इब्रानियो 11 - नाहाली

विश्वासान उदाहरण

¹ ऐवी विश्वास आशा किरील वस्तु विश्वास, एणेन देखाणारे वस्तून खात्री हि.

² काहाकाय तान विषयामाय डावालान हाजी गवाही हि.

³ विश्वासान च आमु होमजाडीन जाथू कि आखा जगान स्थापना बोगवानान वचनाने एनी हि पुण हे नाहं कि जे काही देखाणेम आवी, ते देखेल बिडारापुररीन बोणील हि.

⁴ विश्वासामाय हाबेलाने कैन पेक्षा श्रेष्ठ बलीदान बोगवानान केरता चेढ़ाइल; एने तापोर तान खेरो ला गवाही पुण आपील गीयी, काहाकाय बोगवानान तान अर्पणाविषयात गवाही आपील; एने तामुळे तो मरण जूळनो तेभी एविवूर बोलीह हि.

⁵ विश्वासामाय हनोख विशेल गीयो, कि मोरणाह देखहुं नाहा, एने तो सापडेल नाहं कारण बोगवानान ताह विसीन लीईल एता, एने तान उखीलील जाणे पेलूच तान बारामाय हि गवाही आपील एती कि तान बोगवानान आनंद किरील हि.

⁶ एने नेउनारू ताह आनंद केरणेन अशक्य हि; कारण बोगवानान आहने आवणाराह विश्वास केरणे जुवी, कि तो हि एने आपणो होदणारा तो प्रतिफोल आपथु.

⁷ विश्वासामाय नोहाने ता वातूनकेरता जी ता टाइम दिसत नाहां एती, सुचना मिलने पुरीन भक्तीने आपणो घेरामायवाला वोचाडनेह जहाज बोणावणेन, एने तान मुळे जगाह दोषी ठेरायेल एने ता धार्मिकतान वारिस एनो जो विश्वासान एतो.

⁸ विश्वासान अब्राहाम ताहेरया गोगाडेंए गीयो तेवी ओहला जागीपोर निकलीन गीयो जीह वारसात लेहु एतो; एने हे मालूम नाह एता कि मी का जात हि, तेभी पुण निकलीन गीयो.

⁹ विश्वासान तान प्रतिज्ञा आपल्या देशाम, बाहेर देशान माणहान होस रेयीन ईसाहाक एने याकूबहेर्यो, जे ताहेऱ्यो तान वशनाजे भेलाईल एता मंडप माय रेणा.

¹⁰ काहाकाय तो ता स्थिर पाया वालाह नगरान वाट दिखिह एतो, ज्यान योजना केरणार एने बंधनारू बोगवान हि.

¹¹ विश्वासामाय साराने पुण स्वताह डावाली एतालून पुण गर्भधारनाची सामर्थ्य मेलविल, काहाकाय तिने प्रतिज्ञा आपणारा खेरो सोमजील एतो.

¹² ज्या कारण से एकुज जाणा, जो मोरील ओहलू इतू, आकाशान चांदण्या एने समुद्रान मेरे वाली रेटीन होस, जी मोजता भी नाय आवी वंश उपन्न एनो

¹³ ज्या आखा विश्वासाच्याच दशेत मोराना; एने तास प्रतिज्ञा आपणा वस्तु मेलविल नाहं, पुण तास सेटेरिन पेल्ला एने आनंद एय गीयो एने मानीन लीईल कि आमु पृथ्वीपोर बाहेर देशान एने बाहरी हि.

¹⁴ जे ओहला वातू केरणू, ते उघड केरणू कि आमु आपणो स्वताहा देशान होदलेताला हि.

¹⁵ एने ज्या देशामायरीन ते निकलीन आवा एता, जर तान देखरेख केरील एती तर ताह पोशा फिरीन जाणेन संधी एती.

¹⁶ पुण ते एक हाजो म्हणजेच स्वर्गीय देशान इच्छुक हेते; तामुळे बोगवान तानकेरीन बोगवान केणेम लाज वायेल नाहं, कारण तान तान केरता एक नगर तियार किरील हि.

¹⁷ विश्वासान अब्राहामने परीक्षेच्या टाइम ईसाहाक अर्पण किरील; एने तान केरता प्रतिज्ञाह खेरो मानना एता.

¹⁸ एने ज्याह इही कियील, “ईसाहाक फायरीन तारो वंश केवाय” तोच आपणो एखोलोज अर्पण करने लागिल.

¹⁹ काहाकाय तान मानीन लीईल कि बोगवान सामर्थी हि, कि ताह मोरना मायरीन जीवतालू केरुहू; सेवट तामायरीन वार्तान स्वरूप पोशा जुडना.

