गलातीयो 5 - नाहाली

स्वतंत्र्यताह सुरक्षित मिलो

¹ मसीहा माय स्वतंत्रता केरीन आमूह स्वतंत्र किरील हि सेवट: यात्यतच स्थिर रीवू, एने गुलाम जुवाखाली पोशा जुपल्यु जावू मा.

² देखू, मी पौलुसस तुमूह किथे केध्दीह खतना केरही, तर मसीहा माय लाभ एय नाहं.

³ तेभी मी एक उन्जू खतना केरणार जतवून आपथु कि ताह व्यवस्था प्रमाणे मानेतू लागी.

⁴ तुमूह ज्या व्यवस्था खेरो ठेरहू इच्छिता, मसीहा तारीन आलेग एने अनुग्रहा पासून बुंदे पोडील हि.

⁵ काहाकाय आत्मान कामा केरीन आमु विश्वासान, आशा केरतालून धार्मिकता वाट देखताला.

⁶ मसीह यीशु नाहं खतना एने ना बेखतना काही कामा हि, पुण केवळ विश्वास, जो प्रेमा द्वारे प्रभाव टाकथू.

⁷ तुमूह तर हाजकेरीन भोक्ती माय दोवळतीन एतो. ऐवी तान ताह उभराखील कि सत्याह मानू मा.

⁸ ओहलो लिकाडतालु तुमरो बोलवनाचान फायरीन नाहं.

⁹ जारिक खमीर आखा खमीर केर देणे.

¹⁰ मी प्रभुह तुमरो विषयाम विश्वास मेलीकि तुमरो दिहरो विचार रेहू नाहं; पुण जो तुमूह बिवाड्त्लू, तो कूण काहा नाह रेत दण्ड भोगी.

¹¹ पुण हे बायहो; केध्दीह मी एविवूर खतना सुवार्ता करने, तो एवीजाहू त्रास आपील जाथू हाषकी क्रुस ची ठोकर खाणे रेंय.

¹² हाजो एय कि जे तुमरे पोर डाव मेलतेन, ते आपणा शरीरुच काटीन टाकणे.

¹³ हे बायहो, तुमूह स्वातंत्र एणेन केरता हादील गीया हि; पुण इही होवो कि हे स्वातंत्र्याच्या शारीरिक कामान केरता वावा आपुह मा, नापून प्रेमाकेरिन एक दिहरान दास बना.

¹⁴ काहाकाय व्यवस्था पुण प्रेमाकेरिन ज्याह एकुच वातू माय पुरो एईन जातेह, “तू आपणो शेजाऱ्यावर आपणो हारका प्रेम केर.”

¹⁵ पुण तुमूह एक दिहीरान चावता एने खाइन टाकणु, तर परस्परांच्या आथान एकादिहरा संहार एईन नाहा केरीन हाचकेरिन मेलणु.

पवित्र आत्मान द्वारा चालणो

¹⁶ पुण मी किथे, आत्मान नुसार चालू तर शरीरान देहवासना कायताहा रीतीमाय पुरो नाहं केरणार.

¹⁷ काहाकाय शरीर आत्मान विरोदात एने आत्मा शरीरान विरोधामाय (लालसायुहू) करने, एने हे एक दिहरान विरोधामाय हि, जानकेरता कि जे तुमूह केरूह इच्छिमाय ते केरूह शकणार नाहं.

¹⁸ एने केध्दीह तुमूह आत्मान चालवनयाने चालणु तर व्यवस्था अधीन नाहं.

¹⁹ शरीरान काम तर प्रगट हि, म्हणजे व्यभिचार, खराब काम, लुच्चे पणा,

²⁰ मूर्ती पूजा, जादू, वैर, लेडाणे, इर्षा, राग, विरोध, आकठो, विधर्म,

²¹ हेवो, दारो, रिकामीहि एने यान सारकोस उन्जू कामे हि, ज्ञान विषय माय तुमरो उपेरीन केईन आपथु, काहाकाय पेल्ला कियेल हि कि, इही कामे केरणारा बोगवानान राज्यान वारिस एय नाहं.

²² पुण आत्मा चे फोल प्रेम, आनंद, शान्ति, धीर, कृपा, हाजोपण, विश्वास,

²³ नम्रता, एने सौम्यता हि; इही काम विरुद्ध व्यवस्था नाहं.

²⁴ एने जे मसीह यीशु चे हि, तान शरीराह तान लालसायुहू एने वासना हेरी क्रुस उपेर सोडवीत आपील हि.

²⁵ केध्दीह आमु आत्मा द्वारे जीवतालू हि, तर आत्मा च्या नुसार चालू.

²⁶ आमु कोठी एय नाहं पुण एक दिहीराह चिडवू नाहा, एने दिहरापुर हेवो केरूह मा.