इब्रानियो 7 - नाहाली

मलिकिसिदक याजक

¹ हा मलिकिसिदक शालेमान राजा, एने परात्पर बोगवानान महायाजक, काय मी याजक बोणावीन रेणे. जेवी अब्राहाम राजाह मारीन पोशा जात एतो, तेवी हाजो मिलिन ताह आशीर्वाद आपील.

² ज्याह च अब्राहामने आखा वस्तून दहावा भाग आपील. हा सुरुएताच आपणो नावान अर्थानुसार धर्मान रीवू, एने ओवतो शालेम म्हणजेच शान्तिन राजा हि.

³ ज्यान आबुक नाहं, केव्ही आहाक नाहं, वोच नाहं, ज्यान दिहान सुरुवात हि एणेन जीवनान शेवेट हि; पुण बोगवानान सोरान होस बोणावीन तो आखा केरीन याजक बोणावीन रेणे.

⁴ ऐवी ज्यापूर ध्यान मेलू का तो कोहलो मोठू एतो ज्याह पिडीन अधिकारी अब्राहामने बाड उत्तमातून हाजो मालाहेर्यो दहावा भाग आपील.

⁵ लेविन संतती तीही जे याजकाचे पद मेलविल, तर ताह आज्ञा मीलनी हि कि माणहाह, म्हणजेच आपणो बायहो पोररीन जरीतो अब्राहामच्या दीलाप का नाहं जन्मूला एती, पुण व्यवस्था च्या नियमाहोस दहावा भाग लेणेन जुवी.

⁶ पुण याने, जो तान वोच मायलो पुण नाह एतो, अब्राहामा फायरीन दहावा भाग लियेल, एने ज्याह वाचा जुडील एता ताह आशीर्वाद आपील.

⁷ याम शंका नाहं कि आत्या मोठला फायरीन आशीर्वाद जुडणे.

⁸ एने न्या मोरणारान माणुह दहावा भाग लेतेन हि, पुण ताहारी तोच लेणे त्याजीवाणु गवाही आपील जातेह कि तो जीवतालो हि.

⁹ तर आमु हे पुण केहू शकणे कि लेवीणे पुण, दहावा भाग लेणे, अब्राहामा हेर्यो दहावा भाग आपील.

¹⁰ काहाकाय जेवी मलिकिसिदक आपणा आबाक मिलील, ता टैंमापोर लेवी जीही तान पूर्वज अब्राहाम तान शरीरा माय इतू.

मलिकिसिदका हारकू दिहरू याजक

¹¹ तेवी लेवी याजकान पोदान पूर्णता जुडतो रेंय (ज्यान मदत से माणहाह व्यवस्था जुडील एती) ते ओवतो काय जरुरी एतो का दिहरो याजक मलिकिसिदकान रीतीपूर उबरेणें जुवी, एने हारोनान रीतीन नाय केवांय.

¹² कारण ताहेरया याजकाचे पद बोद्लील जातेह, तर ओवतो व्यवस्था भी बोदेलने जरुरी हि?

¹³ काहाकाय ज्यान विषयी आवो वातू केदाह जातेह तो दिहीरा वंशातला हि, ज्या वंशामाय वालो कुनुस वेदी जहेर्यो काम किरील नाहं,

¹⁴ तर उघड हि कि आमारो प्रभु यहूदांच्या वंशामरीन पायदा हि एने आवो, वंशान विषयातमाय मुसान याजक पदाच्या कायीच चर्चा केरील नाहं.

¹⁵ आमारो धावा उंजू पुण स्पष्ठ पुण उघड एता हि, कि जेवी मलिकिसिदका हारका उंजू एक याजक उत्पन्न एता हि,

¹⁶ जो शारीरिक आज्ञा व्यवस्था प्रमाणे नाहं, पुण नाश एय नाहं ओहला जीवनान सामर्थ्यान अनुसार मेलील हि.

¹⁷ काहाकाय तान विषयामाय जी गवाही आपील हि, “तू मलिकिसिदकान रीतीपूर पिडीन पिडी याजक हि.”

¹⁸ ज्याह मालूम आज्ञा कमी एने निष्फळ ईलकेरिन ती रद्द एनी हि.

¹⁹ ज्यानकेरता कि व्यवस्थाने काल्लूच वातील पुरावत्लू केरील नाहं, एने तान जागीपोर एक ओहलो हाजो आशा मिलील गीयी हि ज्यान केरीन आपु बोगवानान आहने जाहू शकणे.

²⁰ मसीहान नियुक्ती शपथ आपल्या तेवी केरील नाहं,

²¹ काहाकाय ता बिना शपथ लियील याजक पद ठेरावाय जाईल पुण जी शपथ हेऱ्यो ताफायरीन निवाड लेदो जो तान विषयामाय कियील, “बोगवानान शपथ लीईल, एने तो तान उगेरीन बोदली नाय सेकी कि तू पिडीन पिडी याजक हि.”

²² ज्यानप्रमाणे यीशु एक हाजो वाचाचा गवाहीदार ठेरेल.

²³ ते तर जुलुम मोठला संख्यमाय याजक बोणावूह आवा, ज्यान कारण हे एता कि मरण ताह रेहू आपतेन नाहां एती;

²⁴ पुण हा पिडीन पिडी रेथे हि, तामुळे तान याजक पद अटल हि.

²⁵ ज्यानकेरता जे तान द्वारे बोगवानान आहने आवते, तो तान पुरो पुण उद्धार केरूह शकणे, कारण तो तान केरता विनंती केरणे कायम जीवतालू हि.

²⁶ केरीन ओहलोच महायाजक आमारो योग्य एतो जो पवित्र, एने केरणे एने निर्मळ, एने पापी जनापुररीन आलेग, एने स्वर्गाहून पुण उचो किरील जुवी.

²⁷ ता महायाजक होस ताह जरुरी नाहं कि दारीजे देखील आपणो पापान केरता ओवतो माणहान पापान केरता अर्पण पिटलीइ; कारण तान स्वताह मोरना चेढाविन एकुच वारीन पुरो केरूह आपील.

²⁸ व्यवस्था दुर्बल आशा माणहा महायाजक नेमतो, पुण व्यवस्था पासाण शपथ वोयीन विसील वचन, पिडीन पिडी परिपूर्ण किरील सोराह नेमतो.