इब्रानियो 3 - नाहाली

यीशु मुसा से हाजो हि

¹ तान केरता हे पवित्र बायहो, तुमु जें स्वर्गीय हादाडील माय भेलाईल जावो, ते प्रेरित एने महायाजक यीशुपुर ज्याह आमु स्वीकारीन, ध्यान किरो.

² तो आपणी नियुक्ती केरणारान केरीन विश्वास योग्य इतू, जीही मुसा भी बोगवानान आखा घेराम इतू.

³ कारण यीशु मुसापेक्षा रेवू होवटो महिमान योग्य सोमजील गीयो हि, जोलोक कि घेराह बनीवणारा कोपेक्षा जादा मान मेली.

⁴ काहाकाय प्रत्येक जन घेरान कुणबी बोनावनारु असतो, पुण ज्यान आखा काही बुणील तो बोगवान हि.

⁵ मुसा तर बोगवानान आखा घेराम दासान होस विश्वासनीय रेणू कि ज्या वातून वर्णन एय एता, तान गवाही आपजी.

⁶ पुण मसीह सोरान होस बोगवानान घेरान अधिकारी हि; एने तान घेर आपु हेते, जर आपु हिम्मत एने आपणो आशान अभिमानापुर शेवटपुररीन स्थिर रेणा तर.

अविश्वासीन प्रती चेतावणी

⁷ केरीन जीही पवित्र आत्मा केणे, जर आज तुमूह तान शब्द होमेलहू,

⁸ ते आपणा मोनाह कठोर केरहू मा, तोहोलोज राग आपणे पोर एने परीक्षेन दिहामाय जेंगलामाय किरील एता.

⁹ जाहरी तुमरो पेलाआमादुऊ माहु पारखीन परिक्षा केरील एने चाळीस वर्ष ताहवोर मारा काम देखील.

¹⁰ ज्यानकेरता मी ता वेलान माणहाहे-यो रागाम रेणो, एने कियील, न्यान मोन भटकत रेणेन एने ज्याच मारो वाटे ओलखिल नाह.

¹¹ तेवी मी रागामाय आवीन शपथ खायील, ते मारो आरामाम प्रवेश केरूह शकणार नाहं.

¹² हे बायहो, होमंबालीन रीवू कि तुमरे माय इही वाईट एने अविश्वासी मोन रेहू नाहा, जे तुमूह जीवतो बोगवानारीन सेटो लीन जाहो.

¹³ पुण ज्या दिहावोर आज दिह आरामकेरता कियेल जाथू, प्रत्येक एक दिह एक दिहीराह होमजाळीन रीवू, एने इही एणेन मां कि तुमूमायरीन कोलाक जन पाप्यान छळात आवीन कठोर एय जाहू.

¹⁴ कारण आमु मसीहान भेलाईल एय गीयो हि, जर आमु पेल्लाठीच विश्वासपूर शेवटपुररीन मजबूत स्थिर रेणा.

¹⁵ जीही कियील हि, “जर आज तुमूह तान शब्द होमेलहू, ते आपणा मोनाह कठोर केरहू मा, जोहलो का राग आपील टाइम किरील एता.”

¹⁶ हाजो कायताहा माणहान होम्लीन राग चीढविले? कायता आखाच नाहं, कि जे मुसाद्वारे मिस्रमधून निकेलना एता?

¹⁷ एने तो चाळीस वर्ष ताहवोर कायताहा माणहानव जसे खोत रेणू? काय त्याकेरिन नाहं तान केरता पाप किरील, एने तान शरीर जेंगलामाय पोडीन रेणा?

¹⁸ एने तान कुणाहेरी शपथ बुंदे कि तुमूह मारो आरामामाय प्रवेश केर शकणार नाहं? काय फक्त तान हे-योच नाहं तान केरता आज्ञा मानील नाहं?

¹⁹ केरीन आपु दिखेह कि ते अविश्वासान प्रवेश केरूह शकले नाहं.