता हि एने एय पुण गीया हि,

⁸ पुण जीभह माणहा मायरीन कुणी तावामाय नाह केर सकेत; ती एक ओहली हि जीव लेणारा विषा केरीन बोरील हि

⁹ ताजफाय आमु प्रभु एने आबाकने स्तुती कियीलतोह, एने इच्याकेरीनुच माणहाह जो बोगवानान प्रतीरुपान तियार एनो हि हाराप आपीह.

¹⁰ एकुच मुखाने स्तुती एने हाराप निकलहू. हे मारो बायहो, इही नाहं एणेन जुविकाय.

¹¹ काय झऱ्याच्या छीद्र्यामधून गुल्यो एने कोडवो पाणी दुय निकलहू?

¹² हे मारा बायहो, काय अंजीरान झाडामाय जैतून, किव्हा अंगूर वेलान अंजीर आवती? तोहोलोच खाऱ्या पाण्या मायरीन गुल्यो पाणी नाहं निकलने शकत.

स्वर्गीय ज्ञान

¹³ तुमरे माय ज्ञानी एने समजदार कूण हि? जो इही रेंय तो आपणो कामाकेरता हाजो चाल चालाळनारू नम्रतेने सादर केरणू जो ज्ञायांनी हाजो एता.

¹⁴ पुण जर तुमूह आपणा-आपणा मोनाम कोडवो पुण एने विरोध मेलतांलोन रेंय, तर सत्यान विरोधामाय खत मा केरूह, एणेन तर ठेगणे बोलहू.

¹⁵ हे ज्ञान ते नाहं जे उपेररीन उतरी, पुण संसारिक, एने शारीरिक, एने शैतानावोगरे हि.

¹⁶ कारण जेहेलो रागलागील एने विरुद्ध एता, ताहारी अव्यवस्था एने प्रत्येक खाराब काम पुण एतो.

¹⁷ पुण जे ज्ञान उपेररीन आवथू ते पेल्ला तर पवित्र एतो शान्तिप्रिय, सौम्य एने होण्या जोगे एने दया एने हाजा फोलान ज्यान पुरो एने अपक्षपाती निर्दभ इही हि.

¹⁸ पुरो शान्ति केरणारा धार्मिकता रूपी फोल ऐकठा-ऐकठा पेरील जातेह.