इब्रानियो 13 - नाहाली

मसीही जीवन जीवणेन निर्देश

¹ बायहा पोर प्रेम टिकीन रिजी.

² चाकरी केरणे विहरने मा, काहाकाय याच्याद्वारे काही माणहान मालूम नसताना स्वर्गदूतान सेवा केरील हि.

³ बायहो इही देखरेख केरू कि जोहलो काय तुमूह पुण बंदी हि, एने ताहेरी वाईट वागणू केरील जातेह, तान बरोबर पुण ओहलो वागणू केरू, कि आमरा पुण शरीर हि.

⁴ वाराड आखामाय मान योग्य एय, एने आथरील निर्दोष एय, काहाकाय बोगवान व्यभिचारी, एने जारकर्म केरणारान न्याय केरुहू.

⁵ तुमरो स्वभाव द्रिन्य लोभ रेनुजीवे, एने जे तापोर हि तामाय संतोष मानू; काहाकाय कियील हि, “मी तुवाह केविज सोडणार नाहं एने केधीच टाकणे नाहं.”

⁶ तामुळे आमु धैर्याने किथे, “प्रभु आमारो मदत केरणार हि; माणुह मारा काय केरूशेकीनाय.”

⁷ जे तुमरो कानरू एता, एने तान केरता तुमूह बोगवानान वचन केणे हि, तान इआवीह केरू; एने लक्ष्य लागाडील तान वागणे उजू शेवेट देखीन तान विश्वासाचे अनुकरण केरू.

⁸ यीशु मसीह काल, आज एने कायम हारकुज हि.

⁹ आलेग-आलेग प्रकार ने विचित्र हिकणासे बोहकी मा जाहू, काहाकाय मोनान कृपा माय मजबूत रेणेन हाजो हि, नाह ते त्यू खाणेन वस्तु मेलनाराह कायीच फायदो नाय एय.

¹⁰ आमरी एक ओहलो वेदी हि तापारीन खालो अधिकार ता माणहाह नाहं जे मंडप सेवा केरणू.

¹¹ काहाकाय जां जनावरान रक्त महायाजक पाप-बलीन केरीन पवित्रस्थान माय ली जाणे, तान देह छावणीन बाहेर पेटाडने माय आवताली.

¹² ज्यानकेरता, यीशु पुण माणहाह आपणाच रक्ताने पवित्र केरणेन केरता बायणा बाहेर दुख सहन किरील.

¹³ तामुळे चाला, तान निंदा आपनिपूर लीन देडापुर तान आहने निकलीन जाहू.

¹⁴ काहाकाय न्या आमरा काल्लोज स्थानिक नगर नाहं, पुण आमु आवणारा नेगरान होदतेन हि.

¹⁵ तामुळे आपु ताउगेरीन स्तुतीचे बलीदान, म्हणजे ता ओठांचे फोल जे तान नावान स्वीकार केरणू, बोगवानान आखोवाला चेढावताला रिजी.

¹⁶ हाजो केरणेन एने दान आपणार विहरने मा, कारण बोगवान ओहला बलीदाना केरता आनंद एतो.

¹⁷ आपणो अधिकाऱ्यांन आज्ञा मानू एने तान अधीन रीवू, काहाकाय ते त्यासारखो तुमरो जीवाह रक्षणाकेरिन जागे रेतेह ज्याह हिशोब आपणे लागी; ताह हे काम आनंदमाय केरणू, नाह हेल्ली हाह केरणू, कारण आवो परिस्थितीम कायीच फायदा नाहं.

¹⁸ आमरे केरता प्रार्थना केरतीन रीवू, काहाकाय आमुहू वारुज हि कि आमरा विवेक शुद्ध हि; एने आमूह आखा वातून हाजो वागणेन ईच्छा हि.

¹⁹ प्रार्थना केरणेन केरता उंजू तानकेरीन कि मी जेल्दी तुमरेहे-यो आवहू.

²⁰ ऐवी शान्ति आपणार बोगवान, जो आपणा प्रभु यीशुला जो मेंढरा मोठू मेंढपाळ हि अनंत वाचाच्या रक्तान गुनुहोये मोरना मायरीन जीवतालू केरीन लीन आवा,

²¹ तुमूह प्रत्येक हाजी वातू माय पोरो एने जुवी, जा से तुमूह तान ईच्छा पुरी केरू, एने जो काही ताह पोटणे यीशु मसीहान द्वारे आमरे माय पुरो केरी, तान महिमा पिडीन पिडी एता रेणे जुवी. आमेन.

²² हे बायहो, मी तुमूह विनंती करने का आखी हिकाडील वातूह सहन केरली, कारण मी तुमूह जुलुम थोडोक लिखील हि.

²³ तुमूह हे मालूम एणेन जुवी कि तीमुथियुस, जो आमारो बाहाक सुट जायील हि एने तो जेल्दी आवीन जाहू तर मी ताहेऱ्यो तुमूह जुडी.

²⁴ आपणो आखा अधिकारीन एने पवित्र माणहा नमस्कार केरू. ईटली माणहे तुमूह नमस्कार केणु.

²⁵ तुमु आखापूर कृपा एती रेंय. आमेन.