इब्रानियो 10 - नाहाली

¹ काहाकाय व्यवस्था, जी माय आनिणार हाजो वस्तून सावूल हि पुण तान खेरो स्वरूप नाह, तामुळे ता एकुच प्रकारान बलीदानान केरता जें दर वेर्हे चेढाईल जातेह, आहनी आवणारा पुरो केरू शकत नाह.

² नाह ते तान चेढाईल बोंद काहा नाह एता? केरीन का जेवी सेवा केरणारा एकुच वारीन शुद्ध एय जाता, ओवतो पोशो तान विवेक बुद्धी ताह पापी नाय ठेरावती.

³ पुण तान द्वारे तर दरिनर्हे पापान आवील एता हि.

⁴ काहाकाय हे अशक्य हि कि बोयलो एने बोकड्यान रक्त पाप सेटो केरूह शकते.

⁵ केरीन का यीशु मसीह जगाम आव तालून किथी हि, “बलीदान एने अर्पणाचे तू ईच्छा किरील नाहं, पुण मारकेरीन एक डील तियार किरील.

⁶ होमबली अर्पण एने पापार्पणाने तू प्रसन्न एनो नाहं.

⁷ तेवी मी कियील, देखू, मी आवीन गीयो हि, पवित्र शास्त्रामाय मारबाराम लिखील हि, म्हणजेच हे बोगवान, तारी ईच्छा पुरो केरूह”

⁸ उपेर तर किथी हि, “तू बलीदान एने अर्पण एने होमबली एने पाप शक्ती तू ईच्छा केरील नाहं, तू तावजेसे आनंद” एनो म्हणजे हे बलीदान तर व्यवस्था नुसार चेढ़ाइल जातेह.

⁹ पोशा हे पुण किथे, “देखू, मी आवीन गीयो हि, म्हणजे तारी ईच्छा पुरो केरूह” सेवट तो पहिल्याला उठाळीन आपथु, म्हणजे दिहीराह निवाड केरुहू.

¹⁰ ताच इच्छासे आमु यीशु मसीहान शरीरान एकुच वारीन बलीदान चेढाव देणे से आमु पवित्र किरील हि.

¹¹ प्रत्येक याजक तर उबरील रेयीन दाडीन सेवा केरणू, एने एकुच प्रकारान बलीदानही जे पाप केधीच सेटो केरतीन नाहं पोशा-पोशा, चढविल.

¹² पुण यीशु मसीह ते पापान बोदलामाय एकुच बलीदान आखा वेलान केरीन चेढाविन बोगवानान जेवडी उगे जाइन बोहील हि,

¹³ एने ता वेळा पासून तान वाट देखीह हि, कि तान शत्रु तान पायाबुंदवालो पिडी एणेन जुवी.

¹⁴ काहाकाय तान एकुच चेढाविल ताह जे पवित्र किरील जातेह, आखान केरता पुरो केरीन आपील हि.

¹⁵ एने पवित्र आत्मा पुण आमूह जिच गवाही आपतेन हि; कारण तान देखील कियील एता.

¹⁶ “प्रभु किथी हि कि जो वाचा मी ता दिहा बादमाय तान बरोबर बाधहु तो जो हि कि मी आपणा व्यवस्था तान हृदयापोर लेखुह एने मी तान विवेक बुद्धीमाय टाकणे.”

¹⁷ पोशा हे तो किथी हि, “मी तान पापाह एने तान अधर्मान कामान पोशा एर नाय केरुहू.”

¹⁸ एने जेवी न्यान क्षमा एय गीयी, ते ओवतो पापान बलीदान नाहं सोतो.

बोगवानान आहने जाऊ

¹⁹ केरीन हे बायहो, जीही आमूह यीशुन रक्ता द्वारे ता नवीन एने जीवताला मार्ग से पवित्रस्थान माय प्रवेश केरणेन हिमंत जुडील हि,

²⁰ जो तान पोडदु म्हणजे आपणो शरीरा माय आमरे केरता अभिषेक किरील हि.

