इफिसीयो 4 - नाहाली

मसीहान शरीरा माय एकता

¹ तान केरता मी ज्यो प्रभु माय बंदी हि तुमु विनंती करने कि ज्या हादील तुमु हादाड्या गीया एता, ताह योग्य चाल चालो.

² म्हणजे पुरो नम्रतेने एने सौम्यतेने, एने धीर देरीन प्रेमाकेरिन एक दिहरान सहन केरणू;

³ एने शान्ति ने बंधनाणे आत्मान एकता मेकील यत्न केरणू.

⁴ एकुच शरीर हि, एने एकुच आत्मा; याच तुमु जे हादील गीया एता आपणो वातुकेरणेमाय एकुच आशा हि.

⁵ एकुच प्रभु हि, एकुच विश्वास, एकुच बाप्तिस्मा,

⁶ एने आखान एकुच बोगवान एने आबोक हि, ज्यो आखाजपूर एने आखामाय एने आखाम हि.

⁷ पुण आमरीफायरीन आखाह मसीहान दाणाच्या परिणाम नुसार कृपा जुडी हि.

⁸ केरीन तो किथी: “तो उचांलापूर उपेर चेढील, एने बंदीवानाह बांधीन ली गीयो, एने माणहा दान आपील.”

⁹ ऐवी जेवी ता ओहलो केतेह, उपेर चेडनू ते तान अर्थ काय म्हणजे तो पृथ्वीन बुंदे बोगवानानाली जागामाय उतरना पुण एतो.

¹⁰ एने ज्यो उतरी गीया आवो तोच हि ज्यो पुरो आकाशामाय चेढील पुण गीयो कि आखा काही परिपूर्ण किरील.

¹¹ तास काही जाणाह प्रेरित निवाडीन, एने कोणीही भविष्यवक्ता निवाडीन, एने आदीहा होमालणार एने उपदेशक निवाडीन आपील,

¹² ज्याही पवित्र माणहे पूर्णता एय जाणे एने सेवेन काम किरील जाणे एने मसीहान शरीर उन्नती जुळणार,

¹³ जो ताहवोर कि आमु आखान आखा विश्वास एने बोगवानान सोरान ओलखात माय एक एय जाहू, एने एक सिद्ध माणुह बोणावीन जाणे एने यीशु मसीहा माय पूर्णता प्राप्त एय.

¹⁴ म्हणजे आमु ज्या ओगाण सोरा नाय रेहू ज्यो माणहान टेगनेन विद्या एने चतुराईनी, भ्रातिच्या मार्गा युक्तीवजेसे एने उपदेशरुपी प्रत्येक वाराआ आतल्या नाय रेहू तोथा फिरीविलो जातेह.

¹⁵ पुण प्रेमाय खेरोकेरीन चालतालून आखी वातू माय तान माय जो मुंड हि, म्हणजे मसीहा माय वोदनेन जाणे,

¹⁶ जाकेरीन आखो शरीर, प्रत्येक भागह जुडणेन मदद एक्ठाच मिलिन एने एक्ठाच गडकर, ता प्रभावान होस जो आखा शरीरान हाजो हाजो केरणेन वजेसे तामाय एने हि, जीवाह वोडावील कि तो प्रेम उन्नती केरील.

मसीह माय नोवालो जीवन

¹⁷ तान केरता मी हे किथे एने प्रभु माय विनंती केरथू कि जोहलो दिहरी जातीन माणहे आपणो मोनान अनर्थ रीतीम चालतो इतू, एविरीन पोशा इही मा चालू.

¹⁸ कारण तान बुद्धी आंधाराम एय गीयी हि, एने ता अज्ञानाच्या कारण से ते बोगवानान जीवना मायरीन आलेग किरील हि;

¹⁹ एने ते ठावको एय लबाडीमाय लागिन गीया हि कि आखा प्रकारान वाईट काम हावतटे पणाने केल जाणे.

²⁰ पुण तुमु मसीहान असी शिक्षा नाहं जुडी.

²¹ पुण तुमूह खेरीच ताणुच होमलेल एने, जोहलो यीशु माय सत्य हि, तामाय हिकाळनेल पुण गीया.

²² का तुमूह पासाण चाल चलनान जुनो माणहाह तो कपटान वासनावजेसे युक्त रेईन तान नाश एतो जातीह हि, उतरीन टाकु.

²³ एने आपणो मोनान आत्मिक स्वभावाम नोवालो बोणावूह जाणे,

²⁴ एने नोवालो माणहाह रीगाडीन ली ज्यो बोगवानान खेरोपणा एने सत्यान खेरोपणा एने पवित्रतायांनी युक्त एय.

²⁵ केरीन ठेग सोडीन एक दिहरा खेरो बालने, ठेगणे वातूह नाहा, काहाकाय आपु एक दिहरा अवयव हि.

²⁶ राग तर केरू, पुण पाप मा केरूह; सूर्य मावळे ताहउर तुमरो राग रिजी,

²⁷ एणेन शैतानाहा टायम आपु.

²⁸ चोरी केरुहू पुण चोरी नाय केरणू, पुण हाजो काम केरणेन आपणो आताकेरिन मेहनत केरणू, तान केरता कि ज्याफाय रेंय ताह आपणेन तान आहने काही एय.

²⁹ काल्ली वाईट वात तुमरो मुया मायरीन नाहं निकेलने जुवी, पुण गरजा अनुसार तोज निकेलगिया कि जे प्रगती केरता हाजो रेंय, म्हणजे ताकेरिन होमलनारापूर कृपा ओहलो.

³⁰ बोगवानानाच्या पवित्र आत्माह दुखी मा केरूह, ज्याही तुमरे पोर सुटकान दिह ताहवोर मुद्रित एनो हि.

³¹ आखा प्रकारान कपटीपणा, एने राग एने कलकलाट, एने निंदा, आखा दृष्टपणा सुद्द तुमरो सेटो किरील जाणे.

³² एक दिहरापुर उपकार एने कायकेरथी एवू, एने जाणे बोगवान मसीहा माय तुमरो गुह्ना क्षमा किरील, तोहोलोच तुमु पुण एक दिहरान गुन्हा क्षमा केरू.