इब्रानियो 6 - नाहाली

¹ ज्यानकेरता आवो मसीहान हिकाडील पेल्ली वातूह सोडीन आपु सिद्धता वूखेर ओगांण जाता, एने मुरील काम केरता मोन फिरावू, एने बोगवानापोर विश्वास करने,

² एने बाप्तिस्मा एने आथ मेलणे, एने मुरीलाह जीवतालू केरणेन, एने अनंत न्यायान शिक्षणाचा स्वरूप पाया पोशा टाकु नाहा.

³ जर बोगवानान पोटील तर आपु ज्याच केरूह.

⁴ कारण तान केरता इकवारी उजालो जूळनो हि, एने जे स्वर्गीय वरदानान चोव चाख चुकील हि एने पवित्र आत्मान भेलाईल एय गीयो हि,

⁵ एने बोगवानान श्रेष्ठ वचनमाय एने आवणारा काळान सामर्थ्याआ चोव चाखीन चुकील हि,

⁶ जर ते बहकून जाहू तर तास मोन फिरावणे केरता पोशा नोवालो बोणणेन अशक्य हि; कारण ते बोगवानान सोरो आपणे केरता पोशा क्रुस पोर चढवीतले उघड पुण तापोर दोष लागडते.

⁷ काहाकाय जोमनि पोर पायो पाण्या, जे तान उपेर पोशा पोशा दोवडतीन हि पिईन पिईन ज्या माणहा केरता ती जुपल्यु केरीन पेरील जात हि, तान कामा साळो उब्जाडील, तीह बोगवानारीन आशीर्वाद जुडणे.

⁸ पुण जर ती झाडे एने काटो कुसळे उगाडल्यु बिनकामात एने शापित एय, हि एने तीन शेवेट पेटालीन टाक्लू हि.

⁹ पुण हे प्रियानो, जर आमु ज्याह वातू किथी हि तेभी तुमरो विषयी यापोरीन हाजो एने उद्धारान वातून विश्वास मेलतांलोन असतो.

¹⁰ कारण बोगवान अन्यायी नाहं कि तुमरो काम, एने ता प्रेमाला विहिरीन, जो तुमूह तान नावाकेरता ज्यानप्रमाणे देखाडील हि, हि पवित्र माणहान सेवा एने केरतेच हि.

¹¹ पुण आमु ईच्छा करने कि तुमरेफायरीन प्रत्येक जन शेवटपुररीन पुरो आशाकेरता ओहलाच प्रयत्न केरतीन रीवू.

¹² तुमूह आळशी एता जाहू नाहा, तान अनुकरण केरू जे विश्वास एने वाचान वारिस ऐतेह.

बोगवानान केधी नाह टेलनार प्रतिज्ञा

¹³ बोगवानान अब्राहामा हेर्यो वचन आपतेलीन ताहेरया शपथ लेणे केरता कुणीहुच आपल्याहून मोठा देखील नाहं, तेवी आपणाच शपथ लीन कियील,

¹⁴ “मी खेरी खेरीच तुवाह आशीर्वाद आपण्यू, एने तारो संततीला वाठ्तलो जाहू.”

¹⁵ एने आवो प्रमाणे तान धीरज देरीन प्रतिज्ञा आपील वात मेलविल.

¹⁶ माणुह ते आपणेह रीन कुणा मोठलान शपथ लेईन केणे, एने तान प्रत्येक निर्णय एखठा जाहू नक्की एतो.

¹⁷ तामुळे ताहेरया बोगवानान प्रतिज्ञा वारसावर उंजू स्पष्ठ पुण प्रकट केरणेन प्रयत्न किरील कि तान उद्देश बोद्लील शकत नाहं, केरीन शपथीला माय लावील.

¹⁸ म्हणजे दुय बोदलनार वातून, ज्यानस विषयी बोगवानान ठेगणे ठरिनिल्य अशक्य हि, मजबूत आमरा हिम्मत बांधीन जाणेन जुवी, जे आश्रय लेणे केरता ज्यानकेरता गुगदिलो हि कि ता आशाहा मिलील हि ती जोडली.

¹⁹ ती आशा आमरे केरता आमरा जीवान केरता ओहली एल हि, जी स्थिर एने मजबूत हि एने पोडदु माय ताहवोर पोचणे,

²⁰ जा यीशु मलिकिसिदकान रीतीपूर कायम आज महायाजक बोणीन, आमरे केरता सिडिक देखाडनारान रुपाम प्रवेश किरील हि.