²⁰ विश्वासामाय ईसाहाकने याकूब एने एसावला आवणारा वातू विषयी आशीर्वाद आपील.

²¹ विश्वासामाय याकूबाने मोरणेन टाइम योसेफाच्या बेनु सोराह एक एकास आशीर्वाद आपील, एने आपणो ढेंगारेइ मेरापूर मदत केरणे लीन बोगवानानाह नमन किरील.

²² विश्वासामाय योसेफान, जेवी तो मारणार एतो, इस्राएलान वाड्यो निकलीन जाणेन वात केरील, एने आडान विषय तमाय आज्ञा केरील.

²³ विश्वासामाय मुसान आहाक आबुक ताह, जेल्मो इयील ताबाद तीन मोयनु ताहवोर लीकाडीन मिलील, काहाकाय तास देखील कि सोरो हाजी हि, एने राजान आज्ञेने ते बिईल नाहं.

²⁴ विश्वासामाय मुसान हुशार एयील फारोच्या सोरीह सोरो एणेन नकार किरील.

²⁵ ज्यानकेरता कि पापाहाम थोडच दिहामाय केरणे केरता बोगवानान माणहाहे-यो दुख सहन केरणेन होवटो हाजो लागनो.

²⁶ तान मसीहामुळे निंदा सहन केरणेन मिस्राच्या भांडारामरीन मोठा धन समजील, कारण तान नजर फोल जुडीलूच लागिल एता.

²⁷ विश्वासान राजान क्रोधाह बियीन तान मिस्रला सोडीन दियील, देखानारो दिखिह मजबूत रेणू.

²⁸ विश्वासामाय तान फसह एने रक्त हिपडणेन विधी मान्य केरील, कि पेल्लो जेल्मो लियेल नाश केरणार इस्राएल माय आथ टाकु नाहा.

²⁹ विश्वासामाय ते रातलो समुद्राम पुरलेउखीर इही उतरीन गीया, जोहलो ओहलो धरतिपुररीन उतरीन जातेह; एने ताहेरया मिस्री माणहान तोहोलोच केरणे देखील, तेवी आखा बुडीन मोरीन गीया.

³⁰ विश्वास माय यरीहाचा भितडो, जेवी ते सात दिह जेहीकाय फेऱ्या मारीन इयेलपूर, तो भितडो पोडजायेल.

³¹ विश्वासामाय राहाब वेश्या आज्ञा मानणारान नाश एनी नाहं, तान केरता कि हेराना तू शान्ति से किरील एता.

³² ऐवी उंजू काय केहू? कारण टाइम रेणू नाहं कि गीद्योनाचे, एने बाराक शमशोन, एने इफताह, एने दाविद, एने शमुवेल, एने भविष्यवक्तांचे वर्णन केरूह.

³³ ज्याच विश्वासामाय राज्य जिंकील; धार्मिकतान काम किरील; प्रतिज्ञा आपल्या वस्तु मेलविल; सिंहन मूय बंद किरील;

³⁴ आगठो भोडकील हेलायेल किरील; तलवारीन तारकी वाचीन निकेलना; लुलोहो शक्तीमान एय गीयो; लेढाय सामर्थी निकेलना; दिहीरा देशान सैन्यांना मारीन नाहाड दियेल.

³⁵ बायुकू आपणो मुरीलाह पोशा जीवतालू देखील; कितितर मार खाणु, मरण पाण्यो; एने सुटकान स्वीकारली ज्यानकेरता कि श्रेष्ठ पुनरुस्थानाचे भेलाईल एने जुवी.

³⁶ कूण तर चेष्टा एने फरके खाणेन बाधील जाणाह; बोन्दिखाणामाय जातेन, ओलखिल गीया.

³⁷ दिगुड मार किरील गीया; करिनत चिरीदेद्लू गीया; तान परिक्षा केरील गीयी, तेलवार केरीन मारील गीया, ते गोरीबे, एने दुख सहन केरतालोन, शेरदया एने मेंढरान सांबळो पाघरीन यारीन तोथा फिरील;

³⁸ एने जेंगलामाय, एने डोंगरात, गुफामाय, एने पृथ्वीन गुफामाय भटकत फिरील. जगा तान योग्य नाह एतो.

³⁹ विश्वासामुळेच आवो आखाहेर्यो हाजी गवाही आपील गीयी, तेभी पुण ताह प्रतिज्ञा आपल्या वस्तु जुडील नाहं.

⁴⁰ काहाकाय बोगवानान आमरे केरता सुरुवातीरीन एक हाजो वात ठरिनिलो, कि ते आमरे पोररीन पूर्णतेपर्यंत पोचेल नाहं.