²¹ एने ज्यान केरीन का आमरो ओहलो महायाजक हि, जो बोगवानान घेरान अधिकारी हि

²² ते आवु, आपु खेरा मोना एने पुरो विश्वासान, एने विवेकान दोष सेटो केरणेन केरता हृदयावर वोयतो केरीन, एने शरीराह शुद्ध पाण्यानकेरीन धोवीन फाचन बोगवानान आहने जाणेन.

²³ चाला आपु आपणो आशान देरणे मजबूत देरीन रिजी, कारण ज्यान प्रतिज्ञा आपील हि, तो खेरो हि.

²⁴ एने प्रेम, एने हाजो कामाम उत्सुक केरणे एक तीहरा चिंता केरतीन रीवू,

²⁵ एने एक दिहीरा बरोबर एक्ठाच एने सोडहुं मा, जोहलो केताहा रीत हि, एक दिहीराह होमजाळीन रीवू; एने जोहलो जोहलो ता दिहा आहने आव तालून देखहु तोहोलो तोहोलो उंजू जादा हे केरतीन रीवू.

²⁶ काहाकाय सत्यान ओलेख जुडी तान केरता जर आमु सेमजीन बुजीन पाप केरतीन रेणा, तर पापान केरता पोशा काल्लोज बलीदान उगेरना नाहं.

²⁷ हा, शिक्षा एक भयानक वाट दिखिह रेणेन एने आकठाम भडक बाकी हि जी विरोधी नाश केरीन टाकणे.

²⁸ तेवी मुसान व्यवस्थाला नकार केरणार, दुय केव्ही तीन माणहान गवाही पोर, बिना दया केरता मारीन टाकील जाथू,

²⁹ तर विचार केरीन तो कोलाक उंजू शिक्षेस पात्र ठेरणू, ज्यान बोगवानान सोरो पायाकेरीन तोडावना, एने वाचाच्या रक्ताहा ज्यान उगेरीन तो पवित्र ठेरेल एतो, अपवित्र सोमजील हि एने कृपेने आत्मान अपमान किरील हि.

³⁰ काहाकाय आमु ताह ओलखते, जो कियील, “बदल लेणे मारो काम हि, मीच बदल आपण्यू.” एने पोशा कि, “बोगवान आपणा माणहान न्याय केरी.”

³¹ जीवतालू बोगवानान आथाम जुडील जास्ती वात हि.

³² पुण ता पासाण दिहीरो इआवीह केरू, ज्यान माय तुमूह प्रकाश मेलावीन मोठला संघर्षामाय स्थिर रेणा.

³³ केवी केवी तर हे कि तुमूह निंदा एने दुख सहन केरतेहे तमाशा बुणील, एने केवी हे कि तुमूह तान भेलाईल ज्यान दुर्दशा केरील जात एती.

³⁴ काहा तुमूह बंदिवानाच्या दुखा माय पुण दुखी, एय गीयो एने आपणी संपती आनंदमाय सांडाळीन; आपील हे सेमजीन कि तुमरेहे-यो एक उंजू पुण हाजो एने कायम रेय संपती हि.

³⁵ तामुळे तुमरो धीरज सोडहुं मा, काहाकाय तान प्रतीफळ मोठू हि.

³⁶ काहाकाय तुमूह धीरज देरणे जरुरी हि, म्हणजे बोगवानान ईच्छान पुरो केरीन तुमूह प्रतिज्ञान फोल मिलीजावू.

³⁷ काहाकाय ऐवी जादा थोडो टाइम रेयीन गीयो हि, जेवी आवणार आवी वार केरी नाय.

³⁸ पुण मारो धर्मी जन विश्वासान जीवतालू रेय, जर तो पासाण एय जाहू तर मारा मण तापुर आनंद एय नाहं.

³⁹ पुण आमु पासाण आवी जाहू नाहं कि नाश एय जाहू पुण विश्वास केरणारा हि कि आपणो जीवाह वाचाढो.