गलातीयो 1 - नाहाली

अभिवादन

¹ पौलुस जो नाह माणहा फायरीन एने नाह माणहान द्वारा, पुण यीशु मसीह द्वारा एने बोगवान आबाक द्वारा, जो मोरील मायरीन जीवतालू, इनू तान प्रेरित हि.

² एने आखा बाहाक वूखेर रीन, जां मारहे-या हेते, गलतियो कलीसियान नावे:

³ बोगवान आबुक एने आमारो प्रभु यीशु मसीह ज्याफायरीन तुमूह कृपा एने शान्ति जुडते रेंय.

⁴ तो स्वताह आमरा पापान केरता आप देयील, म्हणजे आमरो बोगवान एने आबाकने ईच्छा प्रमाणे आमूह ज्या वर्तमानान वाईट संसारामाय सोडावी.

⁵ तान बोडाई एने महिमा पिडीन पिडी एने जुवी. आमेन.

दिहरो काल्लोच सुसमाचार

⁶ माहु आश्चर्य लागीह का जो तुमूह मसीहान कृपा माय हादाडील ताफायरीन तुमूह ओलाक माय जेल्दी फिरीन एने दिहरान हाजी सुवार्तान केरीन वोलने लागिल हि.

⁷ पुण तो दिहरो हाजी खोबर जिच नाहं: पुण ती वात ओहली हि का कोलाक इही हि ते तुमूह बिईन आपणु, एने यीशु मसीहान सुवार्ता बिगडावनार प्रयत्न केरणू.

⁸ जर आमु, केव्ही स्वर्गामाय रीन दूत पुण आवो सुवर्तेला सोडीन जे आमु तुमूह कियील हि, ताह सोडीन दिहिरी सुवार्ता तुमूह केनार हि, तर ते श्रापित होय.

⁹ जीही आमु देखील केयीन चुकील हि, तोहोलो आमु पोशा सांतो कि आवो सुवार्ताह सोडीन ज्याह तुमूह होवकेते हि, जर कूण दिहरो हाजूसदेश केनार हि, तर तो श्रापित होय.

¹⁰ ऐवी मी काय माणहा होमजाळीन किवा बोगवानान? काय मी माणहा संतुष्ट केरणेन ईच्छा करने? जर मी ऐवी ताहवोर माहु च संतुष्ट केरतीन रेणू येतो तर मसीहान दास रेणू नसते.

पौलुस किहिक प्रेरित बोणील

¹¹ हे बायहो, मी तुमूह केयीन आपथु कि जी सुवार्ता मी कियील हि, ती माणहान नाहं.

¹² काहाकाय तो माहु माणहा फायरीन नाहं पोचनो, एने नाह माहु हिकाडील, पुण यीशु मसीहान प्रकटी कर्णान वजसे जुडील हि.

¹³ यहूदिया मतानुसार जो मारो पेल वागणूक एती तान बारामाय तुमूह होमलील हेते का मी बोगवानान कलीसियान माय जुलुम सताव केरतालो एने नाश केरतालु.

¹⁴ मारो जुलुम जातीनी जे मारहारखो एता, यहूदी मतात जुलुम वोळतेच चालना एता एने आपणो पूर्वजान परंपराकेरता जादा धुन माय एता.

¹⁵ पुण बोगवानान ईच्छा एनी, तो मार आईकने पेटामायुच माहु थोबाडील एने तान कृपासे हाद लीदु,

¹⁶ ताहेरया ईच्छा एनी कि कुणबी आपणो सोरा प्रकट केरुहू कि मी दिहरी जातीन माय तान सुवार्ता पोरचार केरूह, तेवी मी माहा केव्ही रक्तान वजेसे सिडिक दर्शन लीईल नाहं.

¹⁷ एने यरूशलेमत पुण गीयो नाहाताहेरी जा मार ओगाण प्रेरित एता, पुण चालूच अरबाह निकलीन जाईल एने तारीन दमिष्क ला फिरीन आवूह.

¹⁸ ओवतो तीन वऱ्योमाय मी कैफाला मिलने केरता यरूशलेमाम गीयो, एने तान आहने पंधरा दिह रेणू.

¹⁹ पुण प्रभुन बाहाक याकूबाला सोडीन दिहीरा प्रेरितांमधून एकास पुण मिलील नाहं.

²⁰ ज्या वातू मी तुमूह लेखातुलू, देखू, बोगवानान उपस्थित होमजाडीन किथे ते ठेगणे नाहं.

²¹ यानबादमाय मी सिरीया एने किलकीयाच्या प्रदेशाम आवा.

²² पुण यहूदीयान कलीसियान जी मसीहा माय एती, पुण मार मूय ते केविज देखील नाह एता;

²³ पुण ज्यो होंबेलताली का जो पेल आमूह दोमतालो, तो ऐवी ताच धेर्मान विश्वास हाजी सुवार्तान पोरचार होमलाडने, जाह पोयले तो नाश केरतालो.

²⁴ एने मार विषयामाय मी बोगवानान महिमा केरताली.