इफिसीयो 5 - नाहाली

उजालान सोरा बोणो

¹ ज्यो करीन प्रिय सोरा हारका बोगवानान अनुकरण केरू,

² एने प्रेमामाय चाला जाणे मसीहाने पुण तुमरे पोर प्रेम किरील, एने आमरे केरता आपणो स्वताह दुखदारात हाजा केरीन बोगवानान ओगाण भेट आपील बलीदान केरीन आपील.

³ जाणे पवित्र माणहान योग्य हि, तोहोलोच तुमु माय व्यभिचार एने काल्लोबी प्रकारान अशुद्ध काम केव्ही लोभाश्या चर्चा पुण एणेन मां;

⁴ एने नाहं निर्जलता, नाहं तात्काळ वातू केरील, नाहं रिकामी केरील; काहाकाय कि ज्याह वातू होबा आपतेन नाहं, नापून धन्यवादच होमलील जाहो.

⁵ कारण कि हे तुमु जाणे कूण जारकर्मी केव्ही अशुद्ध जन, केव्ही लोभी माणहान, जे मूर्ती फिजाय बारोबुर हि, मसीह एने बोगवानान राज्यामाय वारसा नाहं.

⁶ कूण तुमु वाया वातू माय धोका आपुह नाहा केरू ज्यांन कामान कारणाने बोगवानान राग आज्ञा पाडणारापुर खाकार हि.

⁷ जानकेरता तुमु तान भेलाईल एहू मा.

⁸ काहाकाय कि तुमु तर पेल्ला आंधाराम एता पुण ऐवी प्रभु माय प्रकाश असो, सेवट उजालान सोरा हारका चाला.

⁹ (कारण कि उजालान फोल आखा प्रकारान हाजो, एने खेरोपणा, एने सत्य हि).

¹⁰ एने हे पारखिल्यु कि प्रभुह काय पोटणे.

¹¹ आधाराम निष्फळ कामामाया भेलाईल होवो, नापून तां पोर प्रतिकार केरू.

¹² काहाकाय कि लिकाडील कामान चर्चा पुण लाज वात हि.

¹³ पुण जोलाक कामापुर प्रतिकार आपील जाथू, ता आखा उजालान प्रकट ऐतेह, काहाकाय कि ज्यो आखा कोणबी प्रकट करने, तो उजालो हि.

¹⁴ ज्या कारणाने तो किथे, “हे हुवानारह, जागो एने मुरील मायरीन जीवतालू एवू, म्हणजे मसीहान प्रकाश तारपोर चमकीनारा.”

¹⁵ ज्यानकेरता लक्ष्य आपिन देखू कि कोहली चाल चालणु अज्ञानासमान हारका नाहं पुण बुद्धीमानापुररीन हारका चालू.

¹⁶ एने वेलाह मोल्यावान होमजू कारण दिह वाईट हि.

¹⁷ आवो कारणाने निर्बुद्धी होव पुण लक्ष्य आपील होमजील कि प्रभुन ईच्छा काय हि.

¹⁸ अंगूररस केरीन मस्त एहू मा काहाकाय यान ठग पुण एतो पुण आत्मांनी परिपूर्ण एता जा.

¹⁹ एने आपसामाय भजन एने स्तुतिगीत एने आत्मिक गीत गाव्या कीरु एने आपणो मोना माय प्रभुन ओगाण गावते एने किर्तन केरतीन रीवू.

²⁰ एने सदा आखा वातू केरता आमारो प्रभु यीशु मसीहान नावान बोगवान पितान धन्यवाद केरते रीवू.

²¹ मसीहान बियान एक दिहरान अधीन रीवू.

बायकू एने एदमी

²² हे बायकू, तुमु आपणा आपणा एदम्यान ओहला अधीन रीवू जीही बोगवानान.

²³ एदमी बायकून बारी हि जाणेन कि मसीह कलीसियान हि बारी हि एने खुदेन शरीरान उद्धारकर्ता हि.

²⁴ पुण जाणेन कलीसियान मसीहान अधीन हि, तोहोलोच बायकू पुण प्रत्येक वातीमाय तुमु आपणो एदम्या अधीन रिजी.

²⁵ एय एदमी, तुमु आपणी आपणी बायकू हेर्यो प्रेम केरू, जीही मसीहाने पुण कलीसियापुर प्रेम केरीन स्वताह तान केरता आप दिईल.

²⁶ का तान वचना द्वारे धोवीन स्थानाने हाजो केरीन पवित्र बोणावू,

²⁷ एने ताह एक इही तेजस्वी कलीसिया बोनाडीन आपणो स्वताहा उबरीयेल केरू, ज्यामाय नाहं डाग, नाहं सुरकुती, नाहं काल्ली ओहली वस्तु हि नाह एईन ती पवित्र एने निर्दोष एय.

²⁸ आवो प्रकारे उचित हि कि एदमी आपणो आपणो बायकू फायरीन आपणो शरीरा प्रेम केरणू ज्यो आपणो बायकून प्रेम करने, तो आपणो मायपूर प्रेम करने.

²⁹ कारण कि केध्दीह कूण शरीरान द्वेष केरतीन नाहं नापून तान पोहणे पालनो करने, जोहलो मसीह पुण कलीसिया हेरी करने.

³⁰ ज्याकेरता कि आमु तान शरीरान भाग हेते.

³¹ “आवो कारणाने माणुह आपणो आईआबाह सोडीन आपणो बायकून मिलिन रेंय, एने ते दुयू एक देह एती.”

³² हि रहस्य मोठा हि, पुण मी मसीह एने कलीसिया ज्यांन संबंधाने बोलीह हि.

³³ पुण तुमरे माय वालो प्रत्येक आपणो बायकून आपणो सरखोच प्रेम केरू, एने बायकू पुण आपणो एदमी बिय मानेतू.