इफिसीयो 6 - नाहाली

आहाक-आबुक एने सोरा

¹ एय सोरा, बोगवानामाय आपणा आहाक आबाकने आज्ञा धारी बोणु, काहाकाय ज्यो उचित हि.

² “आपणो आहाक आबाकने मान खा. हि पेल्ली आज्ञा हि ज्याहेया वायदो पुण हि.

³ कि तारो हाजो एय, एने तू पृथ्वीपोर जादा दिह जीवतालू रेहू.”

⁴ हे आबाहाक, आपणो सोराह चिडवू मा, पुण प्रभुन शिक्षण एने हिक आपतेन रेतालान ताफाय पोहणे पालनो केरू.

मालिक एने दास

⁵ हे दासाहा, जे माणहे आवो जगामाय तुमरो धनी हेते, आपणो मोनान भावना बिय मानू एने काटीन काटीन, जाणने मसीहान आज्ञा पालणेन तोहोलो तान पुण आज्ञा देखतालु जा.

⁶ माणहा प्रसन्न केरनारण सारकोस एने देखडणे केरता सेवा केरूह मा, पुण मसीहान दातान हारका मोनान बोगवानान ईच्छापूर चालू.

⁷ एने ता सेवाह माणहान नाहं पुण प्रभुन होमजाडीन खेरा हृदयाने केरू.

⁸ कारण तुमु ओलकतेह ज्यो कूण जाणने हाजो काम केरणार, दास ओहलो कि हाजो, प्रभु फायरीन तोहोलोच जुडी.

⁹ हे मालदारे, तुमु पुण गाब्राविणे सोडीन तान हेरी तोहोलोच वागा; कारण कि तुमु हि होमोलनु कि तान एने तुमरो दुयुन भी धनी स्वर्गाम हि, एने तो कायताहा पक्षपात नाहं केरुहू.

आत्मिक लेडाईन हत्यार

¹⁰ ज्यानकेरता प्रभु माय एने तान शक्तीन प्रभावही बलवंत बना.

¹¹ बोगवानान आखा हत्यार स्वताह बांधीन ली कि तुमु शैतानन युक्त्यांसमोर उबरीयेल रेहू शकणार.

¹² कारण कि आमरा हे युद्ध रक्त माह हेर्यो नाहं तर प्रधानांनी, एने अधिकारी, एने आवो जगाच्या अंधकारान पुढारीइ एने आकाशामाय वालो दूर आत्मा हेया हि.

¹³ ज्यांकेरता बोगवानान आखा हत्यार बांधीन ली कि वाईट दिहामाय युद्ध केरूह शकणार, आणि आखा काही पुरो केरीन स्थिर रेहू शकणार.

¹⁴ ज्यांकेरतासत्याने एने कबंर कसून एने खेरोपण ताह जेलीम रीगाडीन.

¹⁵ एने पायम मेलामाय सुवार्ता तियार बूट रीगाडीन,

¹⁶ एने ता आखाहे-या विश्वासाआ डाल लीन स्थिर रीवू ज्यामाय तुमु दुष्ट वालाह आखा तारांना उलाडदिईल शकणार.

¹⁷ एने उद्धाराची टोपी एने आत्मान तलवार ज्यो बोगवानान वचन हि लीन ली.

¹⁸ प्रत्येक वेलान प्रत्येक प्रकारान आत्मा माय प्रार्थना, एने विनंती केरतीन रीवू, एने ज्यांकेरता जागे रीवू कि आखा पवित्र माणहा केरता निरंतर विनंती केरतीन रीवू.

¹⁹ एने मारकेरीन पुण कि तू माहु बुलील टायीमा याच प्रबळ वचन आपील जाऊ कि तुममाय हिमंत हेरी सुवार्तान भेद केहू शकेल,

²⁰ जानकेरता मी बेड्यांनी बांधील हि, एने हे पुण कि मी तान विषयाम जाणने माहु जुवी, हीमतवाही केह.

आखरी अभिवादन

²¹ तुखिकुस, जो प्रिय बाहाक एने बोगवानामाय विश्वास योग्य दास हि, तुमु आखी वातू केय कि तुमु भी मारी परिस्थिती जाणू कि मी कोहलो रेणे.

²² ताह मी तुमरेफाय ज्यांन केरता मोकलील हि का तुमु आमरी परिस्थिती ओलखु, एने तो तुमरा मोनाह शान्ति आपी.

²³ बोगवान आबोक एने प्रभु यीशु ख्रीस्ताफायरीन बायाक शान्ति एने विश्वासाआ हेरी प्रेम जुळी.

²⁴ जो बोगवान प्रभु यीशु ख्रीस्तामा खेरो प्रेम करने ता आखापूर कृपा एता रीवू.