इब्रानियो 2 - नाहाली

महान उद्धार

¹ आवो काइजाताहा जुवी कि आपु ता वातुपोर ज्या होमल्या हेते, उजू मोन लागाडणे जुवी, ज्यान केरताला का ताउगेरीन भोटकीन शेटे नाह गीयो.

² काहाकाय जे वचन स्वर्गदूतान कियील गीया एता ताहेरया ते स्थिर रेणा एने प्रत्येक अपराध एने आज्ञा मानणाराह बोरबरे फोल जुडील,

³ तर आपु ओहला मोठला उद्धार फायरीन सेटेपालत्लु केरीन केवी तुमु शकणे? ज्यान वात पेल्लाठीच प्रभुन द्वारे एनी, एने होमलणारे द्वारे आमूह तान खात्री पोटनि.

⁴ एने हेरी बोगवान पुण आपणो ईच्छा चिन्ह, अदभूत कामे, एने अने क प्रकारान पराक्रमान कामे, एने पवित्र आत्मान वरदानोहो वाटनेमाय ज्यान गवाही आपतेन रेणू.

आपणो उध्दारकेरता

⁵ तो ता आवणारा जगाह ज्यान वात आपु केर्तेह, स्वर्गदूतान स्वाधीन नाह किरील.

⁶ पुण कूण कां हि गवाही आपील हि, “माणुह कूण हि कि तू तानचा आविह लेणे? केव्ही माणहान सोरो कूण हि कि तू तान चिंता करने?

⁷ तू ताह स्वर्गदूताह थोडोक थोडो किरील; तो तां पोर महिमा एने थोरिनी ज्यान मुकूट मेलील, एने ताह आपणो हातान कामापुर अधिकार आपील.

⁸ तू आखा काही तान पायान केरीन आपील.” तान वजेसे जर तान आखा तान अधीन केरीन आपील, तर तान कायीच राखीन मिलील नाहं जो तान अधीन नाहं. पुण आमु ऐवी ताहवोर आखोज तान अधीन देखीह नाहं.

⁹ पुण आमु यीशुह जो स्वर्गदूताह जारीकुच थोडो किरील एतो. मुरील दुख उठलीताहा महिमा एने आदरान मुकूट पेरील दिखेह म्हणजे बोगवानान कृपान वजसे तो प्रत्येक माणहान केरीन मोरने चोव साखित.

¹⁰ काहाकाय जानकेरता आखा काही हि, एने ज्यान उगेरीन आखा काही हि ताह ज्याच हाजो लागीह कि जादा सोराह महिमात पोचाडणार, तर तान उद्धार हारायागोलू दुख उठलीताहा सिद्ध केरणू.

¹¹ काहाकाय पवित्र केरणार एने जे पवित्र किरील जातेह, आखा एकुच मुळाफायरीन हि; आवो कारणाने ताह बाहाक किही लाज नाहं.

¹² तो किथे, “मी तारो नाव आमरा बायाक होमलाडूह; सभा माय मी तारो भजन गावणार.”

¹³ एने ओवतो हे, “तापोर मी विश्वास मेलूह एने ओवतो हे, देखू मी ता सोराहेऱ्यो ज्यान बोगवानान माहु आपील.”

¹⁴ तान केरता कि ताहेरया सोरा माह एने रक्ता हेरी भेलाईल हेते, तर स्वताह पुण तान सारखो तान भेलाईल एय गीयो, म्हणजे मनारापरत ताह मोरनापोर शेक्ती जुडी एती, म्हणजे शैतानाहा बिनकामान केरीन आपण्यू;

¹⁵ एने जोलाक मोरणेन भयामुळे आयुष्यमाय गुलामामाय गुंतले एता, ताह सोडवणू.

¹⁶ काहाकाय तो तर स्वर्गदूतांना नाहं तर अब्राहामच्या वाडवडील सांभालतालू.

¹⁷ ज्यानकेरता ताह जुवी एता, कि आखा वातू आपणो बायहो होस बोणणेन जुवी; ज्यान मुळे तो ता वातीमाय जे बोगवानाबरोबर संबध मेलतेन, एक दयाळू एने विश्वास योग्य महायाजक बोणणेन जुवी म्हणजे माहु पापान केरता पश्चाताप केरुहू.

¹⁸ काहाकाय ताहेरया तान परीक्षेच्या टाइम दुख सहन किरील, तर तो तान पुण मदत केरूह शकणे ज्यान परिक्षा एता हि.