इब्रानियो 9 - नाहाली

पवित्र तम्बून सेवा

¹ ता पेल्ला वाचा माय पुण सेवा नियम एता, ओहलो पवित्र एतो जो आवो जगान एतो.

² काहाकाय एक मंडप बोनाईल गीयो, पेल्ला मंडप माय दिवो एने मेज समर्पणाच्या रोटा एता; एने ते पवित्र तीजागेन कियील जात एता.

³ दिहरो, पोडदु पासाण तो मंडप एतो, जो परम पवित्र तीजागेन केयेल जाथू.

⁴ तामाय बेनाआ धुपा वेदी, एने चारू बाजूने होना केरीन बोणाविल वाचान कोश एने कोशात मान्नांने बोरील होना सुवर्ण पात्र एने हारोनान होटी ज्यामाय फुल एने फोल आवीन गीया एता एने वाचान पाटी एता.

⁵ तान उपेर दुयुन तेजस्वी करूब एता, जे प्रायश्चित ढकनावर सावुलू किरील एता; तान एक एक केरीन वर्णन केरणेन टाइम ऐवी नाहं.

⁶ आवो वस्तु ज्यानप्रमाणे तियार एय गीया, ता पेल्ला मंडप मा याजक प्रत्येक टाइम प्रवेश केरीन सेवा काम पुरो केरतीन रेणू,

⁷ पुण दिहीरा तम्बूम महायाजक फक्त वऱ्योमाय एकुच वारीन जाथू, एने रक्त आपल्या तेवी जात नाहं, जा तो आपणो एने माणहान नेस्माजीत्लो किरील पापान केरता अर्पण करने.

⁸ ज्यासे पवित्र आत्मा ज्यो देखाडीह जेवीवूर पेल्लो मंडप उबरीयील हि, ताहवोर पवित्र स्थानान मार्ग प्रकट नाह इनू.

⁹ ज्यो मंडप वर्तमान टायमाकेरिन एक वार्ता हि; ज्यामाय ओहलो बलीदाने एने भेट अर्पण किरील जातेह, ज्यान मुळे आराधना केरनारण विवेकभाव पुरो एहू शकत नाहं.

¹⁰ काहाकाय फक्त खाणेन एने पीणेन वस्तु एने आलेग-आलेग उगंली विधीच्या आधारापूर शारीरिक नियम हेते, जे हुअदराविलो वेलवर साठीच ठेरायेल गीया हेते.

मासीहान लुयीन ताकेत

¹¹ पुण जेवी मसीह आवणारा हजहाज वस्तूंऊ महायाजक बोणावीन आवा, तर तान उंजू मोठला एने पुरो तम्बूतुन, जो आताकेरिन बनविल्य नाहं म्हणजेच आवो पृथ्वीन नाहं,

¹² एने बोकडाआ एने कोकऱ्या च्या रक्तान द्वारे नाहं, पुण आपणाच रोगुतरी, एकुच वारीन पवित्र स्थानात प्रवेश किरील एने अनंत सुटकारो प्राप्त किरील.

¹³ काहाकाय जेवी बुकडान एने बोयलो रक्त एने कलराची रीवू चे अपवित्र मान्हापुर साटीलो शरीरान शुद्धीकरणासाठी ताह पवित्र केरतीन असतो,

¹⁴ तर यीशु मसीहान रक्त ज्यान स्वताह पिडीन पिडी आत्मान द्वारे बोगवानान ओगाण निर्दोष अर्पण किरील, तुमरो विवेक बुद्धीला मरण पाविल्यो कामापुररीन काहा हाजो केरुहू नाहं तुमूह जीवतालू बोगवानान सेवा केरू.

¹⁵ ज्यानकेरता तो नोवालो वाचान मध्यस्थ हि, म्हणजे तान मोर गीयो जे पेल्ला वाचान टाइमो अपराधा पासून सुटका एणेन केरता एनो हि, हादाळल्यु माणहे वचनामाय अनंत वारिस मिलीजावू.

¹⁶ काहाकाय जाहारी वाचा बाधील हि ताहारी वाचा बाधनारु मरण समजून लेणे पुण जरुरी हि.

¹⁷ काहाकाय ओहलो वाचा मरण पावताना नक्की एता हि, एने जेवीवोर वाचा बंधनारू जीवतालू रेणे ताहउर वाचा कामा रेथे नाहं.

¹⁸ तामुळे पेल्लो वाचा पुण रक्तावासदिते बाधील गीयो नाहं.

¹⁹ काहाकाय जेवी मुसान आखा माणहाह व्यवस्था वाचीन देखाडील, तर तान पाठलो एने बुकडान रक्त लीन, पाणी एने रातलो करमीजी लोकर, एने एजोब साळो बरोबर ता पुस्तकापुर एने मान्हापुर शिपटीलो आपील.

²⁰ एने कियील, “हे ता वाचान रक्त हि, ज्यान आज्ञा बोगवानान तुमरीकेरता आपील हि.”

²¹ एने ज्यानप्रमाणे तान मंडप एने सेवान आखा साहित्यापोर रक्त सिपडीलो.

²² खेरीच तर हे हि कि व्यवस्था नुसार म्हणजे: आखा वस्तु रोगुतरी शुद्ध केरील जातेह, एने रक्त आवील तेवी पापान क्षमा एता नाहं.

मासीहान बलीदान द्वारा पाप-क्षमा

²³ तामुळे जरुरी हि कि स्वर्गाम मेरयो सामानाहारखेज आवो बलीदाना केरता शुद्ध किरील जाणेन जुवी, पुण होर्गारीन वस्तु स्वताह यामाय श्रेष्ठ बलीदानाने शुद्ध एने जरुरी हि.

²⁴ काहाकाय मसीह ता आथा केरीन बोणाविल मिलील पवित्रस्थानामाय, जा खेरा पवित्र स्थानान उदाहरण हि, तामाय प्रवेश नाहं किरील पुण स्वर्ग मायुच प्रवेश किरील, म्हणजे आमरे केरता बोगवानान ओगांण देखाणे जुवी.

²⁵ ते नाहं कि तो स्वताह पोशा पोशा चेढावो, तोहोलोज महायाजक दरिनर्हे दिहरान रक्त लीन पवित्र जागापूर प्रवेश केरतीन रेणे,

²⁶ नाहं तर जगाच्या स्थापनेपासून ताह पोशा पोशा दुख सहन केरणू लागिल हि; पुण युगान संपली माय तो एकुच वारीन प्रकट एनो, हि म्हणजे आपणाच बलीदानाने पाप सेटो केरीन आपण्यू.

²⁷ एने जोहलो माणहान केरीन इकवारी मुरील एने ताबादमाय न्याय एने ठेरायेल हि,

²⁸ तोहोलोच मसीह पुण केताजोहो पाप्यान लेणे केरता एकुच टाइम बलीदान एनो; एने जे माणहे तान वाट देखताला तान उद्धार केरता दिहीरीवारीन पाप विस्ताच देखाईल.